السلام عليكم ورحمة الله وبركاته

الاسبوع الماضي كانت مقابلتي فالسفارة الأمريكية في الاردن انا وأسرتي ،،

طبعاً كنت مدجج بترسانة أوراق ومستندات داعمة من الصعب جداً إختراقها والكمال لله ،،

أجواء السفارة طبعاً جميلة جداً والموظفين طبعهم ودود وحبابة

بالنسبة للمقابلة عادية وأسئلة تافهة لكن بالنسبة لمقابلتي خذت منعطف غريب شوي

يعني الموظفة القنصل وقفت على التخصص في الدكتوراة مع الرغم اني ماشي بقبول لغة وليس أكاديمي

بعد سألتني شن تبي تدرس في أمريكا قلتلها هندسة اتصالات وقالت شن تبي تبحث بالضبط قلتلها مزال مش محدد لكن على الأغلب wireless networks امتداد لبحثي في الماستر

قالتلي شن كانت وظيفتك حكيتلها اني عضو هيئة تدريس وعطيتها خبرة عمل فيها تاريخ بداية العمل والمواد اللي درستها والبحوث اللي اشرفت عليها والمناصب اللي مسكتها لكن للأسف ماعبرتها ولاشافتها

طلبت ضمان الرجوع لليبيا بعد تكملة الدراسة عطيتها رسالتين وحدة من الكلية والأخرى من الدراسات العليا بالجامعة ،،

المهم زادت رجعت وركزت على موضوع الدراسة وقالت مش واضح ضروري نبي مقترح بحث الدكتوراة ،!!!!

انا هنا خلاص تقاعست وقعدت نبي الرفض أحسن من تشحيط الشهور في الانتظار لأني عرفتها مش حتعطي التأشيرة في وقتها ،،

قلتلها اوكي خلاص تمام المقترح مش متوفر ( طبعاً المقترح بعد تكملة المواد وبعد سنة ممكن حتى تقدر تقدمه ،، معقولة مقابلة سفارة تحولت لمقابلة جامعة اكاديمية )

المهم جت معاها موظفة أردنية وقالتلي لاتقلق رح نعطيك التأشيرة ولكن محتاجين منك مقترح لدراستك وعناوين مشرفيك في دراستك السابقة ومايحتاج ترجع للسفارة فقط لما تبعث المطلوب لو استوفى نطلبوا منك الجوازات على ارامكس وترجعلك )

عطوني ورقة بيضاء فيها المطلوب وتوكلت كملتها اسبوع سياحة فالاردن ورجعت لليبيا

انا حسب اعتقادي خايفين من التخصص لأنه في الماستر شغلي كان تصميم مودل حماية للشبكات اللسلكية من الاختراق ؟؟ يتوقعوا ليه امتداد أمني !!

وحاليا نفكر نبعتلهم شن يبوا من الزايد لأنه النية طارت منها امريكا وفي نفس الوقت نقدم على كندا

ومش عارف كيف بتنحسب عليا لو تجاهلتهم ،، يعني تنحسب رفض والا شن بالضبط ؟؟

وملاحظة مهمة لطلبة الدكتوراة خوذوا النقطة هذي في اعتباركم لأنه معاي نفس الحالة طلبة دكتوراة ولا واحد خذي التاشيرة في نفس الوقت ،، شكلهم خايفين من بقائهم في امريكا

وفالوقت نفسه فيه مقابلات طلبة ماجستير كلها كلام فاضي وكلام عن الحر والبرد ومش عارف مافيش مقارنة بالــ phd

تحياتي وبالتوفيق للجميع

رد: مهم لطلبة الدكتوراة للتقدم على التأشيرة

وعليكم السلام ورحمة الله وبركاته

أخي موفد النسيان قدر الله وما شاء فعل، وما أعتقدش اللي صار معاك يخلي اليأس يراودك بهذا الشكل،،، متعرفش دائماً الخيرة فيما أختاره الله، ومرات بعد كل هذا التعجيز تتحصل على التأشيرة، وغيرك تكون مقابلته أسهل بكثير ويتم رفضه في التأشيرة...

شوف... أني نشكرك على حرصك وتنبيه أخوتك في هذه النقطة، بس بنقولك عن تجربة إن القنصل بالسفارة ليهم حسابات نحن لا نفهمها أبداً،،، بالاضافة للمستندات اللي حكيت عليها اني نشوف ان الموضوع ليه جانب كبير سيكولوجي، منعرفش كيف انزيد نشرح هالموضوع بس شوفت أشياء خلتني نقول هالشيء، أني مثلاً وحكيت قصتي كاملة في التأشيرة كانت غريبة جداً، ورح انزيد نعاودها وانت استنتج من كلامي اللي نبي نوصله للجميع...

تصور القنصل ارفض يطلع أو يقرأ أي مستند غير رسالة قبول الجامعة فقط، وأي شيء يسألني عليه نقوله معاي مستند يدعم كلامي ونحاول نقدمهوله يرفض يطلع عليه، لا رسالة العمل ولا إفادات التخرج، ولا حتى رسالة الدعم المالي، هل تتصور معي ذلك؟... يعني لدرجة إنه صارلي إحباط أكثر منك، وقولت هاذي خلاص رفض وممكن كنت نقع في المحظور، وتفلت أعصابي زي ما يقولوا،،، منعرفش ممكن كان يختبر فيا بهالتصرفات الله أعلم...

بالرغم يا خوي أني زيك ماجستير وماشي للدكتوراة، ولا سألني أي سؤال على هالموضوع أبداً.... أكثر شيء ركز في جواز سفري وسألني هلبا على التأشيرة البريطانية وتأشيرة الشنغل ووين امشيت وعلاش امشيت،،، وبعدها بكل بساطة قالي لقد وافقنا على منحك التأشيرة، ومش رح نحكيلك على ردة فعلي لانها واضحة.... ولك أن تتصورها كيف ما تشاء..

لا... وخليني انزيدك من الشعر بيت يا طيب،،، كان معاي في يوم المقالة زوج أختي وكان قبلي بربع ساعة، وكنت حاضر مقابلته،،، وشوفت كل شيء بعيوني، ونزيدك أكثر حتى هو عنده ماستر هندسة اتصالات من جامعة براتفورد بريطانيا، وبالتحديد تخصصه ليه علاقة باللاسلكي على ما أعتقد أو شيء من هذا القبيل،،، كانت مقابلته متعبة ومعقدة بعض الشيء، بس ولا سؤال من القنصل كان على تخصصه ولا رسالة الدكتوراة أو من هذا القبيل، كان تعقيدهم منصب على كثير من الأسئلة حول جهة العمل، بشكل يثير الريبة،،، مع أنه كان يشتغل في شركة البريد والاتصالات اللي تبع الدولة، يعني لا يشتغل في قوات الردع ولا قوات درع ليبيا ولا غيرها باش يركزوا على جهة العمل، وفي الأخير قالوله طلبك يحتاج لمزيد من الإجراءات الادارية، وقولنا هاذي خلاص رفض، يتفاجئ بعد أسبوعين بالتحديد بإيميل بالموافقة على التأشيرة...

لو واحد يجمع في مخيلته جميع القصص بالمنتدى المتعلقة بتجارب الاعضاء في التأشيرة مستحيل رح يجد معايير محددة للمقابلة، أو من الصاعب أنه يحدد كيف رح تكون المقابلة، والأصعب من ذلك أنه يحدد ما هي المقاييس التي يتعاملون بها من أجل منحك التأشيرة؟،،، نرجع ونقول ان المستندات وتوفيرها مش كل شيء في المقابلة، في جوانب أخرى البعض منها متوقع، والبعض الأخر مش متوقع زي ما صارلك خوي موفد النسيان،،،، في تركيز أيضاً على شخصية المتقدم للمقابلة،، تصرفاته درجة التوتر والتفاعل مع القنصل،،، بس يبقى وحيداً السبب الأقوى لحصولك على التأشيرة التوفيق من الله عز وجلّ...

أكيد كان في إطالة، بس حبيت المشاركة ببعض الأراء ووجهات النظر، ومتفائل جداً إنك رح تتحصل على التإشيرة إن شاء الله....

والله ولي التوفيق....

_______________________________

ومن يتق الله يجعل له مخرجاً

ويرزقه من حيث لا يحتسب

رد: مهم لطلبة الدكتوراة للتقدم على التأشيرة

أنست ياخوي اسماعيل وكما تعودنا منك دائماً سبَاق لإثارة النقاش المهم والهادف

وبارك الله فيك على شرحك وتوضيحك وبالعكس مافيش إطالة ، لأنه الكلام كله مفيد وإيجابي

بس بنعلق على بعض النقاط اللي هي أشرتلها حضرتك بارك الله فيك

انا عن نفسي ماعنديش مشكلة حتى فالرفض عادية الأمور وتصير ومتوقعة ومش اول واحد ولا أخر واحد ،،

لكن اللي توجعك لما تكون مجهز كل شي حتى من ملكية العقار ،، واللي توجعك أكثر لما يكون الأمر بدون مبرر واضح ،،

حتى هما من حقهم يحافظوا على بلادهم لكن حتى المتقدم عنده حقوق وهم صدعوا روسنا بقصة الحقوق ،،

بالمختصر لو عطوني مبرر ورفض نهائي والله ماتهمني ،، كلها نصيبات

حتى ماصارش من السفر أساساً حالياً اللي زي حالتنا أساتذة حديثي التخرج ،، دائماً دكاترة الكليات يهربوا من المواد القوية ويعطوا فيها للأساتذة الشباب ،،

يعني تقدر تنمي قدراتك في أي مكان فالعالم ،، بس الإمكانيات هي اللي تخليك تلتفت لمكان دون مكان ،،

بالنسبة للتخصص ركزوا عليه على أساس أنه حساس حسب فهمي والله اعلم ،، لأنه بحثي في الماجستير كان في الــ SECURITY وكذلك شاركت بيه بورقة بحثية في مؤتمر علمي

يعني علاش تطلب مقترح دكتوراه في مقابلة تأشيرة ؟؟ بمعنى تعجيز لأنها مافيش حد طالع بيقرا لغة ومجهز مقرح لدراسته

وانزيدك من الشعر بيت القنصل شافت تأشيرة الصين في جوازي قالتلي علاش مسافر للصين ،، قلتلها مشيت دورة تدريبية وعندي شهادة بيها "في إطار الموضوع يعني ماعندها ماتقول"

وبالنسبة لقصة التوتر ياخوي اسماعيل هذا عامل عفوي في الانسان لامحاله لكن عن نفسي ماكنتش متوتر نهائي بالعكس واخذها بجو أريحية

،و لما تشارك بورقة بحثية في مؤتمر دولى ولغة عربية وانجليزية مش حتشوف لموظفة سفارة عادية جداً ،،

وبارك الله فيك ياخوي على تشجيعك مافيش يأس ولاحاجة حالياً جهزت كل متطلباتهم وبديت في التحصير للتقدم على كندا او واحدة من الدول الأوروبية في حالة ماردوش عليا بعد شهر على أبعد تقدير مش حننتظرهم بإذن الله ،،

والله ولي التوفيق للجميع

رد: مهم لطلبة الدكتوراة للتقدم على التأشيرة

تمام خوي الموفد،،، هذا الكلام الصحيح وما عندي ما نقول فيه

طبعاً أني تكلمت بشكل عام فيما يخص الوضع النفسي، وزي ما قولت مستحيل الشخص يقدر يتصنع كل شخص رح يتعامل بطبيعته...

بس بنرجع ونقولك كل شيء نصيب والخيرة دائماً فيما اختاره الله، لان خير دليل الوضع اللي صايرلي،،، أني تحصلت على التأشيرة من الأردن وفي شهر 11 الماضي،،، وأني لن توا موجود في ليبيا ومسافرتش، وما أعتقدتش أنسافر قبل شهر 5 القادم، ومتندريش ع الظروف مرات الواحد ما يصيرلاش من السفر نهائياً،،، وهذا كله قدر الله ولا إعتراض عليه...

بس مش عارف عندي نصيحة لو تفكر في بريطانيا مرات أفضل حتى من كندا،،، أني الأول لو صارلي وأمشيت لأمريكا رح تكون في الغالب كورس لغة وبعدها بنغير الساحة لاوروبا، لإعتبارات عديدة ممكن الواحد يتكلم عليها في مناسبة أخرى....

خوذ قرارك براحتك،،، وتوكل على الله...

_______________________________

ومن يتق الله يجعل له مخرجاً

ويرزقه من حيث لا يحتسب

رد: مهم لطلبة الدكتوراة للتقدم على التأشيرة

ان شاء الله ربي يسهلك ياخوي اسماعيل وتتحصل على الجواز وتمشي امورك ، كله بأمر الله

وحتى اوروبا فيها أماكن قوية دراستها ومتعاونة مع العرب بس عيبها في تعدد اللغات لو بعدت عن بريطانيا

وعلى قولتك الواحد مزال مش معروف النصيب وين ،، واحتمال يجمعنا يوم من الأيام ونترافقوا في امريكا او اوروبا

لك تحياتي الصادقة

رد: مهم لطلبة الدكتوراة للتقدم على التأشيرة

موفد النسيان كتب:

ان شاء الله ربي يسهلك ياخوي اسماعيل وتتحصل على الجواز وتمشي امورك ، كله بأمر الله

وحتى اوروبا فيها أماكن قوية دراستها ومتعاونة مع العرب بس عيبها في تعدد اللغات لو بعدت عن بريطانيا

وعلى قولتك الواحد مزال مش معروف النصيب وين ،، واحتمال يجمعنا يوم من الأيام ونترافقوا في امريكا او اوروبا

لك تحياتي الصادقة

أكيد نتشرف برفقتك يا طيب

وربي يوفق الجميع إن شاء الله

_______________________________

ومن يتق الله يجعل له مخرجاً

ويرزقه من حيث لا يحتسب

انتقل الى:

صلاحيات هذا المنتدى:

لاتستطيع الرد على المواضيع في هذا المنتدى

ملتقى الطلاب الليبيين للدراسة في الخارج، اخر قرارات الإيفاد، التفويضات، إدارة البعثات

مهم لطلبة الدكتوراة للتقدم على التأشيرة

descriptionمهم لطلبة الدكتوراة للتقدم على التأشيرة

descriptionرد: مهم لطلبة الدكتوراة للتقدم على التأشيرة

descriptionرد: مهم لطلبة الدكتوراة للتقدم على التأشيرة

descriptionرد: مهم لطلبة الدكتوراة للتقدم على التأشيرة

descriptionرد: مهم لطلبة الدكتوراة للتقدم على التأشيرة

descriptionرد: مهم لطلبة الدكتوراة للتقدم على التأشيرة