نصيحه جزاكم الله خير

السلام عليكم خوتي
لو سمحتم انا مسافر ان شاء الله اوتاوا الشهر هذا نبي نصيحه شن نرفع معاي من ملابس وشن هيا الملابس في الصيف او اشياء اخري مش متوفره غادي ونبي اسم فندق ننزل فيه لين نحصل سكن
وبارك الله فيكم خوتي

وعليكم السلام ورحمة الله
اخي بالنسبة للأسئلة الأولى ليس لدي اجابة ولكن يمكنني افادتك من ناحية الحجز في الفنادق هذا موقع لأرخص عروض الفنادق في العالم كل ماعليك هو ان تكتب اسم المدينة التي ستنزل فيها ويعطيك قائمة بارخص عروض الفنادق فيها ويمكنك الحجز اون لاين اذا كنت تعرف موعد وصولك بالضبط
http://www.hotwire.com/hotel/
وفقك الله

مشكور اخي بارك الله فيك

السلام عليكم: اولا ان شاء الله توصل بالسلامة اخونا anes o azzabi ثانيا بالنسبة للحاجات اللي ترفعها معاك اول حاجة صلايتك ومصحفك، وطبعا اكيد طنجرة الكسكاس وبالنسبة للكسكسي متوفر هناك ولكن صناعة كندية كما ممكن ترفع القهوة والقليل من التوابل ما يكفي المدة الاولى لحين ان تعرف اماكن بيعها واذا كنت من محبي الزميطة زالبسيسة ممكن ترفع معاك ما اتمشي بيه الايام الاولى، الملابس طبعا الشال والطاقية من الاشياء المهمة لأنهم لحد توا ماشاء الله المطر والبرد في الليل كذلك البالطوا ضد المطر بالنسبة للكنادر فمن الاحسن انك متكترش وتشري من غادي افضل بس طبعا ممكن السبيدروا العملي تمشي بيه من هني، ولو ماشيين معاك العيلة مثلا لا تنسوا ملابس المحجبات الصيفية والاوشحة، كذلك نقطة مهمة جدا ان صديقتي توا ليها شهرين غادي وقالتلي ان اجهزة النقال اللي ماشي حالها غادي الايفون والافضل انك تشريه من غادي ارخص ولما سألتها على السامسونج قالتلي ممكن ولكن يبيله شحن 80$ كل شهر!! ارفع معاك الاب توب وراك تنسي الاسئلة السرية للايميل ورتب كل اوراقك من توا وحط نسخ من كل مستنداتك في الفلاش وارفع صور شخصية، ولازم ترفع معاك كاش اتمشي بيه لين تنزلك المنحة راهوا تتأخر ومن غير فلوس ما يعرفك حد، ومن المهم انك تراسل المكتب وتبلغهم بموعد سفرك وتتأكد ان اسمك وصلهم. نصيحة ماتكثرش من الملابس راهو غادي ايديروا في تنزيلات دايما ممكن تشري بعدين، اتمنى لك رحلة ميسرة وان شاء الله تكون غيرت على الدرجة الاولى لأنها اريح ويعطوك وزن اكثر.

جزاك الله خير اختي
بصراحه انا ماشي بروحي والتطيب بالهون ان شاء الله خير وخلاص
معليش اختي تقصدي تلفوناتنا ميمشوش غادي. ?
لان انا عندي اي فون كان هذا خلي نخليه لخوي وخلاص ويعوض عليا ربي كيف شاريه

وبالنسبه للسكن مخليها علي الله وان شاء الله ربي يسخرلي حد يساعدني
وبالله معليش بالنسبه للصيف ناخد معاي سواري وتشيرتات ولا صيفهم زي الشتاء عندنا ?
وبارك الاه فيك

السلام عليكم: اخي لو تليفونك اي فون 100% ماشي حاله بإذن الله، وبالنسبة للسكن ممكن في الاول تنزل في شقة فندقية في حدود 80$ لليلة وفي هالمدة ادير جهدك وتدور على شقة مناسبة لك ومدامك ابروحك ان شاء الله مافيش مشكلة قصدي انك اخف من اللي رافع العيلة معاه.
اللبس: صيفهم معقول اني نعرف دكتور قالي اني كنت نطلع بالبدلة عادي بس عندهم المطر في الصيف خاصة شهر 7 والبرد في الليل طبعا هما مراكزهم كلها بالتدفئة المركزية يعني ادير حسابك لو بتطلع حط فوق لبسك العادي جاكة او بالطوا ضد المطر، ولين ما ايجي الشتاء ننصحك اشري من غادي لأن عندهم البواط والبالطوات اللي تمشي مع جوهم وطبعا الشال والطاقية اللي نازلة على الاذن وربي ايسهلك امورك

السﻻم عليكم..ننصحك خوي ماتجيبش معتك من ليبيا غير الماكلة الليبية كي البسيسة والزميطة والقديد هدي هي الحاجة الوحبجة اللي ماتلقاهاش هني بعد امك وبوك وخوتك...راهو كل شئ متوفر واحسن من في ليبيا..هدي نصيحتي وماتكترش حوايج غير متاع لبستك في الطريق بعد توصل اتحصل خير من اللي غادي وجودة وتخفيصات هني اسبوعيا تقريبا

الله يبارك فيك زمرده وان شاء الله في مسزان حسناتك
بصراحه استفدت من كلامكم
مشكورين جدااا

السلام عليكم: توصل بالسلامة خونا وان شاء الله ربي يفتحها قدامك وايسرلك كل الخير في طريقك