المكت الكندي سيقفل شهر6

اخبار شبه مؤكده على ان الدكتور الطاهر بن طاهر سيتولى مهمام المحق الثقافي في كندا بتداء من شهر 6

الكلام هدا سيئ ام جيد بالنسبة للطلبة الليبين يعني هل يعود بالنفع او بالضرر للطالب الليبي

من يقولك....ربي يستر...الطلبه الي في كندا يقولوا المكتب خير...والطلبه الي قعدين في ليبيا يقولوا يغيروا خير....والخيره فيما اختاره الله

ضاع الضفدع في الظلام والطلاب هم الضحايا
هذا بدل ما يحلوا المشاكل جذريا يزيدو يعقدوا فيها
حسينا الله ونعم الوكيل
طاهر بن طاهر ما كان وزير التعليم في سابق شن دار
مادرش حل لطلاب كندا وامريكا
الناس المنحتهم مقطوعه لعندا توا مقطوعه والمرفقين الي الان مايقروش وووووووو
كان يبي يمسك الملحقيه شن يبي يدير من حل
خلو الناس الي تفهم في مكانها وحلو مشاكلكم من الوزاره
وزير التعليم الي يبيله تغير مش المكتب الكندي
والله تعبولنا نفسيتنا لا عرفنا نقروا ولا عرفنا نجروا جرت المنحه المقطوعه, والمشكله القوائم الطلبه المقطوعه عليهم المنحه عندهم من يوم 17/1/2014, شنو يستنوا مش عارفه هل قاعدين يستنوا لعندما يشوفوا طالب ليبي قاعد يشحت علي الطريق بيش يلقي ما ياكل ويدفع اجار سكنه,باهي ان الجامعه ما طردتني من الدراسه ,الله لا يسامحهم دنيا واخره
حسبي الله ونعم الوكيل

قمة التناقض... من الطلبة الموجودين في كندا بعد قرار إلغاء التعاقد مع هذا المكتب طلع المكتب كويس؟؟!!

والله الواحد معاش يعرف شني يقول بعد السلام الا ربي يسهل الامور علي كل الموفدين المشكله ان المكتب الكندي يمكن تكون المعامله اللي يعامل بيها في الطلبه تغيرت حسب كلام الطلبه القدامي لاكن كان لا يفرق بين الليبين . لاكن لم مكان زي هذا يشده واحد ليبي معناه تبدأ الواسطة رالمحسوبيه والمعارف واللي معنداش ليه رب كريم والحمد لله

الله يستر

يقال علي اخبار الموفدين اللي غادي انه المكتب الكندي افضل من حيت الخدمات من لما كان علي ايام الملحقية

بس في الاونة الاخيرة الضغط ممكن اصبح كبير عليهم وودلتنا الموقرة والفضل في اللي تحتهم السلطة والتنفيذ مقصريييييييييييييييييين بما فيه الكفاية حتي ولو يشوفو في ارواحهم دارو جهدهم ...لانه الساحتنين هدو بالدات كندا وامريكا اغلبية المشاكل فيهم ومافيش حاول ليها غير تداكر للطاهر بن الطاهر والزبير والطالبي لكندا والوفد المرافق ليهم بلا اي جدوي تذكر

واخبار انه الطاهر بن الطاهر سيتولي مهام في كندا خوي دحنوس ...بنسبة 80% الخبر مؤكد ... كان توليه للمحلقية في الصين ... فــ استغني عليها ورفض الانتقال غادي .. بحكم ظروف عنده الله اعلم وواحدة من الاسباب مش الرئيسية .انه ابنه في قرار 496 الجديد اللي في المواصلات طيار واختارله كندا من البداية لغاية في نفس يعقوب في الوقت اللي كانت فيه كندا وامريكا من الساحات الملغية للطياريين حسب قرار وزارة المواصلات وترشيحهم ..الحصلة مش هدا المهم ..... المهم انه الموفدين كان الله في عونهم غادي وفي اي ساحة حتي لو تابع المكتب الكندي خدماته ومهامه وهذا اللي لا اعتقده عن نفسي ... عاجلا ام اجلا حيلغوه.

الاعتصام يوم 30 ممكن بسنبة 30% حيكون ليه نتائج .. لانه مافيش تجاوب لا اللي هني حاسيين باللي غادي ولا اللي غادي قادرين يديرو حاجة ..الموفد الاجديد اول سؤال يسأله شنو توقيف المنحة حتي علي الجدد ؟؟ ياعني لو لا معناها معاش ليه علاقة ... والموفد القديم لاهي في همه والله غالب ... هذا ماينعش انه بنسبة 60% موفدين ليومنا هدا مانقطعش عليهم المنحة ولا تعطلت وامورهم ماشاء الله مانخدهمش بالعين ومرافقينهم يقرو وصغارهم امورهم تمام وكندا تعتبر ليهم جنة الله علي الارض ...


ربي يكون في العون والطريق محفوفة بالمشاكل والاعضاب والتوتر وورقة هني وورقة غادي وتوقيعة فلان وصرف علان وتغيير تاريخ وتمديد مدة وقفل ملف هني وفتح ملف غادي وزاد عليه وليد والمرافق بيغير المدرسة .... الله المستعان ....كلهم مشاكل طبيعية والطبيعي اكثر انه نقولو الحمد لله بقلب راضي وواتق في رحمة الله مسهل الامور .