خوي ابن الجبل الغربي إليك بعض المشاركات من الإخوة المبتعثين في الساحة البريطانية:
Khalil Az: شروط التمديد انك تكون معيد ومرشح من قبل وزارة التعليم أو غيرها.. تكمل مرحلة الماجستير قبل انتهاء المدة المخصصة لك. يكون تقديرك اثناء التخرج كويس..
همى اللي توا متفكرهم
Zizo Sonima : بارك الله فيك..
بس استفساري لو اني كملت واستلمت شهادتي و قدمت عالتمديد عن طريق الملحقية فهل نقدر نقعد في بريطانيا و نستلم المنحة لعند ما تجيني الموافقة او لازم نقفل الملف و نروح و نجري عالتمديد من البعثات في ليبيا ؟
Khalil Az : على حسب علمي لين يصدر قرار التمديد
Zizo Sonima : يعني مش حيوقفوا علي المنحة؟
Khalil Az : ماهو انت لما يبقى ليك مدة من مرحلة الماجستير بتمشي تقدم على الدكتوراء والافضل انك نبدا تقرا من الشهور اللي بقوا من الماجستير وتراجي لين يطلع قرار التمديد...والمنحة بالزبط مش عارف هل توقف ولا لا...
Poja jaja : المفترض ان المنحة ما توقفش تستمر طالما مازال عندك مدة متبقيه و طالما ما سكرتش ملفك و ما قمتش باعلام الملحقية بانتهاءك و استلامك لشهادة الماجستير بس التمديد و التنسيق للموضوع هدا يتم عن طريق المشرف متاعك و انت و حظك يا يكون معاك متعاون يا ينوى الكفر .. ربي يسهل ع الجميع ...
Zizo Sonima: انا رح نخلص و يكون باقيلي 14 شهر من مدة الماجستير يعني فترة طويلة.. بس خايف يقصوا علي المنحة و نتورط؟
Poja jaja : نو نو انت توا ما تقولش كملت و اجري علي قبول للبي اتش دي بعد تحصل القبول و توتي اوراقك تمشي للملحقية و تطلب انه يديرولك رسالة تمديد و من حقك طالما متبقي عندك فترة طويله بعد ما تصدر الرسالة تبعتها لليبيا و يبدأ الجري من غادي.. بس المدة كافيه اللي عندك عشان تكمل موضوعك ان شاء الله و ربي يسهلك
نجمة الاستقلال : على حسب علمي ان المنحة تصرف على حسب المدة المكتوبة في القبول الاكاديمي يعني حتى لو مكملش الطالب دراسته خلال 12 شهر حتتوقف عليه المنحة يعني نفس المعاملة فترة اللغة ....وان شاء الله هذا الكلام غير صحيح
Abubaker Rfida : ايامات قبل المنحة لا توقف حتى لو خديت الشهادة لكن توا حيوقفوا عليك المنحة بعد ما تاخد شهادتك وحتى ولو عندك مدة مش حينزلولك شى لين اتجيب تمديد للدرجة اخرى
هذا الحوار جرى بيني و بين المشتركين في صفحة الطلبة الأكادميين و من خلال ما جرى من حديث تبين لي ان هناك تباين في الآراء ( هذا ينفي و هذا يؤكد) و حقيقة لا نستطيع ان نبني عليها آمالنا.. فلننتظر فقد نجد من يسقينا بالأخبار من هو على تجربة و يساعدنا في الاجابة على هذه التساؤلات.. حاول ان تجد طلاب ليبيين يدرسون في جامعتك و اسألهم و اذا علمت منهم شي لا تبخل علي به.. وانا اعدك اني سأبحث وسأعود إليك و اطلعك عن اي شيء اتوصل اليه..
إلى لقاء جديد..
