بخصوص مقاطعتي اونتاريو ونيوفاوندلاند في كندا ااااااااااااااااااااااااا

السلام عليكم جماعة كندا بالله انا نبي نسال علي مقاطعتي اونتاريو (Ontario) , والثانية نيوفوندلاند (Newfoundland)
وسوالي كالتالي :
اي ولاية افضل من ناحية المميزات وبعدين نبي ارخص المدن اللي فيها يعني من حيث المعيشة والسكن اللي عنده تجربة او عايش فيها او سامع عن مميزات احدي المدن اللي فيها من ناحية المعيشة والجو والسكن ياريت يفيدني وكذلك العمل
انا مش طالبة موفدة بس نبي نهاجر لان عندي الجنسية ومحتارة بين المقاطعتين هذينا ياريت تفيدووووووووووووني ياقوم

ومشكورين جدا وياريت تفيدوني اليومين هضوما لاني مسافرة في شهر اغسطس كان سخر ربي
شكرا لكم

طــــــــــــــــــــلاب كندا ياريت اجابة في اسرع وقت

بالنسبة لمقاطعة اونتاريو افضل من عدة نواحي واهمها كثرة الجامعات فيها و المدن الكبيرة في اونتاريوا فيها مراكز لغة قوية و عندهم خبرة في التعامل مع الطلبة الاجانب اضافة الي قربها من بعض اما نيو فاوندلاند فهي في الشمال قليلا عن اونتاريو يعني الطقس حيكون قاسي و بارد اضافة الا ان الجامعات قليلة حسب علمي جامعتين او ثلاثة معروفة و بالنسبة للمعيشة فتقريبا متشابهة مع فروقات بسيطة والله اعلم

تسلم ياخويا بارك الله فيك علي الاجابة بس سوال اخير انا قررت اني نهاجر لمدينة لندن في اونتاريو
هل في حد عنده معلومات علي المعيشة فيها وهل بالضرورة نحتاج نشري سيارة ولا لا
ولو نبي ندير رخصة قيادة  هل نجيب معايا رخصة دولية من ليبيا ولا تنصحوني نديرها غادي
ولا مش محتاجة اساسا سيارة في الشتاء
عموما نبي نعرف  هل المعيشة تكفي في كندا بمرتب 2400 دولار شهري ولا لا
مع العلم اني مش موفدة انا بس عندي الجنسية ونبي نهاجر يعني مش حنكمل دراسة من الاساس
ياريت الاجابة لو تكرمتم

لا تفضلي اي حاجة نعرفها حنجاوبك مانعرفش الأخوة والأخوات مش حيقصروا ، بالنسبة لمدينة لندن اونتاريوا يشكروا فيها ناس واجدين بس انا عمري ما مشيتيلها بس نعرف ان سعوديين واجدين فيها وهي مدينة صغيرة والحياة فيها أرخص من تو نتو او اوتاوا بالنسبة للسيارة انا في رأيي ماتحتاجيهاش بس كل واحد عنده نمط حياة معين انا مثلا افضل المواصلات العامة لانها تتيح فرصة كبيرة للاختلاط والتعرف علي ناس من ثقافات مختلفة وبالتالي فرصة أكبر لتحسين اللغة بالمحادثة ، المواصلات بصفة عامة جيدة في كندا بالنسبة لموضوع الرخصة فلا اعلم ممكن غيري يفيدك وبالنسبة لمرتبك اللي قلتي عليه يعتمد هل انت لوحدك او متزوجة وهل فيه عندك أطفال او لا بس بصفة عامة لو لوحدك كافي علي ما اعتقد والله اعلم

اشكرك جدا علي اجابتك اعتقد ان لندن ستكون مناسبة باذن الله بناء علي اجابتك
وبالنسبة للمعيشة هل تكفي ام لا؟
نحن اسرة مكونة من ثلاث اشخاص فقط هل بهذا المبلغ تكفي معيشة وايجار سكن ؟
اشكرك جدا علي اجابتك وسرعة ردك

العفو أختي الفاضلة بالنسبة للمبلغ هذا اعتقد كافي لو بتشدوا علي يدكم شوية في الصرف الأشجار في حدود 700-900 دولار كندي تقريبا ويعتمد كذلك علي عدة عوامل منها نوع السكن والمكان وهل محتالين باركي للسيارة او لا يعني عدة عوامل والباقي حتصرفوه مصاريف أساسية الصينيين مثلا يكفوا فيهم 800-1000 دولار في الشهر والسعوديين 3000-4000 في الشهر انا مثلا عائلتي مكونة من ثلاث أشخاص نصرف من 2000-2500 دولار في الشهر

قصدي الإيجار وليس الأشجار مش عارف كيف جت الأشجار هههه وفيه حاجة أخري نسيتها هي لازم ما تجيبوا معاكم مبلغ في البداية يكفيكم الي ان تحصلوا شقة والايجار عادة يبدوا مع بداية كل شهر يعني يفضل تجوا في آخر الشهر بيش ماتقعدوش فترة طويلة في الفنادق لانها غالية ومتعبة للعائلة وكذلك الشقة حتستلموها بدون اثات فتبيلكم مبلغ لتأثير الشقة

شكرا عزيزي كلك ذوق بارك الله فيك علي الاجابات الشافية وربي يوفقك في دراستك يارب

السلام عليكم..

طالما طرحتوا موضوع المصاريف والتكاليف. ممكن نعرف منحة الطالب الأعزب كم شهريا .. والمتزوج كم بعد إذنكم..

ماعندناش فيه جميل يا أختي ملاك اني استفدت كثيرا من هذا المنتدي المحترم فجي دوري نرد الجميل وتساعد إخوتي وأخواتي الليبيين ان شاء الله ربي يوفقك حتي انت ويعاونه وبالنسبة لمنحة المتزوج + 1 هي 3600 دولار كندي بس الأعزب والله ماني عارف يا خوي lLapsis

انا ليست لدي خبرة ولكن أنا أعلم أن بريتش كولومبيا هي الأفضل في الطقس فهيه دافيئ

لكن لا تنسى أن بريتش كولومبيا تقع ف أقصى الغرب

انا ليست لدي الخبرة في الحصول على التأشيرة

بريتش كولومبيا ادفأ قليلا من أونتاريو بس غالية جداً الحياة فيها و فيها جالية صينية كبيرة جداً فواجدين ما يفضلوش فيها إضافة الي بعدها لانها في اقصي الغرب

اختيار لندن اونتاريو اختيار موفق في نظري اجار منزل في حدود 700. اعتقد ان 2400 في الشهر ايكفوا لعائلة 3 اشخاص بالراحة.
سيارة على حسب تعتبر وسيلة رفاهية اكتر من انها شي اساسي بحكم توفر المواصلات

شكرا للاخ faredtsbc وللاخ Mr. cold علي اجاباتكم وربي يوفقكم يارب وفي ميزان حسناتكم

العفو اختنا ملاك لو عندك اي استفسار اسألي في اي وقت وربي يوفقك حتي انت ان شاء الله

السلام عليكم اخوتي الافاضل
عندي استفسار بخصوص كليات الزراعة فى انتاريوا اللي فيها دراسة دكتورارة و تحديدا علم المحاصيل او حتى كندا بصفة عامة واللي عندا فكرة على شروط القبول بالله فيدوني و في ميزان حسناتكم ان شاء الله

جامعه البرتا فيها دكتوراه في المحاصيل تحت تخصص الزراعه
جامعه غويلف في اوناتاريو فيها تخصص محاصيل تحت الزراعه
بالنسبة لمعدل الماستر يبو 80 في الميه وايلتس بالنسبة لالبرتا 6.5 وبالنسبة لغويلف يبو 75 في الميه لمعدل الماستر وايلتس بالنسبة لغويلف 6.5