منحة شهر 6 هل من جديد ؟؟؟؟

نحن في حاجة ماسة للمنحة ، تعطلت وتأخرت .

الله المستعان والله اكبر على المسؤولين وربى ينتقم منهم واكثروا من الدعاء فى الشهر الفضيل على الظالمين اللى اتصرفوا فى منحة الطلبة بدون وجه حق بحجج اتضحك قرطاسية وماادراك ..... اللهم عليك بهم فى هالشهر الفضيل وانتقم لكل طالب يالله يامجيب الدعاء

السلام عليكم ورحمة الله

اليوم اتصلت بسامى امتاع المالية
قالي يادكتور لسه الفلوس ما قتش ؟

مع انهم قبل اسبوعين او ثلاثة قالوا حينزلن بعد شهر 5 طول ؟؟
منو عنده معلومات اكثر ؟

قوله حتيجي بس انت مش واخد بالك يابرنس ههههههه والله ياخوي كلمته الاسبوع اللي فات قالي الاسبوع الجاي عل الاسبوع هذا حتنزل خودها مني بالتريس بلاعيط وكذابين متصدقهمش

المشكله في المستشفيات ايضا واقفين العلاج

والله يكون في عون الطلبة

وتقريبا المشكله في ليبيا وليست في مصر في موضوع الراتب بسبب الاوضاع القائمه هناك الله يكون بعونهم جميعا

لاخوي المنحة من شهر واحد لشهر 6 متحولة لعندهم لكن هما تصرفوا فيها وصرفوا منحة شهر 5 و6 وبالنسبة للنصف الثاني من شهر 7 ل12 حتى هي تحولت الاوضاع مليهاش علاقة لكن هما حرايمية وكذابين

والله ياخوى ولد جادو جبت المفيد وهما حرايمية ونصابين وكذابين جرى فيهم دم لمصاروة فى التزوير والغش والكذب والنصب والاحتيال

تصرفوا فى منحتنا اللى هيا من حقنا 5.6 وسرقوها من غير حشم . مايتحشموش سرقة ونصب وكذب قدامنا

اليوم كنت غادي
المهم م الاخير قالوا لي ولاكثر من شخص ثاني الرصيد صفر
والله ما في فلوس ومش معروف لامتى وانت شايف وضع ليبيا توا
مش عارف الحق
اللي اسمع عبد الناصر من قبل ثلاث اسابيع والله قالي حرفيا
الاسبوع الجاي شهر 6 ينزل ومعاش تسال بعدي حد وخود مني الكلام !!

الكذب مشكلة والله الحق

شهر 6 نزل حسابي في المصرف منزلينه لكن المنحة بالنبه ليا تنزل ناقصه 250دولار باستتناء شهر 5 نزل 1000 دولار بس وشهر 6 نزل ناقص 250دولار حتى هو مش عارف ليش. علاش يخصمو كان فيه حد منكم عارف؟

انت غالط خوي سليمان
شهر 5 اللي نزل
شهر 6 مزال

موفد من ليبيا كتب:

انت غالط خوي سليمان
شهر 5 اللي نزل
شهر 6 مزال

اني والله لقيت فلوس نازلات لحسابي كانك متأكد مانزلش ممكن هما غالطين. بالنسبة لشهر 5 نازل كم فترة ياخوي مش توه.  

حسبنا الله ونعم الوكيل...اللي فهمتا من حواركم ان مافيش فلوس...وان مافيش منحة حتنزل ...ومافي حد عارف امتي تنزل...وانهم مخانب الملحق يكذبو علينا و يمشو فينا الاسبوع الجاي والاسبوع الجاي و هكذا...كيف الحل؟...انا صاحب الشقة الي اليوم حلفت ليه ان هذا الخميس بنعطيه الايجار... لازم من حل... مخانب الملحق امورهم تمام ونحنا عالقييين... حسبنا الله و نعم الوكيل... يا خوتي اذا في اي حد عنده كيف يكلم طرابلس او عنده معارف في الملحق يحاول يجيب لينا الخبر اليقين بالله عليكم...

lavander2020 كتب:

يا خوتي اذا في اي حد عنده كيف يكلم طرابلس او عنده معارف في الملحق يحاول يجيب لينا الخبر اليقين بالله عليكم...

   تي وين عايش ياراجل... البعتات مصكره من اكتر من اسبوعين وقالوا الفتح بعد العيد.. بعدها طرابلس خاشة بعضها والعه حرب والطرق مصكره وتقولي اسالوا طرابلس. تي همه حتى الجامعه وقفت لمتحانات. شكلك لابد في شقتك ولا تسمع ف اخبار لا شي  

ربنا يفرج...ان شاءالله.

انا خديتها من قصيرها وروحت ليبيا الفلوس اخر شهر 6 لان عارفهم كذابين كل مرة يقولوا الاسبوع الجاي انا سامي متاع المالية والله اتصلت بيه من ليبيا قالي الاسبوع الجاي عل الاسبوع هذا وكل مرة الاسبوع الجاي ومصار شي هي منحة شهر 7 في الساحات التانية فيه اللي نزلوها وفيه الاسبوع هذا زي بريطانيا احنا شهر 6 قاعد منزلش ووصلنا في 7 والله ماواجعني غير العايلات بس مساكين اللي متزوج وعنده اطفال وراهم ايجار ومصاريف  والعيد قريب الله لاتربحكم ياملحقية وكل موظفينها وحسبي الله ونعم الوكيل فيكم وان شاء الله تلقوه كدامكم وتتبهدلوا زي مابهدلتوا الطلبة

ولد جادو كتب:

انا خديتها من قصيرها وروحت ليبيا الفلوس اخر شهر 6 لان عارفهم كذابين كل مرة يقولوا الاسبوع الجاي انا سامي متاع المالية والله اتصلت بيه من ليبيا قالي الاسبوع الجاي عل الاسبوع هذا وكل مرة الاسبوع الجاي ومصار شي هي منحة شهر 7 في الساحات التانية فيه اللي نزلوها وفيه الاسبوع هذا زي بريطانيا احنا شهر 6 قاعد منزلش ووصلنا في 7 والله ماواجعني غير العايلات بس مساكين اللي متزوج وعنده اطفال وراهم ايجار ومصاريف  والعيد قريب الله لاتربحكم ياملحقية وكل موظفينها وحسبي الله ونعم الوكيل فيكم وان شاء الله تلقوه كدامكم وتتبهدلوا زي مابهدلتوا الطلبة

انتم فاهمنهم غلط........... ياجماعه راهم يبو يدولكم فلوسكم باش يعودوكم ع الادخار. يعني لما ينزلولكم شهر 6 في شهر 10 معناها عندك 4 اشهور رصيد.

يبدو والله اعلم...ان مخانب الملحق ناوييين... يستنو الي ان يتحول تفويض المالي للنصف تاني من سنة... وينزلو منحة شهر 7 ... ومنحة شهر 6... تختفي و نحنا ساكتييين و راضييين... ياموفدييين... لازم نتخدو موقف من هالمخانب... ونديرو وقفة احتجاجية او نطلبو مقابلة سيادة الملحق ... اللي مقعمز في برجه العاجي ...ويتحمل مسؤلية قرارته اللي ورطتنا في سلف و ديون... حتي اللي يبي يروح لي بلاده مش قادر... نبو حق تذاكر و بنسلكو الايجار اللي علينا... يجب اتخاد موقف... وانا اقترح ان يتحدد يوم خلال الاسبوع الجاي... يتجمع فيه اكبر عدد ممكن من الموفدين... ونطالبو بي مقابلة الملحق و لازم ايدير لينا حل... لينا سكوتنا و صمتنا حيجسرهم علينا اكتر.... والله اعلم المرة هاذي اتصرفو في شهريين... يمكن مرة تانية يتصرفو في سنة كاملة.

والله كلامك حق ياخوى لازم انوقفوهم عند حدهم لانهم غلطانين وتصرفوا فى منحتنا وخنبوها واحنى نتفرجوا عليهم وهما يسرقوا فينا وساكتين والمرة هادى خنبوا شهرين المرة الجاية يخنبوا سنة كاملة لاننا رضينا وسكتنا وماوقفناهمش عن سرقاتهم اضم صوتى لصوتك ومقابلة الملحق ويدفعلنا من جيبه

لان كل مانكلمهم يقولوا نستنوا فى التفويضات قلتلهم اما تفويضات التفويضات عندكم من شهر 1 الى شهر 6 والتفويضات يلى تستنوا فيهم تفويضات النصف الثانى من شهر 7 الى شهر 12 لكن الملحق تصرف فى منحتنا وسدد بيهم ديونه واعطاهم مرتبات لموضفينه لمصاروة وهوا قالها بروحه ان التفويضات عندهم من شهر 1 الى 6 بس اتصرفت فيهم وسددت بيهم ديون وقرطاسية للملحقية ولا هاماته معاناة الطلبة سرقة نعتبرها هادى وضحك علينا وعلى عائلاتنا وقعدنا نضربوا اخماسنا فى اسداسنا واغلب الطلبة روحوا وخلوا حقهم بدال مااول ماصار وخنب منحتنا قلبناها فوق روصهم

ياموفدييين... انا اقترح ان مجموعة من منا تحدد يوم و يفضل في بداية الاسبوع يعني الاحد او الاثنين... و خصوصا الموفدين اللي ساكنين في مدينة نصر...لينهم اقرب للملحق... ونتفقو و نتجمعو عند الملحق و نطلب مقابلة الملحق الثقافي نفسه... وحتي ان مش موجود... انحددو معاه موعد... ولازم يقابلنا... و يوضحلنا هالخليطا اللي دارها... ولازم يدبر كيف و يتحمل مسؤلية قرارته... يا موفدييين لا يموت حق وراه مطلب... هذا حقنا...ولازم نطالبو بيه..ياريت كلنا نتعاونو لمصلحتنا جميعا.

السلام عليكم . انا من سكان مدينة نصر وشبه يوم بعد يوم في الملحق او الاتصال بالملحق ذاته لكن للامانة الراجل مش مقصر ومتقولش يعرفه نعتبر طالب جديد وقاعدين في مصر هم ايجار ومصاريف لانه عندي كورسات . المهم اخر شي اليوم انه بعد اجتماع مع مدير البنك العربي مدير البنك طلب رسالة احالة من الخزانة الي المركزي في ليبيا وسوف يصرف لغاية ماتحال النصف التاني . ولكن هذا لا يبرر سلبية الطلبة الموجودين في مصر والله لما نمشي نسأل على المنحةالطلبة قاعدين في الملحق ولا كانه في شي والاموار تمام لكن لابد من الوقفة ولا بصراحة من غير كلام وراء الكيبورد

lavander2020 كتب:

ياموفدييين... انا اقترح ان مجموعة من منا تحدد يوم و يفضل في بداية الاسبوع يعني الاحد او الاثنين... و خصوصا الموفدين اللي ساكنين في مدينة نصر...لينهم اقرب للملحق... ونتفقو و نتجمعو عند الملحق و نطلب مقابلة الملحق الثقافي نفسه... وحتي ان مش موجود... انحددو معاه موعد... ولازم يقابلنا... و يوضحلنا هالخليطا اللي دارها... ولازم يدبر كيف و يتحمل مسؤلية قرارته... يا موفدييين لا يموت حق وراه مطلب... هذا حقنا...ولازم نطالبو بيه..ياريت كلنا نتعاونو لمصلحتنا جميعا.

الخميس مناسب اكثر. لان يوم الاحد او الاثنين يقولولك ما هناش الملحق طالع عمل ميداني. لكن الخميس هو يللي محدده موعد للمقابلة الشخصية والاعلام معلق في الملحقية او مش طلبة يللي في مدينة نصر بس لازم الطلبة يللي في مصر كلهم حتى يللي خارج القاهرة يتحمله هو يوم. ولمعلومتكم ليبيا الوزاره حتى النصف التاني تحول إلى شهر 12 معناها معاش عندهم شي يتغطوا بيه. والموظفين اكدوا تحويل النفص الثاني للمنحة لشهر 12 الجاي