ساعدوني وبالذات موفدين الطب في كندا بالله عليكم

السلام عليكم و رمضانكم مبارك وإن شاء الله ربي يهدي البلاد والعباد يارب

بالله عليكم تفهمو معاي مشكلتي وقولولي كيف الحل

أنا طالبة طب موفدة للدرجة التخصصية .. إخترت كندا وطلعت رسالتي الدعم المالي لغرض القبول ولغرض التأشيرة .. راسلت المكتب الكندي لفتح ملف .. لكن للأسف رفضوني !!! طلبو مني تغيير الإيفاد من الإقامة الطبية إلى كلمة الدكتوراه ( لأنه السريري مقفل في كندا والأكاديمي بس مسموح ) .. رجعت لإدارة البعثات في الجامعة قالولي ضروري تغيري قرارك من البعثات لدرجة الماجستير !!! يعني ننزل من الدكتوراة للماجستير !! بالله عليكم منو صار معاه هكي ؟ وهل مافيش حل إلا هذا ؟ شورو عليا بالله عليكم و ربي يبارك فيكم وييسرلكم كل أموركم

شوف نيوزلندا بالنسبة للتخصصات الطبية هناك جامعه اوتاغو جامعه ممتازة في الطب وكان تبي أي مساعده راسلنى وبالنسبة لكندا امشي شوف مدير البعتات هو الى عنده الراي الأخير يقدر يديرلك استناء واشرحله بانك تقدر تجيب قبول دراسي بالمناسبة انت تبي في كندا تجتاز امتحان الزمالة الكندى وكدلك يكون لديك 7 في الايلتس لكل سكيلز وان شا الله ربي يوفقك

اخي طارق انا ابحث عن قبول اكاديمي في قسم المختبرات الطبية في كندا ياريت تساعدني وبارك الله فيك

بالنسبة للمختبرات الطبية في كندا تحتلف على حسب التخصص الدقيق الى بتتخصص فيه فمثلا بتتخصص في الدم تجده تحت الباتولوجى فلازم نعرف التخصص في المختبرات الى انت تبيه هدا أولا وكدلك المعدل لانه مهم جدا وأيضا مستوي اللغة المطلوب عادة 7 في الايلتس وان شا الله نقدر انساعدك

قدر الله ماشاء فعل.... غيري الساحه وحتلقي اكيد تخصصك يا وخيتي

السلام عليكم ،
اختي طالبه الطب ،نصيحه لوجه الله .
اني طالب في كندا ونحب انقولك حاليا فوتي البعتات وهمهم وركزي في حاجه وحده بس اسمها الايلتس . يعني اقري انجليزي وديري preparation في الحوش وديري امتحانات في ليبيا وحاولي انك اتجيبي 7 مافيش باند اقل من 7 يعني في المحادثه والاستماع والكتابه والقراءه ، وبعدين ديري زي مايقولك البعثاث ان شاءالله يقوللك ارجعي بكالوريوس قولي حاضر ،وتعالي ديري assesment وعيشي حياتك .