السلام عليكم و رحمة الله
أنا كنت في كورس الصيف الماضي في روما يعنى ممكن تكون في اشياء تغيرت
أهم مخاوفي كانت التنقل لكن في النهاية كل شي منظم ممكن تاخذ تذكرة كل مرة تركب فيها المواصلات العامة لكن حتكلفك واجد انما الافضل انك تاخذ تذكرة لمدة شهر او سنة حسب المدة اللى حتقعدها. و تركب بيها الباص و المترو على حد سواء و خوذلها غلاف حماية لانها لو تبهدلت مش حتشتغل في الالة متاع المترو.
المواصلات امنة جدا و توصل لاغلب الاماكن لكن لازم تخلي عندك ورقة فيها ارقام الباصات و اماكنهم الى ان تحفظهم و اول ما تنزل في المحطة الكبيرة (ستاتسيوني تيرميني) في مكتب استفسار اساله عن اى مكان حيجاوبوك.
بصراحة الاسعار مش متذكرة بشكل دقيق فمش حنلخبطك ممكن عضو اخر يفيدك .
خارج روما في القطارات العادية و في الاسريعة اللى ما توقفش الا في المحطة الاخيرة اذا كنت مستعجل و لو قررت تسافر لمدينة اخرى حاول تحجز بدري لانه يكون في عروض و التذاكر تكون ارخص و تقدر تحجز من الالة في المحطة اللى ذكرتها فوق.
بردو ممكن تاجر دراجة هوائية او سكوتر لو حبيت تمشي لاماكن بعيدة عن المواصلات او حتى للترفيه و بمبلغ معقول يعنى السكوتر ب 15 يورو في اليوم و تكون معاك رخصة قيادة و صورة من جواز السفر و مبلغ ضمان لحين استرجاع اللى اجرته. و بردو تلقى اثنين او ثلاث اماكن تاجير في محيط المحطة.
ارجو انى نكون افدت و لو بشكل بسيط و ان شاءالله يفيدوك الاعضاء الاخرين في امور ادق
تحياتي
الرجاء الدخول مساعدة مهمة