البكلاوة الليبية

السلام عليكم ورحمةالله وبركاته
بسم الله الرحمن الرحيم
هدي طريقة البكلاوة الليبية.......نبدأ بسم الله
المقادير:

4 أكواب دقيق + 4 ملاعق زبده لي حاشيت الكاشيك + نشاء + ملعقة بيكنباودر

الطريقه.......

نحطو الاربع أكواب دقيق في كروانه و نحركوهم مع ملعقة البيكنباودر لين نحسوهم تخلطو زين و

بعدين نزيدوهم الاربع كواشيك زبده و نفركوهم في الدقيق لين نحسو الدقيق شربهم و نصبو

المياه شويه شويه و نحركو العجينه لين نتحصلو علي عجينه متماسكه لا هي رطبه ولاهي

كاسحه و نزيدو نعجنوها زين كل معجناها زين كل متطلع أحسن علي العموم نقسمو العجينا الي

طلعة عندنا لي نصفين واحد اكبر من الثاني بي شويه و نقسمو النصفين لي كور صغار أكبر من

البطشه بي شويه و نحطوهم كل 5 مع بعض و نفتحوهم علي شكل دوائر بقطر 5 ألي 6 سم و

نمرغدوهم في النشاء و نحطوهم فوق بعض 5 فوق 5 زي ما قولتلهكم نفتحوهم بالنشابه مع

بعض علي حجم الطاجين و نحطوهم في الطاجين المدهون بالزبده فوق بعض راهو هدو

المجموعه الاولي الي هيا أقل و نحطو المكسرات اللي نبوهم و لي هما الفستق و اللوز و الحب

زقوقي علي حسب الرغبه متاعك و بعدين نجو للمجموعه الكثر و نفتحوهم بي نفس

الطريقه الاولي و نحطوهم فوق المكسرات و قبل ما ننسي نرشو سكر علي المكسرات باش

لما تطيب البكلاوه المكسرات تقعد متماسكه مع بعض و لما نكمل حطان الطبقات الفوقيه في

الطجين متاعنا نجو للقصان و القص لازم يوصل لي قعر الطاجين متعنا و بشكل جميل و أني

نعرف ذوقكم طبعا يا ماما مشاء الله عليه نصبو الزبده السايحه لين تغطي كل الطاجين متاعنا و

نحطوه في الفرن في النص علي درجة حراره 180 درجه ويا ريت أقرب للقعر متاع الفرن و

نخلوها لين تطيب و تتحمر من فوق و نطلعوها من الفرن و نصبو عليها العسل طبعا نغرقوها

بالعسل لي أن البكلاوه تشرب هلبا العسل و نخلوها لين تبرد و تاكلوها بالهني و الشفي أنشاء
الله



صحتيــــــــــــــــــــــــــــــــــــــــــــن وعاااافية

منورة أختنا تفاحة الأخضر وبالتوفيق إن شاء الله نبو حصتنا

يعطيك الصحة البكلاوة بالفلاقي هذي البكلاوة الصح منورة اخت تفاحة وربي يوفقك ويفتح عليك

شن ياتفاحه ابدي وزعي على الاعضاء ليش مازالت في سفرتها الجماعه راهم متحشمين

سمو بسم الله وابدو هيا

صحتين,,,,