اقتحام السفارة

السلام عليكم ورحمة الله
اقتحم الطلاب في الساحة التركية السفارة الليبية يوم الاثنين الماضي احتجاجا على تاخر المنحة وتاخر تسديد الرسوم الدراسية وتوقف التامين الطبي وهو ما يشير إلى وجود تلاعب بالأموال المحالة من ليبيا لتغطية هذه النفقات وغيرها.
ومن المتوقع أن تشهد ساحات أخرى اقتحام سفاراتها خاصة إذا أدى اقتحام السفارة الليبية في تركيا إلى نتائج جيدة بتغيير السفير وتحسين أوضاع الطلبة ونيلهم حقوقهم.

اتمني من طلاب ساحة المصرية...توحد ودعوة لي اعتصام امام سفارة الليبية في مصر...وضعنا صعب جدا...اصبحنا مفلسين لا منحة ولا مصروفات دراسية...لازم من وقفة جادة.

الصبر ياناس .. واالله العظيم وضع البلاد صعب صعب صعب بمعني الكلمة .. المشكلة نشفوا في شبابنا في بنغازي وغيرها تقتل وتذبح والاسر نازحة وضعهم صعب جدا .. ونحنا همنا الفلوس .. يعني لوتأخرت المنحة شوي خلاص يعني انقلبت الدنيا ... لاحول ولاقوة الا بالله

والله ليش يصدرولنا في تفويضات واذونات صرف من الأساس وبعدين يتلاعبوا بالفلوس
والغريب ان البعثات والخزانة لازالت تصدر في تفويضات لحد هذه الساعة

كلامك صحيح يا خوي فيه اولويات بس لو انه المنحه متاع الطلبه تأخرت لانه والله صرفوها على النازحين او حتى الجرحى او يا سيدي في تصليح محطات الكهرباء اللي كل يوم ينقطع اقل شي ساعتين و بعد فترة حينزلوها كان مافيش مشكلة ومتأكده انه مش بس رايي اي طالب ليبي على قلبه زي العسل بس لما تكون الحكاية (سرقه)او حتى تراخي وعدم تحمل للمسئوليه فهدا لالالالالالالالالالالالالالالا مش لازم تسكتوا عليه لانه( المال السايب يعلم السرقه ) و(العيل اللي ما يبكي امه ما ترضعاش)
يعني يا طلبه شدوها بكااااااااااااااا على باب السفارة لين ................

اللي يبي يصبر هو حر . لأنه متريح وعنده بالزايد
لكن يا ريت ينقطنه بسكاته ويوفر النصائح للسفارة والملحقية
صبرنا نفد وفي سرقة ضخمة وحالنا توقف والله اعلم شن يصير . فإلى متى السكوت والصبر يا طلبة ؟ والله ما في حد سائل عن معاناتكم . يا تفعلوا شيء يا حيجي يوم تلموا فيه سكواتكم وتروحوا ببلاش وتخسروا نسأل الله العفو والعافية

ياراجل اتقي الله ... اي معاناة حسستني انا معزوقين في الصحراء .. ولو تأخرت المنحة ايام معناها سرقة واتهامات بدون بينة .. ياجماعة والله كثير من الساحات لم تنزل منحة شهر 11 الي الان .. ربي يصلح الحال ان شاء الله

يا سلطني : البينة موجودة والحمد لله ما نتهموش عالأبيض
وبعد يكملن فلوسك إن شاء الله توا تشوفها الصحراء اللي تدوي عليها
أنت ما عندكش مشكلة حتى أنا ما عنديش مشكلة وما نيش مستحقلها المنحة في الأخير والحمد لله لكن هذا حقنا وفي غيرك عنده مشكلة ويبي يحكيها ونبوا نشقوا برواحنا.. أنت فيش توجعك ؟!!!
يا راجل خلينا في حالنا واضح أنك متريح ومش تبع الطلبة اللي عايشين عالمنحة فريحنا سلم خي
وإن شاء الله خير

السلام عليكم ورحمة الله.... اتفق مع نظرة الاخ الذي ينادي بالصبر.... الوضع في ليبيا صعب جدااا فوق ما تتصوروا بمراحل... البلاد في حالة حرب... وعليكم بالدعاء وإن الله مع الصابرين

المنحة ليها شهور ومازالت غير منتظمة مش ايام يا صاحبي الله غالب المواد المعملية والمراجع نخلصوا فيها من جيوبنا وما قلنا شي ،والفساد الاداري والمالي ع ودنه ما شاء الله ،لا يضيع حق وراءه مطالب.وربي يهدي الجميع.

وياريت اي واحد ينادي بالصبر يشوف حال الطلبة المتازمين ويحاول يساعدهم خاصة اللي بقريب يكملوا ،وعندهم التزامات واجدة ،منغير مزايدات فاضية وياما منهم .واللي واجعك حال السفارة يتنازل ع المنحة ويورينا .

اولا والله العظيم انا طالب وعايش عالمنحة كيفي كيفكم وأتمني ان تنزل اليوم قبل بكرة لكن يا جماعة الوطن يبي صبركم ويبي ناس تقدر المعاناة .. شهددكم بالله ماكانت المنحة قبل الاحداث الراهنة ما كانت تنزل في وقتها والامور تمام .. لكن بعد الاحداث تأخر المنحة مش علينا بس علي جميع الساحات الدراسية ... وانا مقدر انا فيه ناس عندها صغار وعندها مصاريف كثيرة .. ومحتاجين للمنحه اكثر مني ومنكم .... لكن لا نقول الا ما يرضي ربنا ( حسبي الله ونعم الوكيل ) ..

الملاحظ أنه في ناس ما نشوفوش في تعليقاتهم إلا وقت غضب الطلبة. يهدوا في الأوضاع ويدعوا للصبر على سفارتنا الموقرة لأنها ما فيهاش فساد 800 مليون !!!!
هؤلاء الإخوة تبع من بالزبط ؟!! بصراحة أنا شاك أنهم ليسوا من الطلبة وخايفين من غضب الطلبة ومظاهراتهم لعلها تفسد عليهم شيء

باللهي يللي يقول اصبرو... اوضاع لبلاد حرب.... تي يامكرم الرابع الرابع متحول للسفارة من قبل اربع شهور. شنهي دخل اوضاع لبلاد في المنحة. معناتها تحرض الطلاب على السكوت ع سرقة منحتهم. صح لسانك يا معلم اوضاع ليلاد هي يللي خلتهم يسرقو حقكم ومافيشي من يحاسبهم. وتفضل يامعلم يا ابتوع الصبر الربع لول من سنة 2015 بيتحول اليومين الجاية. وهاضاهي هوه يللي يستنو فيه باش صرفوه ع اساس منحة 11 و 12. وتتأخر منحت شهر واحد زي العاده.  بص رسالة البعثاب يا معلم:
https://www.facebook.com/pages/%D8%A7%D8%AF%D8%A7%D8%B1%D8%A9-%D8%A7%D9%84%D8%A8%D8%B9%D8%AB%D8%A7%D8%AA-%D8%A7%D9%84%D8%AF%D8%B1%D8%A7%D8%B3%D9%8A%D8%A9-%D9%84%D9%8A%D8%A8%D9%8A%D8%A7-/237055433145872?pnref=story

يبدوا أني غلطان ... نحاور في واحد مثل mawami ياراجل خليك قد المناقشة وخلي المحاوره ممتعة .. مش كل مرة تقعد تتهم .. انت من وانت منين ...... الخ.. ملينا ملينا ملينا ثم ملينا من هذا الاسلوب ... ولكن موش حنقعد زيك ... احكي كيما تبي تحكي .... والسلام عليكم

إخوتي الحقيقة التي لا شك فيها أن الربع الاخير تحول للسفارة. من زمن. وأيضا مما لا شك فيه أن هناك طلاب ظروفهم صعبة. لان منهم من هو مقيم في مصر ثلاث سنوات او اكثر ومعتمد على المنحة اعتماد كامل. ولكن ايضا صراحة لا يمكنني أن اتهم أحد بالسرقة. لأن ما تم تحويله في الربع الاخير لسنة 2014 لم يشمل مصاريف التأمين الطبي ولا العجز السابق الذي يقد بـ10 مليون أو اكثر. لكن لو صح ما نشره ديوان المحاسبة من تحويل 800 مليون دولار للسفارة في مصر سنة 2012 وهو مبلغ زائد على مستحقات جميع مصاريف الطلبة والموظفين. فمعنى هذا أن هناك تلاعب فعلا. أما الملحقية فأنا أجزم أن د.محمد الوليد لم يمد يده لدرهم حرام. وأنا والله لا أعرفه لكن الرجل يشهدون له بالنزاهة والتقوى. وتنظيم الملحقية وعملها أرقى وأدق وأحسن بكثير من السفارة. هذا ما لحظته.
فلعل الخلل في السفارة. وأيا كان الامر فمن حق الطلاب المطالبة بحقوقهم. ولا علاقة للمنحة ومصاريف الدراسة بمجريات الوطن.
ورأيي أن الزاوية الاولى التي يجب اصلاحها أو إزالتها نهائيا هو اتحاد الطلبة. وان كان هناك تجمع او اعتصام فليكن في مقرهم قبل السفارة والملحقية. لانا لم نلمس منهم اي عمل. هذا رأيي.

لابد من خلع الباب واقتحام السفارة واسقاط الجميع بما فيهم الموظفين .. لان الربع الأول من عام 2015 بيتحول اليومين الجاييات وانتم يا حبايبي راحن عليكم شهر 11 و 12 لابد من استخدام القوة حتى ناخذوا شهر 11 و 12 وشهر 1 و 2 و 3 في السنة الجديدة 2015

الموضوع لا يحتاج أكثر من حضور وتجمهر. وسيكون للاعلام دوره. ومازلت عند رأيي. وأرى أن اهم خطوة هي اتحاد الطلبة

اعضاء منتدي الموفد في ساحة المصرية...كلنا قاعدين نعانو عدم نزول منحة شهر 11 و 12...ولينا نحنا المتضررين علينا تحرك و ضغط و المطالبة بي حقوقنا صمتنا و رضنا هو اللي خلا الملحق و سفارة لا يبدلو اي مجهود لي حل ازمتنا...لهذا...وجدت صفحة في الفيس للطلبة الليبية في مصر...وحاطين اعلان عن وقفة احتجاجية للمطالبة بي منحتنا و ايجاد حل نهائي لهذه المشكلة و الوقفة حتكون يوم الاحد القادم عندا الملحقية...وعلي فكرة قصة انهم ينزلو نص شهر هذي قانونا خطا وليس من حق المراقب المالي ابدا تجزيئ المنحة...لازم كلنا نجتمع و نطالب بي حقوقنا صمتنا و رضنا بالامر الواقع ضرنا اكثر مانفعنا.

lavander2020 كتب:

اعضاء منتدي الموفد في ساحة المصرية...كلنا قاعدين نعانو عدم نزول منحة شهر 11 و 12...ولينا نحنا المتضررين علينا تحرك و ضغط و المطالبة بي حقوقنا صمتنا و رضنا هو اللي خلا الملحق و سفارة لا يبدلو اي مجهود لي حل ازمتنا...لهذا...وجدت صفحة في الفيس للطلبة الليبية في مصر...وحاطين اعلان عن وقفة احتجاجية للمطالبة بي منحتنا و ايجاد حل نهائي لهذه المشكلة و الوقفة حتكون يوم الاحد القادم عندا الملحقية...وعلي فكرة قصة انهم ينزلو نص شهر هذي قانونا خطا وليس من حق المراقب المالي ابدا تجزيئ المنحة...لازم كلنا نجتمع و نطالب بي حقوقنا صمتنا و رضنا بالامر الواقع ضرنا اكثر مانفعنا.

سمعت بالخبر.
وليتك وضعت رابط الصفحة ليطلع اعضاء المنتدي. والحقيقة الملحقية ليست مكانا مناسبا للتجمع لانه لن يؤثر على عمل السفارة ولن يكون في متناول وسائل الاعلام. المفترض ان التجمع في السفارة الليبية في الزمالك. أو أمام اتحاد الطلبة.
عموما غن شاء الله خير.

كل طلبة الليبيين اللي في ساحة المصرية...هذي اسم القروب اللي في الفيس واللي تم الاعلان فيه علي موعد الوقفة الاحتجاجية يوم الاحد الجاي...ياريت كلكم تنضمو للقروب و تجو للوقفة ...واقترحنا بداية الوقفة في الملحقية و اذا لم يتم حل المشكلة حنسكروها و ننتقلو للسفارة ...اسم القروب هو الطلبة الليبيين في مصر...وللاسف ماعرفت كيف ننسخ رابط.

lavander2020 كتب:

كل طلبة الليبيين اللي في ساحة المصرية...هذي اسم القروب اللي في الفيس واللي تم الاعلان فيه علي موعد الوقفة الاحتجاجية يوم الاحد الجاي...ياريت كلكم تنضمو للقروب و تجو للوقفة ...واقترحنا بداية الوقفة في الملحقية و اذا لم يتم حل المشكلة حنسكروها و ننتقلو للسفارة ...اسم القروب هو الطلبة الليبيين في مصر...وللاسف ماعرفت كيف ننسخ رابط.

نعم صحيح. الاعلان منشور على أكثر من صفحة.
وهناك خير بأن جميع مطالب الطلاب في الساحة التركية تم الاستجابة لها. ونزلت المنحة ومصاريف الدراسة أيضا هذا اليوم.

أيها الطلبة المساكين أين المفرُّ؟! والبحر من ورائكم والعدوُّ أمامكم، فليس لكم والله! إلاَّ الشجاعة والمطالبة بحقوككم، واعلموا أنكم في هذا البلد أضْيَعُ من الأيتام على مأدبة اللئام، وقد استقبلكم سفيركم بالأستهزاء ، وأقواتُه موفورة، وأنتم لا وَزَرَ لكم غير حناجركم، ولا أقوات لكم إلاَّ ما تستخلصونه من أيديهم، وإن امتدَّت بكم الأيام على افتقاركم، ولم تُنجزوا لكم أمرًا، ذهبت ريحكم، وتعوَّضت القلوبُ من رعبها منكم الجراءةَ عليكم، فطالبوا بحقوككم...!!

البلاد ضاعت وزادت ضياع فلوس والنقد اجنبي تم استنزافه دراسة بالخارج علاج سياحه عقارات وشعب مهجر والشباب يتقاتل والجهل والفتنة والفقر يتفشى ووووووو،،،، وأنتم تتعاركوا ومصرف ليبيا معاش اي حول في المرتبات لان نعاس توجد سيوله اجنبية ،،، والنفط متوقف هذا حالكم يا ليبيا،،، ضايعا في القبل وضاعت توا،،،، أعطوا البلاد للشباب وسلوا لآرايه للشباب المحنك والتفوا وراء الشباب الناضج الواعي ،،،،المهم ربي اصبركم وردوا بالكم من فلوس كم وماتخلوش حد يسرق كم كما سرقتم من قبل،،،،

الاخوة الاعزاء
انا من طلبة الساحة التركية اريد ان اوضح بعض الامور
اولا
لم يتم اقتحام السفارة ولكن عملية الدخول كانت سلمية لانه تم فتح الابواب رغم وجود الشرطة التركية
تانيا نحن مشكلتنا انه الربع الرابع جاء منقوص من بعض الاسماء التي تجاوز عددها 600 اسم .. وتم ابلاغ الخبير التعليمي بالنقص وان هدا سيسبب عجز في اخر السنة فما كان منه الا ان تجاهل الامر وايضا اسرف في صرف فواتير طلبة معينين ..دون ان ينظر الى من لهم الاحقية ..
مشكلتنا عرفنا مصدرها
الاولى في ادراة البعتاث التي اصدرت الامر بالصرف المدة الماضية و الان بعد الادراج حصل العجز لاننا نعرف ان البعتاث كانت واقفة عن العمل لفترة 3 شهور
السبب التاني كان في الخبير التعليمي الذي لم يحرك ساكن لما يجري للطلبة فبدل ان يذهب و يراجع الخزانة و البعثاث بفى في الساحة يفتن بين الطلبة بين شرق وغرب ..
ولكن الحمد لله .جاء مسعاه مخيب فلقد وحدتنا هذه المنحة اكثر لان همنا واحد
السفارة الليبية في تركيا استقبلت لجنتين من المالية و ديوان المحاسبة عكس ما حصل في مصر التي رفضت استقبال لجنة ديوان المحاسبة خشية معرفة اين تم صرف مبلغ كبير من المال يقدر 861 مليون في سنة مالية
وفقنا الله واياكم وازاح عنا هذه الغمة