دليل الموفد الى كنـــــــــــــــــــدا

الأشياء التي
من المهم احضارها معك




_ القران الكريم




_ ساعة الاذان (( عشان تسمع الاذان في بيتك ))
_ سجاجيد وشراشف صلاه
_تمر سكري
_ قهوه وهيل وبهارات (الماجي موجود- الفلفل الأسود موجود – كل شيء
متوفر...يعني ما لها داعي تنقلون عطار كامل)
_ترامس قهوه واباريق شاي ودلة التفويح للقهوه
_حافظات للأكل (بيني و بينكم...ما لها داعي...لكن كتبتها لأن البعض ما
يستغني عنها)
_ فناجيل وبيالات الشاي
_سفر للاكل اذا حاب (هنا مافيه حتى في البقالات العربيه )
_مترجم ناطق (حاول ما تستخدمه إلا في أضيق الأحوال...يعني مصطلحات طبية أو
قانونية)
_اي جهاز كهربائي تبي تجيبه لازم يكون 110 ( كل كندا 110)
_بخور ومبخره (اذا حاب)
_اذا حاب تجيبون معكم شطاف للحمام الله يكرمك حنا جبنا وقلنا لصاحب البيت
وركبناه بالبيت
_ شهادات التطعيم للأطفال عشان تكملون تطعيماتهم هنا

شحن الأغراض
لكندا




يتم تخزين الاشياء السابقه في كراتين


ويفضل الشحن قبل اخر يوم من المغادره لانها تاخذ عاده من 10 ايام إلى
أسبوعين لين توصل عشان يمديكم تستقرون

توجد شركات متعدده تشحن وتكون عن طريق المكاتب السياحيه

نذكر على سبيل المثال الطيار والمؤيد وهناك نوعين من الشحن ( للمطار او
للمنزل)

الشحن للمطار :

السعر يتراوح بين 8 ريال الى 12 ريال للكيلو بس لازم اول ماتوصل الاغراض
الى كندا تستلمونها فورا لان اي تأخير فيه عليه غرامة وبعد لازم اجار سيارة
عشان استلام الاغراض وتوصيلها للبيت

الشحن للبيت:

السعر تقريبا 10 ريال للكيلو ويتم توصيل الاغراض الى باب المنزل


وجهة نظري: لا تشحن شيء معك، حط الأغراض اللي تبيها في كرتون و جبها معاك.
بتقولون التمر ثقيل، لا تجيب كثير كل ما تنزل للسعودية جب معاك كم كيس و
قضينا. صدقوني..كل شيء متواجد هنا كللللللل شيء. فيه وحدة أعرفها تشحن رز
الشعلان ! تخيلوا بس...و الله فيه أناوع رز هنا تاخذ العقل...اشتروا بسمتي
long grain و هذي أسماء كم نوع


-رز لا جواب <<< لا تدققون بالاسم
- رز تيلدا
و عموما أي رز بسمتي كويس و الهنود هنا وش كثرهم ما شاء الله

احضار
الخادمة:


فيه شروط معينه لاحضارها وهي

- لازم تكون على كفالتكم سنة كاملة ماتنقص يوم واحد.

- خطاب من الكفيل للسفارة يطلب اعطاؤها التأشيرة للعمل.
- رسوم التأشرة + الصور
- لازم كتابة عقد بينكم وبينها باللغة الانجليزية يوضح فيه :
o عدد ساعات العمل اليومية ( 8 ساعات)
o لها غرفه خاصة تسكن فيها.
o لها اجازة يوم في الاسبوع
o لها اجازة سنوية شهر في السنة
o الراتب ويفضل لايقل عن 1500 دولار

طبعا احتمال يسوون معها مقابله عشان كذا لازم تفهمونها هالمعلومات زين

ولازم تحتفظون بنسخة من جميع الاوراق اللي قدمتوتها لان بعد سنة راح
تحتاجونها لعمل التجديد

فيه ناس قدموا على شغالات من كندا....لكن لازم يصير الواحد permanent
residence علشان يقدم و يجي المكتب يقابلكم و باخذ شروطكم بعدين يعطيها
للخدامة و إذا وافقت كتبتوا العقد ( ياخذ له الموضوع 4-6 شهور)


• وجهة نظري الشخصية الشغالة ما لها داعي أبداااااااااااا....يعني البيوت
هنا مو زي السعودية، لا من ناحية كبرها و لا من ناحية طريقة التنظيف...هذا
إذا ما عشتوا في شقة بعد. و إذا مررة ما تستغنون عن الشغالة...فيه خادمات
تتفقين معاهم على مرة بالأسبوع و مرتين يجون ينظفون لك.


و هذا موقع لشكة تنظيف على سبيل المثال لا الحصر...و اللي يبي شركات ثانية
يقول لي عن المدينة و الولاية و أنا أجيب لكم معلومات أكثر


Molly Maid

http://www.mollymaid.ca/

المستشفيات
في كندا







عند الوصول إلى كندا لازم تطلع لك بطاقة تأمين صحي لك و لعائلتك. كل ولاية
لها نظام تأمين مختلف. علشان كذا ما راح أحط موقع التأمين الصحي لكل
الولايات، لكن هذا موقع ولاية ألبرتا لتأمين الصحي



www.health.alberta.ca


و التأمين الصحي يغطي تقريبا كل شيء ما عدا الأسنان إلا في أضيق الحالات،
لكن الملحقية تعوضك على كل شيء بخصوص الأسنان ماعدا التقويم و التبييض. و
التأمين الصحي ما يغطي بعد فحص النظر و عمليات الليزر و الليزك و لا يغطي
الأدوية.

لما تروح تطلع تأمين صحي يلزمك ال study permit و جوازك.

الرعاية الصحية في كندا مستواها عالي جدا ، و فيها ميزة إن التأمين فيها مو
زي أمريكا ( صرت زي الكنديين لا بغوا يثبتون تطورهم في شيء قالوا ترانا
أزين من أمريكا) المهم، التأمين هنا حكومي مو شركات، بأمريكا أشوف بعض
المستشفيات ما تقبل تأمين الملحقية السعودية، هنا الأمور وحدة و أسهل بكثير




المدارس
والحضانـــــــــــــه







يحق للاطفال دخول المدارس من سن خمس سنوات مجانا و اللي هي مرحلة التمهيدي
أو Kinder Garden




و إذا مرررة مستعجل على طفلك فيه مدراس يسمونها pre-school من سنة3
سنوات...بحيث يصير دوامهم3 ساعات يوميا

و في الحضانات و هي نوعين:
Day Care:

Home Care:


و هذا حضانة تستقبل على الاغلب من عمر 0 – 12 سنة ( طبعا من عمر 5-12) بعد
ما يطلعون من المدارس إذا الاهل يداومون إلى وقت متأخر) و أسعارها غالية. و
كل ما صغر عمر الطفل كل ما صار أصعب إنك تلقى له مكان و يصير أغلى بعد.
و هذا حضانة منزلية. ميزتها إنها زي البيت، أقل التزام من الحضانة العادية،
أرخص. لكن عيبها إن وين و ين تلقى حضانة منزليه عليها العلم.


توجد مدارس سعوديه في عدد من المدن بامكان تدخل اولادك فيها وعاده هي تكون
يوم بالاسبوع، يوم السبت الصباح، مكان المدرسة هو النادي السعودي. و اللي
يدرسون في الأغلب عرب. لكن دايما الأطفال ما يحبونها. لأنهم على نظام
التلقين + يعطونهم واجبات كثيرة و أغلب الأطفال في عمر الدراسة لغتهم
الأولى انجليزي...



البنوك






CIBC Bank



بنك كويس و مودرن زي ما يقولون...كل شيء يسوونه سريع سريع و حساب الملحقيه
فيه

www.cibc.com

RBC Bank



أقدم بنوك كندا...بنك ميت و يجيب الهم...بطيئين، مرة جيت بحول لحساب شركة
من عندهم علوا قلبي...كل موظفينهم شياب و عجز

www.royalbank.ca

TD Canada Trust



يسموونه راجحي كندا. عاد ما يحتاج أفصل

www.tdcanadatrust.ca





هذي البنوك الرئيسية تقريبا...ما حطيتها كلها...

بس إذا جيتوا تطلعون فيزا طلعوا ال aerogold علشان يحسبون لكم ميل جوي واحد
لكل دولار تصرفونه. و حتى إذا طلعتوا تذاكر من الملحقية لما تجون تحجزون
عطوهم رقم ال aeroplan حقكم و يضيفون لكم الأميال...تطلع لكم شيء بعد
سنتين. حلوة مررة

***يتــــــــــــبع