خونا لوح عليك المكاتب والدوة الفارغة
وانا اكبر دليل على ذلك خوذ عندك القصة للعبرة
العبد لله كان يشتغل فى شركة اسبانيا المرتب 1450 دينار مهندس كومبيوتر وانا كنت ناوى من قبل للسفر لامريكا من 2006 وكنت زيك نسمع فى خوتنا الليبين السفر صعب وتبى رصيد وتبى معرفة والمقابلة صعبة وما إيلا ذلك من الصعوبات .
وفى يوم معرفتش شنى صارلى لبس حوايجى وقلت يالله وقعدت اندور على المكاتب للحصول على التاشيرة الامريكية وشد عندك:
واحد يقول نبى 1200 وعلى بس تخش للسفارة وتخلص السيفيس.
واحد ثانى يقول تاخدها على الجواز السفر بس تدفع 4000 وديدا مصح والله ...
واحد ثانى يقول نبى 1000 دينار زى خوه الاول ولاكن كشف الحساب منك .
وشد عندك من الدواخ والصداع (اسف على طول الحديث ولكن هذه قصة واقعية صارت لى)
المهم قلنا نتوكلوا ونمشوا لخونا صاحب ال 4000 دينار واسم التشاركية هى المسيرة خلف نادى الوحدة .
وزعمتك وديدة اى عن طريق شركة نفطية يعنى من الاخير لخباط .
والله ياشباب جرى بى جرى احرف من احمد سعد شهرين من الجرى وبعدين قال التاشيرة واتيا قلنا ماشاء الله شكله يفعل
على فكرة كل ما نتصل بيه النغمة دعاء السديس ويقولوله ياحاج عبد الهادى بن يازيد
المهم قتله شنى ياحاج واتية قال واتيا قتله نستقيل من العمل باش ناخد المستحقات .
قالى خود توكل على الله .
وين مشيتله بناخد الجواز قالى والله صاحبنا متع الشركة قال مازل واصبر شوى وا.......
قتله نقولك حاجة هات الجواز والفلوس والحق مش فيك الحق فى الذقن الذى سمع كلامك
خذيت الفلوس وروحت وسافرت للعمرة بالفلوس واتجهنا للقبلة ودعيت عليه وربى يتقبل.
العبرة ياأخوان ماتعطى الثقة فى حد لا شيخ ولاشيخة مع السفارة الامريكية مافيش الارب العالمين فقط .
المهم روحنا من العمرة وسئلنا المشايخ على السفر وامور اخرى قالى توكل ومتعطلش غادى.
جيت وبديت فى الامور:
1-شريت كشف حساب 140 دينار
2-راسلت المعهد وفى اسبوع حصلت القبول.
3-عبيت الابليكيشن اون لاين بروحى الساعة 2:00 فى الليل وهاذى اول مرة نعبيه.
4-خشيت وحجزت موعد فى السفارة.
5-كان عندى بطاقة إتمان مشيت وعبيت 2000 دولار وخلصت السيفيس طبعا هذا كله بعد ماوصلنى القبول.
ويوم الموعد نحساب المقابلة انت والشخص المسؤول فى حجرة يسأئلك وانت تجاوب بروحكم وهذا كله اضرب بيه عرض الحائط.
يوم الموعد كان الساعة 8:00 صباحا دوشنا وقلنا ياكريم سهل الامور درت تحتى 190 دينار وتوكلت خشيت المقابلة وكانت على الواقف ياودى مخدتش 7 دقائق وقالى يالله دور وعد
هاهاهاها نبصر
عطانى ورقة وقالى بعد 3 ايام خش الموقع ودخل رقم الجواز وشوف روحك
المهم بعد اسبوع الساعة 4:00 فى الليل مكسد على التلفزيون قلت خلى نشوف النت شنى صاير فيه بعدين خطر على الموقع قلت خلى نشوف خشينا الموقع ودخلنا رقم الجواز وقلنا يالله لقينا مازال ماصار شى
لا لا الحمد لله لقينا الامور 1000 %
ومشينا الى الفيدكس وعطيناهم الجواز والعشرة جنيه وبعد 2 جتنا التاشيرة
هاذى كل القصة
واسف جدا على الاطالة والله القصد منها العبرة وكما قالوا فى المؤمن كيس فطن
والى اللقاء فى قصة ثانية
طارق
