طبعا انا خاش امتحان التوفل ومجربه ولو تبي اي استفسار ونصائح وشن تدير اني نعطيك من الاخر...
بس قبل كل شي نقولك نبدة عن التوفل ..التوفل يندار الان ب 3 انظمة على حسب الدولة يا اما يندار بالطريقة القديمة اللي اسمها paper based test واختصاره PBTهدا النظام يندار في ليبيا وبعض الدول الاخرى .تاني واحد اسمه internet based test واختصاره IBT .هدا يندار في معظم دول العالم وفيه نظام تالت اسمه computer based test واختصاره CBT وهدا الان اكتر شي في امريكا وكندا..
بالنسبة لسؤالك منو الاسهل طبعا وبكل تقة الايلتس اسهل من التوفل ولا تصدق من يقول عكس هدا انا امشيت بكلام الناس اللي قالوا ان التوفل اسهل بس بعد التجربة اكتشفت ان الايلتس اسهل بكتير لعدة اسباب
متلا اول شي ال listening في الايلتس عبارة عن 40 سؤال واغلبه اللي تسمعه مطلوب منك تكتبه يعني شوية تركيز فقط بينما التوفل ...هاه هاه اهلا وسهلا تعرف مشكلة التوفل ان مش listening عادي بل حاجة اسمها listening comprehension وهدا يعني الاستيعاب يعني ما يسالوكش شن سمعت لا بل شن فهمت من اللي سمعته وهدا طبعا اصعب بكتير ..ال listening في التوفل كان زمان 50 سؤال بس الان اصبح 70 سؤال موزعة على three parts (A, B,C ولو تبي معلومات مفصلة اكتر عن هده الاجزاء ماعندكش مشكلة... بالنسبة للايلتس ركز بس في الاستماع لانه اغلب اللي بتسمعه كلمات معروفة ومتداولة لكن في التوفل يحبوا يستعملوا Idioms هلبا هلبا وطبعا مش كل الايديومز نعرفوا معناهم ..
التوفل فيه جزء اسمه structure and written expression هدا الجزء يمتحن قدرتك في الgrammars وتركيب الجمل طبعا للوهلة الاولى تقول انه حلو لكن الموضوع اكبر من هكي..
الايلتس طبعا مافيشي الجزء هدا...
نجوا للريدينق reading ..الريدينق طبعا يقولولك ان الريدينق متاع الايلتس صعب بس صدقني حتكتشف انه اسهل بكتير من ريدينق التوفل
الاسباب..ريدينق التوفل عبارة عن 5 قطع مجموع اسئلتها 50 سؤال ولازم في خلال 55 دقيقة فقط.
الايلتس 3 قطع و 40 سؤال في 60 دقيقة..
المشكلة الاكبر في الريدينق ان ريدينق التوفل هو reading comprehension بينما الايلتس نادرا ما يجي سؤال كومبريهنشن ولو يجي يكون سؤال واحد او اتنين.
. التوفل يحبوا اسئلة ال vocabulary في الريدنق طبعا ما تفرحش وتقول حلوة لان حيجيبولك فوكابولاري ماعمره مرت عليك في حياتك ويقولولك شن معناها؟؟
بالاضافة الى ان القطع اللي في التوفل فيها تفاصيل هلبا لين تدوخ..
نجوا للرايتنق Writing تقريبا ما فيش فرق الا في الايلتس عندهم حاجة اسمها task 1 هده عبارة عن رسم بياني او مخطط ويقولولك اوصفه ..ماتخافش سهل جدا فيه تكنيك تتبعه وسهل جدا..
الرايتنق task 2 زي التوفل موضوع وتكتب عليه لكن زمن الرايتنق في التوفل 30 دقيقة فقط بينما في الايلتس 60 دقيقة للموضوعين وينصح انك تستغرق 20 دقيقة في تاسك 1 و40 دقيقة في تاسك 2 يعني انت كاسب 10 دقايق اضافية عن التوفل تاسك 2 .
الجزء متاع ال speaking لو بتمتحن توفل في ليبيا فهو نظام PBT لهدا ما فيشي speaking اما لو بتمتحن توفل برا حتى في مصر او تونس ابسط شي فالنظام المتبع هو IBT وهدا فيه speaking .
والان مادا تختار ايلتس والا توفل ..الحقيقة اللي يحدد الموضوع هدا هو اختيارك انت يعني وين تبي تمشي متلا لو بتمشي لبريطانيا او استراليا ننصحك تدير ايلتس ولو بتمشي امريكا او كندا ننصحك توفل اما الدول الاخرى لو ماشي بتقرا في دولة تانية وطالبين عليك توفل والا ايلتس شنو المفروض تدير تدخل على الجامعة وتشوف كم السكور اللي يبوها في التوفل او الايلتس واللي تحسها كويسة واقل ممكن معناها تدير امتحانها..بس في كل الاحوال الايلتس اسهل بكتير واي سؤال مني انا جاهز للرد...
واتمنى لك التوفيق
فضلاً ضعوا خبراتكم في امتحان التوفل
