شهران ف انتظار التأشيرة

قرابة شهرين تامين ف انتظار التأشيرة الاسترالية .لا اعلم السبب لحد الان مع العلم ان هناك شهر اخر لاتمام اجراءات التفويض والدراسة ع الابواب ..مع العلم اني قدمت تأشيرتي عبر وكالة التحدي ود النويصري وكل مرة لا اجد الجواب الشافي..فأرجو من عنده اجابه عن سبب التأخير ان يعطينا الرد السريع.لان كل يوم يفوت يقرب من موعد بداية الكورس..


دمتم بود

السلام عليكم \ أخى sayra قدم على التفويض بواصل التاشيره أنا فعلت ذلك قدمت على التاشيره وتحصلت على الواصل وقدمت على التفويض بواصل التاشيره وصدر لى التفويض ولكن التاشيره لها شهر ونصف ولم تصدر .

راجع مكتب خدمات السفارة الاسترالية فى برج الفاتح

أخي الكريم أعرف ان التقديم بالواصل ممكن بس عندي صاحبي خوفني وقالي مرات يطلع التفويض وانت ترفض من السفارة فتقعد ف مشكلة كبيرة.وعارفك بتقولي تفاءل خير بس بصدق لقيت وجهة نظره صحيحة.مشكور وطمنتني انه فيه ناس زي يعانو من التأخير

توا جاى دورى انقول تجربتى
انا قدمت عاى التاشيره وحصلت واصل وماقدمتش على التفويض طلعت التاشيره فى اقل من شهر قدمت على التفويض جت عطلت العيد وتاخرت هابا واجلت القرايه نصيحتى
قدم عاى التفويض بواصل التاشيره ولو لا قدر الله كاطلعت التاشيره التغيير مش صعب واصلا هلبا دارو هكى دير زيهم مرات التاشيره تاخذ وقت طويل ممكن اتراسل السفاره فى مصر وتسئلهم وهذا ايميل الست ولا الانسه شيرى
تقدر اتراسلها وتسالها
Shery.Elias@dfat.gov.au
مرات عندك نواقص وعموما صاحبى خذا 3 اشهر بالزبط زحصل تاشيره اتغطى المده كلها
وربى ايسهلك

هواتفالسفلرة الاسترالية فى مصر
+(202)25750444

سلام للجميع.هل هناك جديد بخصوص التأشيرة ام لا جديد يذكر ..بالنسبه ليا لا جديد ..اسبوع جديد يضاف لقائمة الاسابيع الماضية يزيد من صداع الانتظار ..ربي يستر..

السلام عليكم .. انا لي مقدم علي التاشيرة يوم 12-12-2010 وكنت اعتقد ان مدة التاشيرة هي شهر علي حسب كلام المكاتب والسفارة نفسها ولكني عندما راسلت السفارة الاسترالية في مصر فوجئت باميل من قسم التاشيرات يقول ان الاوراق وصلوا يوم 09-01-2011 اي بعد شهر من التقديم وان اجراءات المعالجة تاخد حوالي 3 اشهر هذا ان لم يوجد نواقص .... وان كان هذا االكلام صحيح فهناك مشكلة كبيرة فبداية الدراسة سوف تتغير بالكامل.

السلام عليكم
اخى الموضوع خطير من وجهة نظرى ولا يجب السكوت عليه
اولا هدى ثلاث شهور علاش وثانيا فيه الا فى عشرة ايام
لازم ان يكون فيه اتفاقية بشان تاشيرات الطلبة واحترام للطالب الليبى
نحن الطلبة الليبين لسنا كأى طلبة فى العالم
تدفع ادارة البعثاث اموال طائلة على الرسوم الدراسية
والسفارة الاسترالية مفروض تبدى فى ليبيا

لاحول ولاقوة الا بالله.علاش التأخير بالله علاش.معناها ع كلام اخي ميسرة انه التأخير من اهنايا ف ليبيا جماعة المكتب راقدين يتسبلو بعطلة الكريسمس واحنا نعرفو انها ماتتجاوزش اسبوع بس بس .انا نأيد كلامك ياخوي البحري انه تفتح سفارة ف ليبيا ويحترمونا شوية عالاقل.

لا يا اختي وسعي بالك متوسط الوقت المحدد من دائره الهجره الاستراليه 3 اشهر انا قعدت 5 اشهر باش حصلت التأشيره اما عن سبب التأخير فهو لعدة اسباب ولكن اهمها سببين مهمين اول شي عدد اسبيع اللغه التي المحددة من قبل الجامعه اذا كانت اقل من 30 اسبوع فأن سوف تحصلين علي تأ شيره بكامل المده يعني لغه + اكديمي وهذه تحتاج مراسلة دائرة الهجره استراليا وهذ يعني 3 اشهر كاملات والسبب التاني التخصص ان كان دكتوره نوع البحث لو كان مهم والدوله الاستراليه تصرف عليه نفس الشئ3 اشهر
وشكرا

السلام عليكم

انا قدمت في التأشيرة من تاريخ 3-11-2010 في طرابلس
و وصلت الاوراق الي القاهرة بتاريخ 28-11-2010

في نهاية شهر 12 طلبت مني السفارة إجراء كشف طبي لاني أقمت في ماليزيا عام كامل
انهيت الكشف الطبي الذي وصل الي مصر بتاريخ 7-01-2011

و حتي الان لا جديد ما زلت في الانتظار

اخانا اسف جدا اعتقدك موفده هذا سبب التأخير حيث هناك نقص في الاوراق تبقي التأشيره في الانتضار حتي اكتمال كافة الاوراق وحيث انك كنت في ماليزيا وهي منطقه استوائيه تكتر فيها الامراض يجب ان تجري الفحص الطبي ولكن الان اعتقدان التأشيره تبي اسبوعين ابعت ايميل الي شيري اسأله عن تأشيرتك وهذا ايميلها
shery.elias@dfat.gov.au
وابعت رقم الملف وهو رقم ممكن موجود في الواصل
وشكرا ووسع بالك انا قعدت 5 اشهر امتعين السفاره حفضوني من كثر الهواتف

السلام عليكم
انى كبدتى طابت من استراليا وجامعاتها لم احصل على مشرف الا بعد 6 اشهر من البحث الشاق وبعدين القبول جانى بعد 3 اشهر وماحصلتش CoP لصغارالا بعد اكتر من شهر وقدمت على التاشيرة قالوا لى لازم تاجل موعد الدراسة والان لى شهر ولم ياتى التاجيل ليش مش عارف وبعث للجامعة استفسر قالولى ماعدش تراسلنا راجع عن طريق وكالتك والوكالة لا حياة فى من تنادى انصحونى شنى اندير بالله عليكم معادش عارف راسى من رجليى

اخي نو ون
التأخير في التأجيل سببه ان رسالة الدهم المالي من المكتب الشعبي مححده بتاريخ وعند التأجيل تتطلب الجامعه من المكتب الشعبي رساله جديده والمكتب حالي الخبير التعليمي في اجازه فحاول تتصل بالاستاذ دريس يسر الاجراء لانه بصراحه شخص خدوم جدا ويرد علي اي اتصل
وشكرا

ياناس شني صار معاكم فيه حد جت تأشيرته توا قصدي الفترة هادي.راهو الصبر نفد ومعندناش حل شوفولنا حل نديروه مافيش سبب للتأخير بكل

انى قدمت من يوم 10 -12-2010

والى اليوم ما فيش شى

معقولة تتاخر اكتر من هكى

السلام عليكم
في بدايه قرار الايفاد حاولت مع الساحه الاستراليه وخديت قبول واشتسارات اهل الخبره بمن لدي تقه في رايهم بحكم عملهم مابين المانيا واستراليا ومن غير نقاش نصحونى بالمانيا من جميع النواحي والتفويض المالي الذي فيه وجدت ان اكتر من 80%من المدرجه اسماءهم استراليا وانا الوحيد المانيا واليوم عندي قرابه السنه في المانيا كم يحزنى اخوانى الليبين من اختارو البعاد علي اهلهم ونفو عائلاته في اخر نقطه في الدنيا واشكر من قدم لي النصيحه فالمانيا الساحه المثاليه مادوخش روحك وجهه نظر
سوالي لماذا استراليا

بس ياخي المانيا مشكلتها اللغة العلم كله باللغة الانجليزية اهم شئ اللغة هي مفتاح العلم مع احترامي لجميع اخواني في ساحة المانية...وشوف نفسك لم تدخل علي الانترنت افضل معلومات في اي علم سوف تجدها باللغة الانجليزية ...مش يقولوا سياسة انجليز فعلنا ربما فشلوا في أستعمار العالم بسلاح...ولاكن نجحوا في أستعمار العالم باللغة

الدراسه في المجالات العلميه الماستر تدرس في المانيا باللغه الانجليزيه وبعكس الدول التانيه ليس مطلوب التوفل ولا الالتس تكفي نجيب معك ورقه من الكليه المتخرج منها انك دارست باللغه الانجليزيه

نبشركم يااخواني واخواتي الحمدلله اليوم وصلت تاشيرتي وانشالله ماتتاخرش التاشيرة لكل اللي يستنوا يااااااااااااااااااارب

om adam كتب:

نبشركم يااخواني واخواتي الحمدلله اليوم وصلت تاشيرتي وانشالله ماتتاخرش التاشيرة لكل اللي يستنوا يااااااااااااااااااارب

بارك الله فيك اختى وصلت تاشيرات كثيرة كانت متعطلة
الحمد لله

ألف مبروك ليكم والعقبه لينا درنا الكشف الطبي اللي طلباته السفارة وبعثناه وتوا بنراجو يستر الله ان شاء الله معادش تتأخر يارب...