استعد ذكريات ايام الثورة وسجل شعورك مع هذه اللحظات

لولوة كتب:

ما هو شعورك يوم 17 فبراير ؟؟وكأننا في حلم لم نعتد على مثل هذه الانتفاظات في ليبيا
ما هو شعورك واصحاب القبعات كانوا في بنغازي ؟؟ شعوري في تلك اللحضه كنت خائف على اهل بنغازي من القمع والتنكيل
ما هو شعورك والمرتزقة في الابرق ؟؟ شعورنا في تلك الايام بداء كمؤشر الحراره احيانا تسمع خبر يمدك بالطاقه والحماسه وتارة تشاهد او تسمع خبر محبط للغايه عندما دخلو المرتزقه ادركنا ان الامر تازم ؟
ما هو شعورك لما بنغازي تحررت ؟؟ كدنا نطير من الفرح
ما هو شعورك اول مرة تطلع فيه اشاعة ان معمر طاح ؟ فرحه كبيره لكن لم ناخد الامر بمحمل الجد ؟
ماهو شعورك والثوار يتقدموا سريعا باتجاه سرت ؟؟ فرحه كبيرة كنا قلقون على اهلنا في سرت
ماهو شعورك والكتائب تدخل اجدابيا ؟؟ غاضبين كثيرا وخاصتا الكتائب تقصف بلا هواده بالراجمات على الاهالي والسكان لعنة الله عليهم
ما هو شعورك والزاوية تدخلها الكتائب ؟؟ الحذر والترقب وتقوعنا ان تحدث مجزره
ما هو شعورك والزنتان تنتفض ؟؟ شعور بالفخر والاعتزاز لهذه البلدة وشبابها الاشاوس الابطال
ما هو شعورك لما قالوا قبيلة ورفلة انظمت للثورة ؟؟ لم اسمع بهذا الخبر بتاتا
ما هو شعورك لما قالوا الزويات سكروا البترول علي معمر .؟؟ مانحكيلكش فرحه لاتوصف
ماهو شعورك لما طرابلس انتفضت ؟؟؟ توقعنا ان طرابلس سيستمر الحرب فيها لشهور
ما هو شعورك لما مصراتة انتفضت على خاطر بنغازي .. جميل
ما هو شعورك وانت تشوف ان الشعب الليبي كله احساس واحد وكله خوت وكأننا نلد من جديد
ما هو شعورك لما تحررت طرابلس ..ايه ايه قلنا خلاص تمت والحمد لله سقطت طرابلس باسرع ماتوقعنا
ما هو شعورك لما تقول انا ليبي خذيت نصيبي من هالجمله الرائعه لين صوت انبح ولااكل ولا امل من ان اقول أنا ليبي وأفتخر
؟؟؟؟؟؟؟؟؟؟؟؟؟؟

hanan_canada كتب:

السلام عليكم
مع احترامي لرأي الجميع خصوصا توا واحني أحرار في التعبير أكثر من أي وقت فات بس حبيت نوضح حاجة أنا ورفلية وأهلي من سكان بني وليد ومن بداية الثورة المجيدة انضميت أنا وزوجي ليها والحمدلله ربي نصرنا ونصر الحق.
بس ما يقدر حد يقول بأي شكل من الأشكال ان قبيلة ورفلة ما انضمتش للثورة لأن ورفلة مش في بني وليد بس ورفلة موجودين في معظم مدن ليبيا يعني لما بدت الثورة في الشرق قبيلة ورفلة انتفضت مع القبائل الاخري في كل مدن الشرق الحبيب واللي ما عنده علم يقدر يشوف الإحصائيات اللي تقول أن 70% من سكان بنغازي من قبيلة ورفلة وهذا حسب قناة الجزيرة وايضا ورفلة انتفضو في مصراتة لأن عندنا تقريبا 3000 عائلة في مصراتة من ضمنهم أقاربي اللي شاركو في تحرير مصراتة وانتفضو مع الزنتان وكان خوي يمول في أصدقائه من ثوار الزنتان ماديا وانتفضوا في بني وليد واستشهد ابن عمتي في شهر 5 وفي طرابلس وغيرها من مدن ليبيا الغالية.
يعني الثورة مش حكر على قبيلة دون أخرى ورفلة كيفها كيف كل قبائلنا الشريفة اللي قالت للطاغية لا
واللي يقول غير هكي أنا نوجهله سؤال ليش ورفلة لما دارو انقلاب على القذافي في 93 وقصفنا فيه حتى بالطائرات ما جانا حد منكم ولا وقف معانا حد؟ ولا احني دمنا رخيص؟
بس احني عمرنا ما اتهمنا أي قبيلة بأنها تخلت عنا في ذلك الوقت وربي نصرنا توا
وأخيرا ليبيا وحدة واحدة ومش رح نسمحو لأي حد يقصي قبيلة دون قبيلة