@@ فضيحة قرار ايفاد الطلبة الليبيين في بريطانيا @@@

تفضلو يا سادة اللي مدايرين روحهم وطنيين شوفو اول صفقة ليهم وهي تأمين مستقبل صغارهم قبل اولاد ليبيا
انانية واضحة عيني عينك

هذه قائمة الطلبة المرشحين لدراسة البكالوريوس على حساب الدولة الليبية في بريطانيا وقد تم تفصيل شروط القبول بحيث تتطابق مع مؤهلات الطلبة الليبين المقيمين ببريطانيا (أي من حملة الجنسية الانجليزية) ولا تنطبق على الطلبة الليبيين من حملة الجوار الاخضر. لفت انتباهي هو وجود اسماء ابناء مسئولين ولاادري هل هو من قبيل تشابه الاسماء او هم فعلا الاسم رقم 26 و86 اعتقد انهم اولاد السيد جمعة القماطي
ومثلا الرقم 143 هو لشخص غير ليبي
والقائمة تطول. الواسطة لازالت ضاربة اطنابها للاسف فاذا كانت هذه تصرفات من عاشوا طوال حياتهم خارج ليبيا فلا نلوم من قضى حياته كلها في ليبيا
واذا كانت هذه التصرفات تصدر عن مسؤولين المفترض فيهم ان يكونوا قدوة فلا نلوم الثائر البسيط الغير متعلم
إذا كان رب البيت بالدف ضارب . . فشيمة أهل البيت كلهم الرقص
http://ntclibya.org.uk/ca/?p=796
منقووووووووووووووووووول

هاهاهاهاهاهاها و الله يا جماعة شر البلية مايضحك.............ايقولك مافيش ميزانية انفذو قرارات الايفاد الاخير و ايديرو في ضم لطلبة الباكالوريوس....؟؟؟؟..........أحد الاسماء نعرفه شخصيا و الله ماهو متاع قراية خمرة و جيرل فرند و حفلات له فترة في بريطانيا...........معقولة ضم ما يقارب 1000 طالب و العدد قابل للزيادة و هضا باكالوريوس مازال الماجستير و الدكتوراه و في بريطانيا بروحها يعني تصور الرقم على مستوى جميع الساحات الدراسية الاف الاسماء.................و الله ماهو حسد بس اعتقد المنطق يقولك لكل شيئ اولوية كمل اجراءات الي داخل البلاد و الي يستحقو الايفاد اكثر و الي هما اوائل و معيدين و اعضاء هيئة التدريس و بعدها بعزق هالبعزقة.......وين ماشيين بالبلاد بس يا.....

مجرد رأي

يروحوا بيهم ويقروهم في جامعة ناصر الأممية بسوق الأحد ترهونة لإن هيا توا فاضية بعد ما كانت تقري في الأجانب. وأهو بالمرة نستفيدوا منهم ويخدموا بارت تايم في تعليم الأنجليزي لمرحلة التعليم الأساسي والثانوي.

وتعيش ليبيا......

يعلم الله لو كان الكلام هذا مزبوط مش تشابه اسماء

معناه علي ليبيا السلام من القطط السمان الجدد

خراف حتي انت يا قماطي نحسابوك حاجه كبيره ثاريتناء مغشوشين فيكم

عدوا الله لايسامحكم كانكم ظلمتوا ليبيا او كليتوا حقناء

ممكن سؤال ؟
صح الان في دراسة في مصر لاي طالب عبى حساب الدوله صديقتي راجل أختها مشى وهو مش موفد ,,,هل هذا صحيح أم خزعبلات ؟؟؟؟؟

توا كيف شفت القائمة كله

تي معقولة رقم 143 تي هذا اجنبي وين ماشي يا قماطي انت او المحترمين الي في سفارة غادي حرام عليكم دم الليبين ياسيدي اندزوا اورقناء غادي او ضمونا بعد ماعندكمش ميزانية لموفدين الصح الي طالع دينهم لهم عشر سنوات او تترواح الفترة في مابينهم

حسبي الله ونعم الوكيل فيكم

المفروض الواحد يمشي يقرا برا و بعدها دغري يدير ضم و يفوت القرارات الى نرجو فيهن يتنفذن................اسرعله....!!!!!.............يبدولي المسؤولين قصتهم مش في الميزانية و لكن عندهم حساسية مع قرارات 2011...........

يا سمرت

عادي انديروا قرار 2012 او نجروا عليه بالك اينفذوه قبل امتاع 2011 خير من انك تقعد اترجي

تم مراجعة القائمة وتفريغها في ملف أكسل، ووجدت الملاحظات التالية:

1. تكرار الأسماء كدليل لفقدان السفارة لمهارات أستخدام تطبيق الجداول الألكترونية الأكسل.
2. بالبحث في الألقاب يشتبه وجود أبناء شخصيات متنفذة في الدولة الليبية بعد أحداث ثورة 17 فبراير.
3. وجود أسماء لعائلات بكاملها.
4. وجود الأسم الأول فقط( يعني بيتعاركوا عليه ) كل واحد بيقول أني أني أني.
5. وجود أسماء طريفة.

ياريت السفارة وسفيرها يحترموا الشعب الليبي البطل

وتعيش ليبيا.....

الله غالب

والله ياجماعة كيف الباب كيف خدة كلها عصابة ومازال 29 يوم عن 17 فبراير شكلها يبوها اتنوض عليهم من جديد

سبحان الله و خلاص,, هل اصبح التشكيك من سمات الليبين؟ اول حاجه هدي القائمه للمتقدمين على الضم,, و هذا ما يعنيش انهم اكلهم بيحصلوا ضم ,, الي بتتوفر فيه الشروط بيتم ضمه و الا ما تتوفرش فيه الشروط بيلقى روحه البرا.. بعدين لما نلقوا ابناء جمعه القماطي مع ابناء الليبين التانين فهذا ليس فساد بل مسواه بين عامة الليبين و خاصتهم.. بعدين الضم حق لا مواطن ليبي ,, و كونك ليبي يعني تحمل الجنسيه الليبيه ... سوا اسمك احمد و الا بلعيد..

زعماء لما ايكملوا ايجو ايروحو يخدمو فى ليبيا

والله ياخوفي ان التغير يكون في العلم والنشيد بس........وياشماتة ابله زازة فينا

يجب التحري يا شباب هل هم ابناءه ام لا

لان جمعه القماطي عمره 31 سنه وهل لديه ابناء بهذا العمر
المهم يجب التحقق وبعده حي على ا امه

خوي محمد المسماري جمعة القماطي عمره لايمكن ان يكون 31 سنه لانه هوا من مواليد غريان مواليد الخمسينات يعني ممكن يكونو اولادة و ممكن لا........بس الموضوع الاصلي و الاعتراض انه الحكومة مليئة بالتناقضات من ناحية يقولو انه مافيش ميزانية و من ناحية اخرى ايديرو ضم لالاف الطلبة و الي للاسف اغلبهم من ليبيي المهجر يعني الدولة اساسا مش حتستفيد منهم لانهم ببساطة مش حيرجعولها لانهم حملة جنسيات اخرى.........الزبدة الحكومة هذي..........يا تستعبط يا تستعبط!!!!!!!!.................

كلامك مزبوط يا سمارت جاى. بالنسبة لابناء القماطى ليبيين و من حقهم زى أى ليبى أخر لكن الطامة ليش الساحة البريطانية بس؟ ليش طلبة البكالوريوس بس؟ ليش الليبيين اللى هما اصلا عندهم جنسية بريطانية و الحكومة البريطانية تفرض عليهم فى رسوم مخفضة جدا مقارنة بالرسوم االى يدفعو فيها الطلبة الاجانب ؟ يا ترى لو مشيت لبريطانيا على حسابى بكرة و طالبت بالضم شنو يصير؟ فوضى فوضى و الضحية الليبى البسيط.

السلام عليكم
والرحمة علي موتانا اللدين نحتسبهم عند الله شهداء
ماهو الفرق يلي تغير بعد تورة 17فبراير مازالت العقلية وحدة ويلي عند واسطة يكمل شغله اما راقد الريح فهو رايح فيها علي كل المراحل بالامس كانت اللجنة الشعبية العامة ورجالاتها واليوم حكومة برجالات جدد ....وكما يغني محمد عبده لنا الله ياخال من الشوق

أبو ليلى كتب:

مجرد رأي

يروحوا بيهم ويقروهم في جامعة ناصر الأممية بسوق الأحد ترهونة لإن هيا توا فاضية بعد ما كانت تقري في الأجانب. وأهو بالمرة نستفيدوا منهم ويخدموا بارت تايم في تعليم الأنجليزي لمرحلة التعليم الأساسي والثانوي.

وتعيش ليبيا......

100%