كيفية الحصول على قبول اكاديمي بنفسك ( عن تجربة شخصية))

السلام عليكم ورحمة الله وبركاته ,

الحصول على قبول من بدون وكيل عن تجربة

انا قدمت عن طريق النت بدون وكيل ولا مكتب يجيب قبولات و لاشئ وميزة بريطانيا ما يطلبوش في فلوس في لبتقديم .....لذلك ما فيش قصة تحويل او مشاكل الدفع اللي تعرفوها عندنا في ليبيا , المهم العملية بسيطة

أول حاجه جميع الأوراق المطلوبة للتقديم يجب أن تكون عندك في الكمبيوتر متاعك (PDF) واللي هي كالأتي:

1 - شهادة بكالوريس + كشف درجات
2- شهادة ماجستير + كشف درجات
3 اثنان رسائل تزكية " من دكاترة قروك في البكالوريس او في الماستر " ( مهم جدا الورقتين هذه(
4- مقترح للدكتوراة ( مهم جدا(
5-رسالة الدعم المالي للقبول ( ليست دائما مطلوب(
- شهادة خبرة من العمل السابق
7- بورتفوليو (Portfolio( يطلب خصوصا عندما تقدم على دكتوراة باي ديزاين ي العمار ة على كل حال يعتبر داعم قوي جدا
البورتفوليو هو عبارة عن اعمالك التي قمت بيها في السابق مثلا انا معماري فالبورتفوليو متاعي صور بيها اسكتشات ورسومات و افكار متاع المشاريع اللي انا شاركت بيها في مكتب تصميم بالاضافة تقدر تحط مشروع التخرج متاعك ( هذا يفيد في حالة تقديم على دكتوراة بروفوشينال مش فايلوسفي في كل الاحوال مفيد )
المهم كان ماعندكش مش مشكلة واجد
8-كان عندك مشاركة في ورقة بحتية

تقريبا هذه الاوراق

الخطوة الثانية دور على الجامعات اللي تبي تقرا فيها واللي فيها هندسة معمارية , وتذهب الى قسم العمارة وتشوف البروفايل متاع الدكاترة واللي يتناسب مع المقترح متاعك او انت عاليش تبي تقرا وتراسالة ( كلنتين فقط انا عجبني البروفايل متاعك وانا انترستيد مع الايريا هده و.. وشوية معلومات عندك وحمل مع الاميل المقترح متاعك) هذه خطو ة مهمة جدا لانها لما تقدم اون لاين وادا رد عليك الدكتور بالايجاب حا يوصي عليك لان انت لما تقدم عن طريق الجامعة اوراقك كلهم بيمشو للقسم وبعدين في القسم بيمرو على الدكاترة ومن ضمنهم الدكتور اللي انت راسلته وراسال اكتر من دكتور ما فيش باس

الخطوة الثالثة خش على ابلاي اون لاين(Apply on line ) عبي بياناتك كلهم احيانا تاخد وقت لو النت عند كويس بالكتير ساعة انا النت كان عندي ضعيف احيانا يوم وتاني يوم انكمل ... المهم اخر خطوة بعد ماتعبي بياناتك كلهم يطلب تحمل الاوراق اللي شرحتهم سابقا ودير سمبيت Submit.....خلاص بعد يوم يجيك من الجامعة ايميل يعطوك رقم امتاعك ويقولوك ان الابلكيشن متاعك وصل طبعا القبول ياخد من 3 الى 4 اسابيع
ويعطوك اسم مستخدم ورقم سري ليش تخش على البورتل متاعك وتشوف وين وصل الابلكيشن متاعك

وطبق هدا على اكتر من جامعة

هذه الخطوات للتقديم على أي جامعة في العالم

انا هكي درت وحصلت على قبول من :

شافلد , نوتنكهام , نيو كاسل , من ليقيربول

واي مساعدة حاضر
( رحمة الوالدين ) ولا نتسونا من صالح دعائكم في هذا اليوم المبارك

وبالتوفيق

جزاك الله خيرا وانا ايضا معاك اخي في نقطه انه الواحد يراسل بنفسه احسن
بارك الله فيك

تريد الحق ياخوي الجامعات الان ساهله لان الان الدول الغربيه عندهم ازمه ماليه
عندما يشوفو طالب ليبي معه دعم مالي عيونهم يعملن قلوب ..،

المهم بالتوفيق ..،

مشكور خوي
ياريت تكلمني عالخاص

بارك الله فيك

بارك الله فيكم وجزاكم الله خيرا

بارك الله فيك و وفق الله الجميع

ربي يحفظك ويكثر من امثالك

السلام عليكم شنبيرة والله يرحم ولديك

بالله نبي نسأل على الجامعات الإيرلندية اللي فيها تخصص علم دم أو مصارف دم

وكيفية برنامج القبول والتأشيرة فيها

وبارك الله فيك

بارك الله في الجميع

الجامعات الايرلنديه ماعنديش فكرة عليهم بس انت لو دكتوراه ادخل على الجامعات وابحث من داخل الجامعة والاقسام الخاص بيها عن التخصص اللي انت ناوي تدرس بيه اذا وجدته ابحث على سوبير فايزر قريب من التوجه او حالة الدراسة اللي انت راغبها و راسل الدكتور و هو حا يرد عاليك اذا وافق قدم على الجامعة و حا تحصل قبول بشكل مؤكد اما اذا ماجستير فالحصول على قبول حا يكون اسهل اهم حاجه تشوف الجامعة اللي فيها التخصص اللي تبيه وتقدر اتقدم اون رين وعلى حسب علمي ان الجامعات الايرلندية مش كثيرة في حدود خمس جامعات على ما اعتقد

وربي يوفقك واسف على الرد المتاخر

بارك الله فيك وربي يكثر من أمثالك

السلام عليكم و بارك الله فيك على المعلومات .. انا حبيت نسأل كيف نقدر انقدم على منحة دراسية في بريطانيا .. انا خريجة معهد عالي قسم Marketing و لازم اني انكمل سنة برا عشان نحصل على بكالريوس .. من فضلكم ساعدوني و شكراا

يااااريت هكا ساهله القصه..و نسيت اللغه و قصتهاااا بالدات التخصصات الطبيه حااااااااله و الله المستعان

انت شخص رائع واتمنى لك التوفيق

باركالله في الجميع واتمنى التوفيق للجميع وان يخلص نياتنا وان يجعل دراستنا وكل اعمالنا خالصة لوجهه الكريم وان يمن على الجميع بالتوفيق في الدين والدنيا والاخرة

السلام عليكم
أود أن اضيف من خلال تجربتي المتواضعة في الحصول على قبول دكتوراه نعم اوضح الاخ الكريم من تقديم للشهادات العلمية مترجمة ومقترح للدكتوراه والسيرة الذاتية وأضيف إذا كان لك اوراق علمية منشورة في مؤتمرات علمية فقد دعمت موقفي في القبول اثناء بحثي عن مشرف للدكتوراه.
وفقكم الله

بارك الله فيك ويرحم والديك