هل وصل تفويض رقم 1 لسنة 2012 للخزانة؟

السلام عليكم
اللي عنده معلومة اكيدة اذا وصل التفويض رقم 1 لسنة 2012 للخزانة يقولي لاني كل ما نتصل بالخزانة يقولولي قاعد في التعليم العالي وما وصلنا شي وقداش ليه التفويض طالع من البعثات ؟ مش فاهمة حد يشرحلي شن ايديروله في التعليم العالي؟ افيدوني أفادكم الله

السلام عليكم حتي انا بستني في وصول التفويض للخزانة علي احر من الجمر لانني دهبت الي الاردن والتحقت بدراستي بناء علي كلام البعتات حيت قالو لي خلال اسبوعين يتحول الي الخزانة والان ليه اكتر من اسبوعين ويستر الله لانني دفعت مصاريف هلبة ولسه بستني وربي يوفق الجميع

السلام عليكم
انا امشيت للوزارة امس وقالولي مازال يبي اسبوعين او اكتر باش يتوقع من المراقب المالي الجديد وبعدها باش يمشي للخزانة وكان اسلوب الراجل زي الزفت اسمه ابراهيم ولما قلتله الدراسة امتاعي بتبدا ومعاش نقدر نتاخر قالي شنو بنديرلك يعني احنا قاعدين في عهد الطاغية المقبور واجراءاتهم اللي ماليهاش نهاية والمش معروفة امتى تطلع ضروري كل الطلبة اللي في التفويض رقم واحد ايجمع نفسهم وانا واحد منهم بلا انا اول اسم فيهم و ان نقوم بالتظاهر امام مقر الوزارة في شار النصر لكي يحركوا روحهم ويتمونا الابراق باسرع مايمكن وبلاش من هالمهازل وهالتعطيل الزايد وعاشت ليبيا حرة
اخت حنان كندا ممكن تعطيني رقم الخزانة باش بنتصل بيهم حتى انا لاني مانسكنش في طرابلس وشكرا

رقم الخزانة 0213345447 وبعدين اضغط الرقم 9 باش يوصلوك بالاستعلامات

بارك الله فيك يامهندسة كلمتهم وقالولي مازاااااااااااال قاعد في الوزارة امتاع النوم اهيا هههههههههه

ربي يبارك في الجميع
اليوم مشي زوجي للتعليم وقالوله نستنو في توقيع المدير والمدير ما جاش يعني معقولة طلبة بتمشي تقرا ونستنو في مدير ما عنداش اي حس بالمسؤولية وقاعد راقد في حوشه ؟؟؟
ما عندنا غير قولة حسبنا الله ونعم الوكيل

الله المستعان أنا قاعدة نرجى في التفويض مانحساب روحي نبي نرحى حتى المالية

ربي يسهل الأمور للجميع إن شاء الله

صار المدير ماجاش امالا ليش حاطينه بكل شنو ايدير فيه وجه القردة اكيد ماد وجه في تركينة فيها غرف افلوس ولا ماشي يزرع شعر المراة على حساب الدولة والله هالوزارة جايتها مظاهرة شكلها اليومين الجايات كان ماوقهوش الوريقات وهنوا روحهم بلا جو الكلسل والاهمال اهوا وحسبي الله ونعم الوكيل فيك يامدير النوم

السلام عليكم بخصوص وصول التفويض رقم 1 للخزانة عندي صديقي مشي اليوم لوزارة التعليم قالوا له ان شاء الله يوم الأحد سوف يصل الي الخزانة يارب الخبر صحيح

ان شاء الله يارب ولكن بنسالك هل صديقك سال في البوابة او ركب فوق وسال لان اللي في الباب موظف وايوزع في الجماعة دارهلي قبل هكي ولما ركبت سالت فوق قالولي مازال الكلام اهوا يوم 1 - 2 - 2012 بس ان شاء الله ايوكن كلامهم صحيح المرة اهيا وايتموهن

السلام عليكم
خبر سار لكل الطلاب في تفويض 1 لسنة 2012
خبر شبه مؤكد عن وصول التفويض للخزانة اليوم الاحد
وان شاء الله الخبر ايكون صحيح وتنحل مشكلتنا وانسافروا
ارجوكم ادعولي بالتوفيق و النجاح وانكمل باقي الاجراءات بسرعة وعاشت ليبيا حرة

الله ابشرك بالجنة يا احمد وان شاء الله ربي يوفق كل طالب علم

مبارك ربي يوفقك الجميع ان شاء الله وعقبال التفويض رقم 2 اللي يسمع اي معلومة عنه يفيدنا

من قال التفويض رقم واحد وصل الخزانة؟ امس كنا في طرابلس وكل الموظفين في الخزانة والتعليم العالي معتصمين وما لقينا اي موظفين لا من الخزانة ولا من التعليم وتقولو التفويض وصل كيف بس؟
بس املنا في ربي خير

انا اتصلت بالخزانة وقالوا لم يصل شي مع انهم امس في وزارة التعليم قالوا لأحمد الدوفاني انهم بعتوا التفويض للخزانة الباين إنا في ناس في الوزارات ما يبوش البلاد تتنظم ان شاء الله ربي يهديهم وخلاص

السلام عليكم
قبل ساعتين تقريبا زوجي مشي للخزانة قالوله المفروض يوصلنا اليوم بس ما وصلنا شي وبعدين مشي للتعليم قالوله التفويض اتوقع وأموره تمام وإدا لحقو بيرسلوه اليوم إلى الخزانة
طيب إدا كانت اموره تمام علاش ما يبعتوش التفويض ويخلصونا علاش التعطيل ؟؟؟؟؟
ربي يهديهم
سؤال: في حد عنده فكرة أو مشي للبعثات قريب ويعرف هل بيعطونا تداكر وإلا مش معروف؟

السلام عليكم استادة حنان بارك الله فيك علي هده المعلومات القيمة وان شاء الله ينشطوا الوزارة ويبعتوه بسرعة اما بخصوص التداكر انا اخدتهن علي حسابي ومشيت للاردن والبعتات قالوا لي سوف نصدرو لك تداكر بعد التعاقد مع مكتب للسفر

ان شاء الله ياحنان ايكون كلامهم صحيح المرة اهيا هالكذبين المنافقين لاني امس كنت عندهم قالولي اليوم امشي للخزانة على امس ولكن اليوم اتصلت نتاكد قالولي مافي شيء جانا بس ان شاء الله المرة اهيا اتشد وعلى كلامهم غدوة ايكون في الخزانة صح يا حنان ولا شنو قالوا لزوجك بالزبط ارجوك طمنينا

السلام عليكم ورحمة الله وبركاتة
بشره ساره باذن لكل الطلبة المتواجدين بتفويض 1 / 2012 مسيل جدد
نود اعلامك بانه غدا الموافق يوم الثلاثاء بتاريخ 14 / 2 / 2012 سيتم احالة التفويض الي ادارة الخزانة غدا صباح
وعلي الطلابه المتواجدين بتفويض 1 / 2012 التوجه الي الخزانه غدا لي استلام برقيات التفويض
ملاحظة / البرقية تتكون من نسختين نسخة تعطى الي ادارة البعثات والاخره يسلمها الطالب الي المشرف الطلبي ببلاد الدراسة .
وهذا للعلم والافادة وشكرا

بارك الله فيك السواي وان شاء الله المرة اهيا يصدقوا وايصير من كلامهم يارب واللي ايحصل خبر هوا الاول يخبرنا بالله اعليك
شنو مصادرك لو سمحت هل انت متاكد ولا قالوها ؟
والله اكبر

الاجراءات التي سوف يتم احالتها الي ادارة الخزانة هذا الاسبوع
من طرف alswai أمس في 21:43

+
----
-
السلام عليكم ورحمة الله وبركاته والصلاة والسلام علي سيدنا محمد اشرف الانبياء والمرسلين

اما بعد



نود ان نلفت عناية الطلبة الموفدين الي الاجراءات التي سوف يتم احالتها الي ادارة الخزانة بوزارة الماليه هذا الاسبوع وهي كالاتي :ـ
الربع الاول لسنة 2012
الربع الثالث والرابع لسنة 2011 لطلابة الضم(قرار 34 لسنة 2011)
الرسوم الدراسية 2012\2011
تمديدات 2011
التذاكر النهائية وبدل الوزن الاضافي لسنة 2011
التذاكر النصفيه لسنة 2011
بدل الطباعة والتجليد لسنة 2011
دراسة حقلية وموتمرات علميه وتذاكر وفاة 2011
تفويض مسيل طلبة جدد 1\2012
تفويض مسيل طلبة نقل 5\2011
تفويض نقل 1\2012
وبعض الاجرات الاخره المتعلقه بالرسائل الفرديه وتعديل واعاقة ومحضر اجتماع لجنة الميزانيه وفرقات تذاكر وفروقات منح شهريه

وعلي الطلبه التحلي بالصبر والايمان والقادم افضل بعون الله

وهذا للعلم والافاده وشكرا


عدل سابقا من قبل alswai في 13.02.12 23:09 عدل 1 مرات

السلام عليكم

انا استفسر عن تفويض نقل رقم 1 2012

العنده معلومة ياريت يطمني

جزاكم الله عنا كل خير

و شكرا

التفويض في الخزانة يا احمد انا اتصلت بهم شخصيا

السلام عليكم
نعم التفويض رقم 1 نقل موجود في الخزانة انا اليوم كنت غادي وفي حتى ناس استلموا برقياتهم
ثانيا اوجه اعتذار للسيد ابراهيم اللي يشتغل في التعليم العالي لو انا اغلطط فيه او زدت في كلامي بسبب انفعالي وارجو ان يسامحني ويعتبرني اخوه الصغير واوجه كامل شكري للعاملين بالتعليم العالي والخزانة والمالية على اهتمام بموضوعنا و اتمام اجراءه باسرع ماامكنهم وبارك الله فيهم وعاشت ليبيا حرة وان شاء الله اللي جاي خير وخير والسلام خير الختام

مبارك يا اخوان وربي يوفق الجميع بس حبيت نفهم بعد مايوصل التفويض للخزانة معش في دور للمندوب والطالب شنو يدير بالضبط ؟؟