ليش هالتجاهل لرسالتي يا فاعلين الخير نبي رد

اللي عنده علم بمتطلبات التاشيرة الكندية للي عند ايفاد شن هم؟ وهل صحيح يبو درجة 4 في IELTS او لا ارجوكم جاوبوني

بجد شكرا يا اعضاء المنتدى اللي قلت هديما تو يساعدوني

أم كلثوم كتب:

بجد شكرا يا اعضاء المنتدى اللي قلت هديما تو يساعدوني

السلام عليكم
هدا اللينك فيه 2 ملفات صور من المستندات المطلوبة . ولا تزعل

http://www.mediafire.com/?0bqglsqxr8c25ea,a4ncmycnk6do32k
موفقين انشالله

شكراأ اخي بس سمعت انه طالبين درجة في امتحان IELTS صحيح الكلام هدا

حسب ما نعرف شروط درجة IELTS على الجامعة المنسبة اليها.

السلام عليكم
اللي عندي بيه علم ان احد الاوراق المطلوبة هو قبول لغة او قبول اكاديمي.
فكيف يبو درجة 4 في ال IELTS وهم طالبين قبول اللغة.

بس في كلام انه يبو 4 ، مش بريطانيا طلبتها

اختي اولا ان شاء الله موفقة

ثم بالنسبة لدرجة الالت تطلب من الجامعات لغرض القبول الاكاديمي وليس للتأشيرة

بالتوفيق

السلام عليكم
اختي ما توجعيش راسك بالكلام , انا عندي صديق مشي لتونس وتحصل عالتاشيرة البريطانية
بدون الايلس ولا التوفل , وبقبول لغة فقط.
وصديق تاني قدم على السفارة الكندية بقبول اللغة فقط وقبلوا منه الاوراق عادي.
مانيش عارف منين يطلع هالكلام.
وأخيرا ... مادام السفارة في ليبيا تقدري تمشي بروحك وتسألي.
بالتوفيق انشاء الله.

اوخي ، شكرا بس التاشيرة البريطانية متاع صاحبك حتطيح بعد 11 شهر ، وضروري ما يرجع لتونس ويعاود يديرها

السلام عليكم ورحمة الله وبركاته:
اختى ام كلثوم اولا وفقا لندائك اول مرة انتى فى سؤالك تسالى على الجامعات الكندية وبخصوص الامر المتعلق بدرجة الايلتس فى كندا لا توجد عندى معلومة بس تقدرى تشوفى متطلبات التاشيرة الكندية عالنت اما بخصوص الايلتس 4 او 4.5 للتاشيرة البريطانية فهذا امر مختلف تماما فاذا كانت وجهتك وساحتك هى بريطانيا اولا تستطعين ان تقدمى على فيزا طالب زائر لمدة 11 شهر واذا كان لديك لغة واجريت اختبار الايلتس وتحصلتى على 4 او 4.5
فبامكانك الانضمام للجامعة التى ترغبى بيها ولكن شريطة ان تاخذى كورس pre-sessional course وتختلف مدة هذا الكورس وفقا لمعدل الايلتس فكلما زادت درجتك فى الامتحان كلما قلت مدة الكورس واذا تحصلتى على الدرجة المطلوبة عندها يمكنك الالتحاق بالدراسة بقبول غير مشروط اى بمعنى انك استوفيت شروط اللغة وبالتالى تقدمى على تاشيرة تحت بند tier 4 وبامكانك اصطحاب مرافقين سواء زوج او اولاد وهذا مايختلف عن فيزا زائر الذى لاتستطيعى ضم مرافق لتاشيرتك ويضطر المرافق الى ان يقدم على تاشيرة سياحية لمدة 6 شهور كما ان هذا النوع لا يجدد من داخل بريطانيا عندها تضطرين الى ان تجدديها من خارج بريطانيا عذرا لااطالتى ولكن لاازيل عنك اللبس بخصوص بريطانيا
ولكن يمكنك البحث عالنت فيما يتعلق بالسفارة الكندية او توجيه سؤال واضح للموفدين بتلك الساحة
نسال الله التوفيق لى ولك وللجميع

السلام عليكم ورحمة الله وبركاته
بارك الله فيك اخت رواسي ، الحقيقة شرح وافي للتأشيرة البريطانية لأن الكثير يسأل عنها ولا يحصل على اجابة كافية.
وانشاء الله نتحصلوا على معلومات وافية للأخت أم كلثوم على السفارة الكندية قريبا.
شكرا شكرا شكرا...

السلام عليكم ورحمة الله وبركاته :
اخى تيسير الشكر لله اولا واخيرا ونتمنى شرحى ازال اللبس عن قضية التاشيرة البريطانية ونتمنى لااختى ام كلثوم ان تلقى يد العون من اخوتنا واخواتنا فى الساحة الكندية واذا قررت ان تغير للساحة البريطانية نحن موجودون لمساعدتها باذن الله

السلام عليكم أختي أم كلثوم
أنا طالبة موفدة لكندا وتقدمت للتأشيرة في طرابلس يوم 18-12-2011 وقدمت فقط قبول لغة والحمدلله تحصلت على الـتأشيرةيوم 7-2-2012 وأنا في كندا الأن وكل شيء تمام إن شاء الله.
وبالنسبة لمستندات التأشيرة تقدري ترجعي لموقع السفارة الكندية في طرابلس وتلقي كل شيء فيه موجود أهم شيء عندهم تعبي النماذج صح وتجيبي رسالة من مكان خدمتك ورسالة من مكان خدمة المرافق ليك ورسالة القبول متاع اللغة طبعا ورسوم التأشيرة وصور شخصية وشهادة الحالة الجنائية ليك وللمرافقين (تقدري تاخذيها من أي مجلس عسكري) وصور عن الجوازات ورسالة الدعم المالي من البعثات ورسالة من المكتب الكندي (وهذي أهم ورقة وتاخذ وقت ونذكر كل الطلبة اللي قدمو معايا تبهدلو باش حصلوها).
ولأي استفسار ادللي

السلام عليكم شكرا اخواتي واخواني ، بنسالك اختي كيف تنفاعل مع المكتب الكندي شن هي الورقة الطلوبة من المكتب الكندي وتانيا شن هي الورقة لمطلوبة من مكان عمل المرافق
شكرا

المطلوب من المكتب الكندي رسالة دعم مالي لغرض التاشيرة ورسالة دعم مالي لغرض الدراسة.
بالنسبة للورقة المطلوبة من مكان العمل لللموفد وكدلك المرافق افادة بانك تعملي في دلك المكان وكدلك المرافق افادة بانه موظف من مكان عمله والله اعلم

شكرا اختي امنة بس مش رسالة الدعم تكون من ادارة البعتات او لا

السلام عليكم ايه رسالة الدعم من البعثات بس الاضمن انك تكون عندك رسالة الدعم المالي من المكتب الكندي لانه مؤخرا وبالتحديد في سفارة امريكا وكندا رفضوا اعطاء التاشيرات متحججين بعدم وجود العم المالي من المكتب الكندي وكانهم لا يعتمدون رسالة الدعم المالي من الحكومة الليبية!,لذلك الاضمن انها تكون معك و..والله اعلم

وعليكم السلام اختي
بالنسبة لورقة الدعم المالي من المكتب الكندي تقدري تمشي لمشرفة ساحة كندا معاها يخدم مندوب المكتب الكندي وتقوليله تبي ورق الدعم المالي وهو يراسلهم وطبعا لازم تمشي للمكتب اللي فيه نماذج الدعم المالي لغرض لتأشيرة في الدور الأول من البعثات فيه شخص اسه الصادق وموظفة اسمها خديجة عبي النموذج لكندا وعطهم ايميلك وهما يراسلو المكتب الكندي بس ما تعبي عليهم لأن القصة اطول في طلبة قعدو شهر ونص وما حصلو شي.
انا درت هكي وبالاضافة لهكي خشيت لموقع المكتب الكندي وعبيت عندهم نموذج طالب مرشح وبعدين راسلت المسؤولة عن الطلبة الليبيين وبعد اسبوع جتني الورقة.

هذا النموذج اللي ازم عبيه في موقع المكتب الكندي
https://web.cbie.ca/sm/app_nominee.html
وبعد تعبيه صح بياناتك تمشي لمكتب الكندي وبعدها تقدري تراسل المسؤولة واسمها شانا سكارو

SScarrow@cbie.ca
بس لازم ترسليلها اكتر من ايميل كل يوم باش تشوف ايميلك لان هلبة طلبة يراسلو فيها

اما سؤالك عن الورقة المطلوبة من مكان عمل المرافق لازم المرافق يمشي لمكان خدمته ويقوللهم يعطوه افادة بانه يخدم عندهم ويكون اسمه كما في جواز السفر بالعربي وبعدين لما ترجموها يكون الاسم بالانجليزي مطابق ايضا للجواز

وربي يوفقك

بارك الله فيك اخت حنان

اخواتي شكرا وبارك الله فيكم، يعني انا توة نراسل المكتب الكندي ومش ضروري نمشي، لاني بصراحة من مصراتة مش طرابلس فالأسهل اني نراسل. والا ضروري المشي للمكتب؟

سؤال بسيط يا جماعة الخير يعني لازم يكون الطالب الموفد عنده درجة معينة من شهادة التوفل أو الأيلتس باش يتحصل علي التأشيرة و القبول أكاديمي للدراسة في كندا أو عادي يطلع لكندا و يقرا اللغة و يدرس غادي؟

أولا أختي الأحسن انك تمشي للبعتاث وتعطيهم ايميلك خصوصا للموظف الصادق وتقوليله راسل المكتب الكندي وبعد تتأكدي انهم راسلوه تراسليه حتى انتي لان المكتب الكندي ما يبعتلك الورقة لين يوصله تأكيد من البعتاث يعني لين يوصله ايميل البعتاث وانا هكي درت خليت البعتاث يراسلوهم وعلى طول كل يوم بديت نبعثلهم في يميلات لين بعتو الورقة في زمن قياسي.
بالنسبة للأخ مش لازم يكون عندك مستوى معين باش تحصل تأشيرة الا اذا كان قبولك اكاديمي لان القبول الاكاديمي لازم كون مكمل التوفل بس لو قبولك لغة مش لازم يكو عندك اي درجة من التوفل لانك بتقرا غادي
والله ورسوله أعلم

أخت حنان شكرا ليك ولتجاوبك معاي بس بما إنك في كندا أني حاب استفيد منك بقدر المستطاع لأني عندي الرغبة في الدراسة في كندا في المستقبل القريب بإذن الله
سؤالي ليك أني تخصصي علوم علم الأحياء قسم (حاشاك ) الحيوان باهي و نبي الجامعات الكندية الجيدة أو الممتازة في هادا المجال حسب علمك ؟ و شكرا

السلام عليكم
اخواني اخواتي. الاسبوع اللي فات مشيت لادارة البعثات باش بناخذ رسالة دعم التاشيرة، سألت على المكتب الكندي وكيف يتم الاجراء، قالتلي موظفة أن المكتب الكندي متوقف توا ،وخوذ رسالة دعم التأشيرة وتمشي للسفارة بدون مراسلة المكتب الكندي.
فنتمنى ان اللي عنده اي معلومة بالخصوص يتفضل ويفيدنا.
مشكورين خوتي.