السفارة الكندية

السلام عليكم
بالله نبو نسالوا الماشيين لكندا هل بعد تطلع التاشيرة ان شاء الله لازم تكون فى كندا قبل موعد الكورس متاعك...ما مدى صحة هذاالكلام
ولو انه صحيح فما العمل ادا كان موعد الكورس قريب ومازالت الاجراءات تعطل ......افيدونا بارك الله فيكم

وعليكم السلام خوي
هو الاحسن تسافر قبل موعد الكورس باش تتعود على المكان وتستقر وتجهز نفسك لامتحان تحديد المستوى اللي يكون في بداية الكورس بس السفارة الكندية تسمحلك باسبوع واحد غالبا بعد بداية الكورس بعد ما تكمل فرصة الاسبوع ولو انت ما سافرت ماتقدر تخش كندا مش لان تأشيرتك طاحت لا تأشيرتك تكون صالحة عادي بس لان في رسالة محطوطة في ظرف مغلق لما تاخذ التأشيرة تاخذها معاها من السفارة وهالرسالة يكون عليها تاريخ اخر يوم تقدر تخش فيه كندا والتاريخ هذا يكون بعد اسبوع من بداية الكورس الرسالة هاذي مهمة جدا لانك لما توصل كندا في المطار لازم تسلمها لقسم الهجرة باش يعطوك تصريح الدراسة وهذا الكلام عن تجرة شخصية
هذا والله أعلم

شكرا اختى حنان
بس المشكلة ان الكورس يبدا فى شهر 5 والان نحن فى شهر 4 والتاشيرة مازالت وبعدها التوفيض ياخد وقت شهر على الاقل....سؤالى لمن عنده الاجابة هل ادا جبت قبول بتاريخ اخر واعطيتهولهم ممكن يفوتوا الاول علما بانى قد درت الكشف الصحى
وشكرا

يا خوي نصيحة انت خلي قبول جديد بتاريخ بعد شهر 5 جاهز لانهم احتمال يطلبوه منك في السفارة بس لو ما طلبوه خلي تأشيرتك تطلع عادي وابدأ من توا في اجراءات التفويض او البرقية المستعجلة لان دراستك قريبة والبعثات ايديرو فيه الاجراء من قبل للطلبة اللي ما عندهم وقت بس لاسمح الله لو ماحصلت تفويض او برقية مستعجلة خوذ قبولك الجديد وامشي للسفارة بعد تطلع تأشيرتك وقولولهم يغيرولك الرسالة اللي في الظرف المغلق اللي بترفعها معاك للمطار لما توصل كندا لتاريخ جديد بس اهم شي التأشيرة خلها تطلع واذا تبي تمشيلهم في وقت قريب عطيهم القبول الجديد باش من الاول ايديرولك رسالة بالتاريخ الجديد والله أعلم

شكرا جزيلا

wafiganah كتب:

شكرا اختى حنان
بس المشكلة ان الكورس يبدا فى شهر 5 والان نحن فى شهر 4 والتاشيرة مازالت وبعدها التوفيض ياخد وقت شهر على الاقل....سؤالى لمن عنده الاجابة هل ادا جبت قبول بتاريخ اخر واعطيتهولهم ممكن يفوتوا الاول علما بانى قد درت الكشف الصحى
وشكرا

السلام عليكم اخي ... ما عليك فعله اجراء بسيط انك اتراسل الجامعة او معهد اللغة اللي تحصلت منه على القبول و تشرح ليهم ان التأشيرة تأخد في اكثر من شهرين و انك تبي اتاجل الى تاريخ اخر ( شوف تواريخ الكورسات الاخرى و اختار التاريخ اللي تعتقد انه ايناسبك و اطلب التأجيل له) و طبيعي انهم حا ايجلوا لك القبول و اتجيبه للسفارة لاني ان مره سالتهم على نفس القصة في السفارة الموظفة قالت لي اني نقدر انقدم بالقبول الحالي و نطلب تأجيل من الجامعة او المعهد اللي جبت بيه القبول الاول و انجيب لهم و انا اجلت القبول امتاعي و الكلية وافقت .. و السلام

ان شاء الله خير انت طالما درت حتى الكشف الطبي معناها تأشيرتك باذن الله تطلع

شكرا علي التوضيحات ولدي استفسارات:
1- ما هي المدة الطبيعية اللي يردو فيها بعد الكشف الطبي ما يوصلهم
2- الرسالة او البرقية المستعجلة ايديرو فيها عادي بدون اي شي كان تاخرت الاوراق في التفويض
3- اسعار الايجار في لندن كم عادة ومستوي المعيشة كم وهل لازم اتاجر قبل ما اتسافر اولا
مع تحياتي