سؤال لمن سبق له اجراء مقابلة معا السفارة الكندية

السلام عليكم
يا ارايت لو فيه شخص دار المقابلة معا السفارة الكندية ان يخبرنا عن طبيعة الاسئلة واجواء المقابلة ويعض النصائح لاتى معرض لاجراء المقابلة بعد فترة .
ما هى طبيعة الاسئلة وافضل اجوبه عليها ؟وهل ادا الشخص وصل الى مرحلة المقابلة الشخصية يعنى نسبة كبيرة تحصل على التاشيرة ؟

السلام عليكم لو انك موفد علي حساب الدوله للدراسه عند التقديم للتأشيره لا توجد اسئله كلها الاسئله والجواب موجود عنده في الابليكيشنات المرفقه معك الدي ستقدمهم وقت التقديم كإنا ماشي للمكان عادي لو حتي فيه اسئله الاسئله بتكون ضمن الابليكيشن يعني تأكيد المعلومات التي كتبتها في وراقيك

بالضبط زي ما قال الاخ يوسف المقابلة في السفارة الكندية مش مقابلة بالمعنى الحرفي بس هيا تأكيد للمعلومات اللي عبيتها في النموذج ومش شرط يحضرو معاك المرافقين يعني اسئلة روتينية ومافيها اي غموض ومرات ما يسالوك يعني المقابلة ماليها علاقة بالحصول على تأشيرة المهم الملف كامل والنماذج مضبوطة والله أعلم

السلام عليكم
شكرا على الاجابة
بس انا ما شى على حسابى الخاص هل فيه اختلاف بين الى ماشى على حسابة ولى ماشى على حساب الدولة يعنى لو فيه حتى مقابلة حتكون الاسئلة الى موجودة فى الابلكيشن فقط لانه فيه شباب قالولى ممكن يسئلوك شنى الى يطمن انك حترجع الى ليبيا بعد انتهاء الدراسة وايشوفو ردت فعلك ومن الاسئلة انت علاش ما شى الى كندا



وبارك الله فيكم على التعاون

نعم و لكن ذلك كان معي في 2003 و 2008
اتمني لك التوفيق

الاسئلة تتركز حول وضعك المادي في كندا بعد السفر و كيف ستصرف علي نفسك. و اين ستكون وجهتك بالتحديد مع لبراز الاثباتات علي اقوالك. من حيث الوضع المادي فهم يقدرون الكلفة السنوية للحياة للفرد في كندا ب 10,000 دولار كندي = 11,000 دينار ليبي تقريبا.
وفقك الله لكل خير

بارك الله فيك اخى انشاء الله خير

,السلام عليكم انى مريت بتجربة المقابلة الشخصية مرتين فى السفارة الكندية بس كانت فى تونس مش ليبيا وهذا الكلام فى عام 2001 و2002 وتم رفض منحى التاشيرة ومع العلم كنت ماشى على اساس دعوة من صديق وفى الاول قالولى ارجع بعد 6 اشهر ونعطوك التاشيرة ولم ارجعت بعد 6 اشهر اتفجاءت بانهم قالوا لا .........وبصراحة كانت الاسئلة مركزة يعنى اتقول تحقيق وين سافرت قبل وليش ماشى الى كندا ومن هذا القبيل ....وشكرا

لا لا تو هدا كله مش موجود كله استفسار علي حسب المعلومات الموجودة في الابليكيشن

السلام عليكم شنو توا .. في مقابله لو علي حسابك الخاص ولا لا .. وزعما شنو الاسئله طمنونا اللي ايطمنكم

السلام عليكم شباب
انا حاليا واصلة في مرحلة التاشيرة و قاعدة مدرتش موعد في السفارة لانه قاعدة حاصلة في ورقة حسن سيره و سلوك و محصلتهاش لتو ا و انشاﺀ خير زعما شن رايكم نمشي نحجز موعد من توا و الا شن تنصحوني? و هل فعلا زحمة و طوابير جمعيات? و كيف الحل لو كان بالشكل هذا??!!

مشكورين جميعا

انقولك حاجه جيبها من الشغل بتاعك حسن السيره والسلوك وعلي السفاره انا سمعت اليوم وللاسف انهم سكرو
ولكن لو فتحو اطلع بدري راهو ياخذو في رقم معين 6 لو ا10 .؟؟؟

السلام عليكم أختي بخصوص ورقة حسن سيرة والسلوك أو شهادة الحالة الجنائية تقدري تاخذيها من أي مجلس عسكري وأكيد لو عندك حد من الثوار يخدمك وتحصليها في نفس اليوم بس مع احترامي لرد الأخ ما تاخذيها من مقر عملك لانها ماليها علاقة بيه هي في الاصل شهادة براءة وخلو سجلك من السوابق العمل مش جهة قانونية او قضائية
وبالنسبة لموعد السفارة ما تقدري تاخذي موعد الا اذا مشيتي للسفارة يعني في نفس اليوم ومافيه مشاكل الحاجة الوحيدة اللي اديريها امشي بكري حتى من الساعة 7 الصبح وتلقي في موظف امن تو ياخذ اسمك ويقولك ارجعي بعد ساعة او اكثر باش تخشي تقدمي اوراقك على طول يعني مافي تعقيد المهم الحضو بكري
وربي يوفقك

شكرا جزيلا اخي baumond و اختي الكريمة حنان علي ردودكم و حسن تعاونكم
الحمد لله امس كيف حصلتها بستين واسطة بحكم انه المجالس المحلية بدو يلغوا فيهم اول بأول فلهذا واسطة و اجري وكلم فلان و من ذاك القبيل. و اهو اليوم حطيتها للترجمة و انشاﺀ الله بنمشي الاحد ندير موعد. عندي استفسار في افاده السيرة و السلوك كاتبين هذا المواطن لا يوجد عليه قيود امنية في هذه المنطقة زعما تفي بالغرض عند السفارة و الا يتشرطوا متعجبهمش?

و لكم جزيل الشكر جميعا:-)

يا صاحبي راهو انا درتها في الشركه بتاعي ومشت امورها وقبلوها مني .. ما ايهمش اهم شي مختومه وموقعه في المجلس المحلي اللي خذيتها مناا

بالنسبه للموعد في السفاره اليوم صديقي مشي للسفاره وعطوه موعد بعد يومين لانه زحمه قالوله وياخدو في 6 او 7 ارقام

قبل كانو يسجلو برا في الستعلامات الصبح بدري بس توا تجي للسفاره وتسجلي اسمك وكان مش زحمه تاخدي موعد 2يوم

شكررا جزيلا يا اخي. DDjonta
بالله قولي زعما الخميس يخدموا كان هكي الواحد يمشي غدوة مش عالاقل يحصل موعد الاحد او الاتنين

لا يا اختي ما يخدمو الخميس لو قاعدين كيف قبل نظامهم
موفقة

شكررررا جزيلا اختي حنان دائما ردودك شافية و كافية و ربي يحفظك و ينورك زي ما تنوري فينا جميعا:-)

kideadevil كتب:

شكررررا جزيلا اختي حنان دائما ردودك شافية و كافية و ربي يحفظك و ينورك زي ما تنوري فينا جميعا:-)

الله يبارك فيك على الكلام الرقيق ربي يوفقك واي خدمة راسليني