وكيل وزارة التعليم العالي يقول ان الأولوية في الأيفاد للثوار !!!!! ولم يذكر موفدي قرارات شهر 3 حتى بكلمة واحدة

وكيل وزارة التعليم العالي فتحي العكاري يقول في مؤتمر صحفي ان الأولوية في الأيفاد ستكون للثوار,وكأنه نسي ان هناك الاف الطلبة لديهم قرارات ايفاد لم تنفذ بعد بينهم اوائل ومعيدين وأعضاء هيئة تدريس بالجامعات والمعاهد العليا ,شكرا لك يافتحي العكاري ,تصريحك صحيح انه غير مسئول لكنه من وجهة نظري مفيد وجاء في وقته على الأقل يساعدنا في موضوع الأعتصام يوم 2\5\2012 .

ياخوي بدون شك قال ولا ماقالش هاذو لازم ينفدو قراراتنا غصبن عنهم او وألله سنطالب برحيلهم فورا وكان مافيش حد استجاب القضاء في ليبيا موجود ونرفعو فيهم قضيه ونحن معانا حقوقنا و الحق معنا و عليهم وتوا يشوفوا

يا عليك حكومه وخلاص شفشفي كان جابولك راس

wiener كتب:

وكيل وزارة التعليم العالي فتحي العكاري يقول في مؤتمر صحفي ان الأولوية في الأيفاد ستكون للثوار,وكأنه نسي ان هناك الاف الطلبة لديهم قرارات ايفاد لم تنفذ بعد بينهم اوائل ومعيدين وأعضاء هيئة تدريس بالجامعات والمعاهد العليا ,شكرا لك يافتحي العكاري ,تصريحك صحيح انه غير مسئول لكنه من وجهة نظري مفيد وجاء في وقته على الأقل يساعدنا في موضوع الأعتصام يوم 2\5\2012 .

يعني شن هالقصة ليبيا من يوم صارت وهيا ثائرة قبل كنا في اللجان الثورية وتوا ولينا في الثوار ربي يستر ما يطلعلنا مشفشف والا مشفشفين جدد ونعاودو السريب من الاول (سريب العازة )
المفروض يكملو قرارات شهر 3 مش يفتحو باب جديد بعدين الثوار مع احترامنا للشرفاء ساد منهم فلوس وخذو وحتى الايفاد توا ياخذو غير يخلو مكان لقرارات شهر 3
الحكومة مش عارفة شن ادير باش تسيطر ع الثوار وعقابها رشوة بالايفاد

هذا رابط المؤتمر الصحفي لفتحي العكاري ,واسمعوا بروحكم ,بدل مايكون معيار الأيفاد هوا الكفائة يتكلم عن الثوار والأولوية للثوار , وكأن الأف الطلبة اللي صدر لهم قرارات ايفاد في شهر 3 ليسو بشر أو ليست لديهم حقوق ,ولاحظوا انه تكلم على ترشيح المعيدين الجدد ,ولم يتكلم علي المعيدين اللذين صدرت لهم قرارات ايفاد , بالله عليكم هل هذه وزارة فعلا, عمرك سمعتم بوزارة ترشح في المعيدين الجدد للدراسة في الخارج قبل ماتنفذ قرار ايفاد يخص المعيدين الأقدم منهم .
https://www.youtube.com/watch?v=K7hxSszqkUQ&context=C48b9224ADvjVQa1PpcFNzkDq8X9RY9NTme267jmbAmTz4SfQIJ8Q%3D

الصراحة مادام المسئولين هكى تفكيرهم
معناها تكرار لسيناريو اللجان الثورية والمثابة والجيش الشعبيى وغيرها من الخزعبلات
من هو الى ماتارش على القدافى تى حتى حناى مسكينها تدعى عليه ليل نهار
لازم نتحركوا ونوحدوا صفوفنا ونوصل صوتنا للحكومة كلها وللاعلام ومنظمات المجتمع المدنى

يعني لو في ثائر مش معيد او عضو هيئة تدريس ولا مش عنده كفاءة علمية... هل من الممكن أن يدرس ماجستير او دكتوراه في الخارج؟؟

أي حد تفوق في دراسته له الأولويه في الايفاد سواء كان من الثوار أو غير الثوار ...أما أذا كان من الثوار وليس لديه شهاده فلابد الاهتمام بهم بأيفادهم في دورات تدريبيه أو أقامة وزاره تهتم بهذه الفئه في المجتمع..

مفروض ميقولش الأولوية للثوار مش تنزيل من قيمتهم لا بالعكس تماما بس نحن قاعدين نتكلمو على ايفاد للدراسة مش قروض والا سلف
بس ماعندى مانقول صبرا جميل والله المستعان

حسبي الله و نعم الوكيل

تعريف الثائر هو شخصص يثور ضد الظلم و يؤدي واجب وطني فلو جيتو للحق حتى فلوس مش لازم بس معليش الدولة كريمة لكن مش لدرجة تهميش باقي المواطنيين و كل شي يمشي للثوار؟؟؟؟ كيف صار هكي

الثوار هم من جعلوك تفكر بالاعتصام وتفكر في تغير الاشخاص
فلا يكون لهم الاولويه في الايفاد اتقو الله في انفسكم
كنتم لاتسطيعون اللفظ بكلمه واحده في حقبة المقبور

محمد المرامي كتب:

الثوار هم من جعلوك تفكر بالاعتصام وتفكر في تغير الاشخاص
فلا يكون لهم الاولويه في الايفاد اتقو الله في انفسكم
كنتم لاتسطيعون اللفظ بكلمه واحده في حقبة المقبور

ياخوي مع احترامي لرأيك بس نخالفك فيه
أولا الله قبل الجميع اللي فضل علينا بنعمة الحرية ومش بأيدي الثوار بس حتى المجتمع الدولي والناتو ليه دور كبير
وإذا كنت تتكلم على عصر المقبور نحب نقولك مئات الأشخاص قتلوا وتم نفيهم خارج ليبيا ووضعوا في السجون من السبعينات زي معركة باب العزيزية وانقلاب ضباط بني وليد في 93 يعني كان عندنا صوت حتى ولو كان غير مسموع بشكل واضح
واذا تحكي على تقوى الله ربي يرزقها لكل مسلم بس شوف بعض الثوار أو أشباه الثوار شن ايديرو وتعرف من المفروض يتقي الله
ليبيا لينا كلنا ومافي حد لازم ياخذ ثمن لانه شارك كيفه كيف غيره في تحريرها حتى ولو ماحمل سلاح حتى بدعوة طيبة بس المهم شارك بشيء

عليك بتقوى الله إن كنت غافلا *** يأتيك بالأرزاق من حيث لا تدري
فكيف تخاف الفقر والله رازق *** فقد رزق الطير والحوت في البحر
ومن ظن أن الرزق يأتي بقوة *** ما أكل العصفور شيئاً مع النسر
تزول عن الدنيا فإنك لا تدري *** إذا جن عليك الليل هل تعيش إلى الفجر
فكم من صحيح مات من غير علة *** وكم من سقيم عاش حيناً من الدهر
وكم من فتى أمسى وأصبح ضاحكا *** وأكفانه في الغيب تنسج وهو لا يدري
فمن عاش ألفاً وألفين *** فلابد من يوم يسير إلى القبر

الدولة لا تبنى بالمجامالات ياسيادة الوكيل. الايفاد له معايير يجب ان تطبق بحذافيرها لا بالخوف من من يحملون السلاح ومحاولة ارضائهم بكافة السبل على حساب الاخرين

كان على الثورة كلها ثارت ..من اللي ما دفعش فلوس بش يشروا سلاح للثوار.. من اللي ما طبخش و بعث اكل و مشروبات للثوار في الجبهة.. من اللي ما اتصلش او ما بعثش اس ام اس للقنوات الفضائية ويبلغ على جرائم معمر ويشجع في الثوار .. من اللي ما مشاش لساحات الاعتصام .. من اللي ما دعاش بالنصر لثورة 17 فبراير ... من اللي ما صامش كنوع من الرباط لغاية ما ربي ينصر الليبيين في ثورتهم ..من ما تبرعش بدمه للثوار .. من ما تبرعش بملابسه للثوار في الجبهة .. من ما عطش حوشه للثوار او سيارته .. الليبيين كلهم ثوار ..مش بس الناس اللي مشت للجبهة .. والمفروض الحكومة اللي توة قاعدة ما تتصرفش بفلوس ليبيا هي مؤتمنة على حفظ المال العام لغاية ما تجي الحكومة الدائمة اللي المفروض تخطط لمستقبل ليبيا ..للاسف الحكومة الحالية قاعدة تتسبب في فتنة بين الليبيين من غير ما تنتبه

حسب رائي انا انه الناس اللي توة حاملة للسلاح كلها مش توار
كلها جماعة كبر وخبش