سؤال بسيط!!!!

من منكم يبي يمشي لجامعة (اوتاوا) في مقاطعة اونتاريوا بكندا,,,,

اللي عنده معلومه علي اسماء معاهد اللغه الانجليزيه في اوتاوا,,,,,ينورنا
واي حد عنده اي معلومه ولو بسيطه عن جامعة اوتاوا لا يتردد,,,ويحرك الكيبورد شويه...

وشكرا لوزا

انا نقصد المعهد الي يكون تابع للجامعه اوتاوا,,,,,ايوه,,افطنوا من توه
بصراحه ما عندي نيه اندير سيرش ولا نفتح القوقل,,,,صوابعي يوجعن فيا

اللي عده لاوتاوا يعطيني فكره وخلاص

شن رايكم في معهد GEOS Language School
موجود في 207 Queen Street, Suite 100, Ottawa, Ontario, K1P 6E5, Canada

نحسه كويس,,,,,قولولي ها انسجل فيه ولا لالا

حق ربي جو شين اللي قاعد ايسير
يعني نسأل ونجاوب بروحي,,,,مش حل هذا يا جماعه!!!!

هكي ما ايسير شئ,,,اي حد يجاملني ,,يعبرني,,,يحسسني بوجودي
يحسسسني اني موفده بجد!!!!

ايحاجه في اي حته

معهد GEOS معهد خاص. فوووووووووووووووتيه خيرلك. موش أمتاع أقراية رسمي، بزنس خاص وبس. ممكن تتعلمي منه إنجليزي مخالطة موش إنجليزي أكاديمي يهيئك لدراستك الأكاديمية

جبرت بخاطري وخلاص,,,بس ارفعلي معنوياتي توه,,,,شن رايك في

St. Patrick's Adult School.او .St. Joseph's Adult School
او Queen of the Angels Adult School
اوKanata Adult ESL

اي حد يرفعلي معنوياتي يا جماعه

انا لقيت العبارة هذي,,,,,وحسيتها رفعت معنوياتي

"Ottawa's Best ESL Schools"


St. Patrick's

St. Joseph's

الدوه الي فوق صح ولا غير دعاية,,,,,,,

هههههههههههههههههههههه اخي استهلال معلش هذا تأثير الايفاد


انا اصلا حاطه عيني علي اوتاوا,,,,,حسيت بحب اتجاها وميول
وقلت نحصل معهد يكون اما تابع للجامعه او موجود في منطقة اوتاوه

علي فكرة الزبيبه هي بنت خالي,,,,يعني ماعدتش بعيد,,,فيه اصلا صلة قرابة

السلام عليكم لوزة،

أكيد جامعة أتاوا من أقوى و أعرق الجامعات الكندية، وعندهم معهد لغة خاص بيهم. المعهد فيه تقريباً حوالي 6 مستويات وكل مستوى 3 شهور. عن نفسي درست في معهدهم سمستر واحد وبعدين إضطريت أني أنغير المقاطعة مرة وحدة، والسبب ماحصلتش قبول أكاديمي من أتاوا. المعهد وطاقم التدريس اللي بيه معقولاً جداً ويعتبر أحسن معهد لتدريس اللغة أكاديمياً في أتاوا المدينه.
أخت لوزة، نصيحتي لو تضمني حصولك على قبول أكاديمي من جامعة أتاوا، توكلي على الله وأدرسي اللغة في معهدهم. نقطة ثانية، جامعة أتاوا في بعض التخصصات مثلاً زي الهندسة، إذا كان الطالب دراس مواد البكالوريس بالأنجليزي راح يعفوه من اللغة ويقدر يدرس أكاديمي طول. صديقي واخذ بكالوريس هندسة من جامعة (طرابلس) الفاتح سابقاً وقاري المواد بالأنجليزي عطوة قبول غير مشروط باللغة.

الملخص، أتاوا كجامعة + مدينه جميلة جداً و مريحة. خصوصاً للعائلات

إن شاءالله أنكون قدمت اللي فيه الفايدة، ولو محتاجة لآي إستفسار ثاني تفضلي وربي يقدرنا علي خدمة الجميع.

ربي يوفقك لما فيه رضاه و فيه صلاحك

السلام عليكم

لوزة المعاهد اللي ذكرتيهم موش مارات عليا في أتاوا. بس متأكد أنهم معاهد خاصة، فلذلك فوتيهم وركزي على معاهد اللغة التابعة للجامعات فقط

اب ليبيا ربي يخليك للغلابا واليتاما الي كيفي

عطيني الزبده كلها

انا معيدة في كلية الصيدله وواخذة المنهج كله بلانجليزي واخري واخذه كورسات انجليزي
والاسبوع الجاي عندي امتحان توفل,,,,,

السؤال هنا شن اسم المعهد الي درست فية وهو تابع لجامعة اوتاوا
وين يقع بالزبط,,,عطيني ايميله او موقعه,,,او حتي اسم الشارع,,,جيرانهم اي حاجه

ماعندكش مشكلة يا لوزة وتفضلي في أي وقت. أول شي ربي يوفقك في أمتحان التوفل الجاي وإن شاءالله أتجيبي الدرجة اللي تطمحيلها.

وبالنسبة لتخصصك الصيدله في أتاوا والله ماعندي عليه أي معلومة، بس لو حابه أول مانحصل فرصة راح نبحثلك عليه. معهد اللغة هو رسمي تابع لجامعة أتاوا و لما تلتحقي بالمعهد وتكملي جميع المستويات عندهم يدخلوك للتخصص طول من غير مايطلبوا عليك درجة في الأيلس أو التوفل. موش بالضروري جميع المستويات بس المهم تجتازي المستوى الأخير واللي هو ال500

هذا عنوان المعهد + الصفحة الألكترونية للمعهد:

Official Languages and Bilingualism Institute (OLBI)
600 King Edward Ave.
Room 114
Ottawa ON Canada
K1N 6N5

http://www.olbi.uottawa.ca/en/index.php

إي إستفسار ثاني تفضلي.. وبعدين وين درتيني أب ليبيا مرة وحدة، واجد عليا

سلام

pharmacology

لالالالا كلمة فارماكولوجي هي عباره عن ماده من ضمن مواد الصيدله
لان الصيدله تخصصات والفارماكولوجي تخصص في الصيدله

انا تخصصي شئ اسمه herbal medicine
الاعشاب الطبية

شكرا اخي استهلال وزيد ابحثلي ربي يخليك يا ولد الشرارة الاولي بيش ندعيلك

لا pharmacology تخصص كامل قام بذاته فى الصيدلة وهو علم ألادوية

pharmacy is the science and pharmacology and herbal medicine are specialities
اهلين باخواتي واخواني الصيادلة واخيرا شفت صيادلة في المنتدى ربي يوفقكم كلكم

توه انت يايوسف تبي تفهنمي شنو التخصصات الي في الصيدله بعد 5 سنين دراسه واربع سنين معيده,,,,,,يعني انا مش عارفه شنوا هي pharmacology

شن نبي انقول بس انا تخصصي نااااااااااااااااااااااادر واسمه pharmacognosy

there is a huge difference between both
pharmacognosy &pharmacology

my regards
ur sister lozza

لكن العقاقير مش هى طب ألاعشاب

but not same subject pharmacognosy and herbal medicinal

معليشي اختي لوزا بس اواتاوا يقولو معيشتها غالية هلبة

السلام عليكم أخي Inception

على ما اعتقد بأن الصيدلة تسمى ب Pharmaceutics، أو Pharmacy زي الصيدلية. ولو تبي تبحث عن الصيدلة كتخصص تلقاه في العادة تحت Pharmacy and Pharmaceutical Sciences أو تحت مسمى Pharmacy فقط.

هذي المعلومة اللي عندي والله أعلم..

بالتوفيق و أسف على التأخير في الرد

سلام

أختي أم كلثوم، أقمت فترة 6 شهور في أتاوا، والصراحة مقارنة بمدن كثيرة في كندا تعتبر أتاوا أرخص منهم. وبعدين في العادة كل حد وله تجربته الخاصة، ومن ضمنهن السكن. فيه اللي يسكن في وسط المدينه ويكون قريب من كل شي ويقدر بأن السكن غالي، وفيه اللي يسكن بعيد أشوي عن السنتر ويعتبر الحياه موش غالية.

سلام