معلومات للخريجين المقيمين خارج مدينة طرابلس

السلام عليكم ورحمة الله وبركاتة.
أنا من بنغازي ولما تميت الثانوية التخصصية تم تنسيبي للمعهد العالي للطيران المدني والارصاد الجوية "إسبيعة" فمشيت غادي وقريت وتخرجت في دفعة خريف 2008 .
أمس اتصل بيا صاحبي بارك الله فيه وقاللي المعهد باعث اسمك للتعليم العالي على برنامج الايفاد , اليوم اتصلت بالمعهد وقالولي فعلا بعثنا اسمك لكن مش معروف شن فيه.
فحبيت اندير عنوان يساعد جميع الخريجين الذين يقيمون خارج طرابلس لصعوبة التواصل مع التعليم العالي , فياريت يا شباب و شابُات العاصمة توافونا بآخر المعلومات وهل في قرار بالكلام هذا وكان فيه كم رقمة.

وبارك الله فيكم ,,,,,,,,,,,, وعاشت ليبيا حرة أبية

السلام عليكم أخي ادارة البعثات طلبت من الجامعات والمعاهد العليا ترشيح الطلبة الاوائل فيمكن ايكون اسمك من بينهم مع تمنياتي بالتوفيق

الف الف مبروك اخي

دخلت معانا مشوار الالف ميل

السلام عليكم اخي الصادق آجي

اذا تريد المساعد اعطيني اسمك ثلاتي ..وان شاء الله خير

السلام عليكم ورحمة الله وبركاتة
انا اول امس سافرت من بنغازي لطرابلس بخصوص موضوع الايفاد للطلبة الاوائل وبعد جهد جهيد توصلت للآتي واللي حبيت ان نشارككم فيه كي يعم النفع :-
أولا : خريجي الجامعات عليهم التأكد من أن الجامعة التابع لها الخريج قد أرسلت إسمه لوزارة التعليم .
ثانيا : خريجي الكليات التقنية عليهم التأكد من أن الكلية التابع لها الخريج قد أرسلت إسمه الهيئة الوطنية للتعليم التقني الكائنة في المعهد الوطني لإعداد المدربين "السبعة".
ثالثا : خريجي المعاهد العليا عليهم التأكد من أن المعهد التابع له الخريج قد أرسلت إسمه للهيئة الوطنية للتعليم التقني والفني الكائنة في المعهد العالي الصحي أبوسليم خلف مستشفى الحوادث.
وأنا تنطبق عليا الحالة الثانية لكن توصلتلها آخر شي لأني مش من سكان طرابلس وما عنديش سياره لكن فيها خيرة على الاقل لنقل الاخبار الصادقة.
و الان بعدما راجعوا القوائم للخريجين ارسلوها لوزارة التعليم العالي الذي بدوره سوف يصدر قرار بالايفاد في الايام "القادمة"
فالآن كل ما عليك فعله عزيزي الخريج هو مراحعة الجهة اللي تخرجت منها كل اسبوع ع الاقل أو اترك رقم هاتفك عند رئيس قسمك للاتصال بك في حالة صدور القرار للمبادرة في الخطوة الثانية.
إن شالله انكون ساعدتكم.
وبارك الله فيكم وبالتوفيق للجميع

الصادق آجي