تحية طيبه
التقديم على التاشيرة الالمانية سهل جدا فلا تدخل نفسك فى دوامة التوتر,,,
عليك اخد موعد عن طريق المنظومه الإلكترونيه فى موقع السفارة ويجب عليك الدخول عليها مرارا وتكرارا لكى تتحصل على اقرب موعد لأن بعض المواعيد السابق أخدها تُلغى من قبل اصحابها ..
الاوراق المطلوبه هى
1 شهادة المرحلة الثانويه وكشف الدرجات.
2 الشهادة الحائطية الكرتونية الجامعيه
3 الشهادة الجامعيه الورقيه
4 الشهادة اللى فيها شهر الامتياز
5 كشف الدرجات.
وهكى اصبح عدد الشهادات 6.
الشهادة امتع الثانوى وكشف الدرجات لازم ينختم بختم حرارى لونه احمر تقريبا من وزارة التعليم بس بعدين إنزيد انتاكدلك من اوراقى لانهم حاليا مش معاى بعد الخطوه هذة لازم تعتمد كل الشهادات السته من مركز ضمان الجودة اللى فى النوفليين بجانب مصحة المختار وطبعة ارفع نسخة وحده من كل شهادة سواء اكانت انجليزى او عربى ..
6 شهادة وهى عبارة عن ورقه يكتب فيها معلومات بسيطة عنك من جهة العمل يعنى تمشى لشؤون الطبيه امتع المستشفى ايديروهالك مفادها امتى باشرت معاهم العمل وفى اى قسم ولو اجتزت امتحانات زماله وحاجات زى هكى واهم شئ يكتبوا انك لاتزال معهم الى الان ,,,وفى بدايتها يكتبولك الى من يهمه الامر وايوقع عليها دكتور الشؤون الطبيه مع الختم.
7 فيه ورقة تانيه اتجيبها من الشؤون الإداريه والماليه فى مكان العمل مفادها انك التحقت بالعمل بتاريخ كذا وفى اى قسم وانك حسن سيرة ومتفانى فى العمل ...عموما انت قوللهم نبي شهاذة خبرة احنا هكى ايسموا فيها عندنا يعنى تلقاهم دايرينها لكذا طبيب قبلك وخليهم يكتبوها بالعربى وطبعا عليها توقيع وختم الشؤون الاداريه فى المستشفى...يعنى فى المجمل محتوى الورقتين واحد بس وحدة من الشؤون الطبيه مكتوب عليها شهادة والتانية من الشؤون الاداريه والماليه مكتوب عليها شهادة خبرة.
توا هكى عندك 8 اوراق صح؟
سته منهم شهادات واثنين من جهة العمل...الاوراق الثمانيه تزيد عليهم ورقه الدعم المالى لغرض التاشيرة هكى اصبحوا 9
طبعا انا اوراقى رفعتهم لمترجم قانونى بجوار ميدان الجزائر اسمه الخبرة ..طبعا تسلملة الاوراق وهو يتكفل بالترجمة والتصديقات فى وزاة التعليم والخارجيه المهم ايرجعهملك كاملات وجاهزات بدل ما تمشى تختمهم بنفسك او براحتك زى ماتحب
طبعا المبلغ المالى لا يتجاوز 200 دينار ..
بعد الخطوة هذة تستلم الاوراق التسعة مترجمه ومختومه وعليها حتى الدمغات تحط معاهم ورقه القبول للغة اللى هى فى الاصل ورقتين وحدة من معهد القوتا والتانية من السفارة الليبيه ببرلين وطبعا مايبوش لا ترجمة ولا تصديق لانهم بالالمانى وجاهزات توا هكى عندك 11 ورقه صح؟
مع 11 تحط صورة من جواز السفر عربى وانجليزى ولو كان فيه تجديد والورقه اللى فيها الختم الالى وصورهم كلهم فى ورقة وحدة اريح توا هكى 12 صح؟
من كل ورقة تصور نسختين مع مرعاة مايلخبطولكش فى التصوير اوقف عليهم بنفسك وكل ورقة ايرجعوها لمكانها ..
وهكى تمت قصة الاوراق
طبعا تمر على مركز تصوير فتوغرافى وتقوللهم نبي صورة شخصية للتاشيرة الالمانيه وخلفيتها بيضاء...تاخد منهم 3 صور و
توا راسا تمشى لمكتب ابابيل بجانب السفارة وتعطيهم الاوراق هذة حتراجعهملك ابلة حميدة وتعبى ابليكيشن من ثلاث نسخ يحتاج لتوقيعك ...
وهكى اصبح عندك 3 نسخ من الاوراق وحدة اصليه و2 كوبى وتكون جاهز للمقابلة فى السفارة اللى تمشيلها قبل موعدك بنص ساعة ودير حساب الزحمة فى الطريق وترفع معاك جواز سفرك 100 دينار وتدخل عادى وبإذن الله ايكملولك من عندهم ويعطوك واصل وترجع تاخد تاشيرتك...
تحياتى..وموفق بإذن الله.
ترجمة الاوراق الرسمية