استفسار صغير

السلام عليكم ورحمة الله وبركاته
انا فى الاسبوع الماضى درت مقابلة فى السفارة لكن لقيت طالب يمشى ديمة لكندا قالى ان 80 من المية من القبولات يرفضو فيهم هادى سياسة السفارة فى ليبيا هل هدا صجيح

السلام عليكم
انت قلتها بروحك.... ديمة يمشي لكندا. هذا معناه انه تحصل علي فيزا.
ممكن الوقت الحالي فيه شوية تشدد مع الليبيين نتيجة لظروف اللي تمر بيها ليبيا الحبيبة لكن كون ان الرفض يوصل ثمانين بالمية اعتقد ان هذه نسبة مبالغ فيها جدا جدا
توكل على الله وانشالله خير وليبيا حرة ابية

مع احترامي للطالب بس النسبة مبالغ فيها جدا هما بالتأكيد يرفضو في بعض الطلبات بس مش 80% مستحيل انت طالما قدمت ع التأشيرة ديما خلي توكلك على الله (ويرزقه من حيث لا يحتسب ) ربي يرزقك الخير والتأشيرة

ياخوي بالنسبة للرفض لا مدايريله نسبة لاشي . غير احني الليبيين هكي اللي يمشي لمكان ماذا بيه إيطلعه أصعب مكان في العالم وكان يلقى مايمشيلاش ليبي تاني . وبالنسبة للتأشيرة وعملية القبول والرفض تعتمد عليك إنت . لو إنت أوراقك تمام وماناقصك شي يقبلوك . ولو أوراقيك ناقصات مش حيقبلوك . وتعتمد على الإسلوب اللي بتتكلم بيه . لأنه الموظف اللي بيدير معاك المقابلة خبير وبيسئلك أسئلة إنت تقول عليها تافها لكن هو بيستنتج منها إجابات لأسئلة تانية . لما اني درت المقابلة في السفارة الامريكية مش الكندية . الاخ اللي دار قبلي المقابلة سئلوه من بيصرف عليك قاللهم بوي قالوله شن يخدم بوك قاللهم عنده مزرعة وطانطات . المترجم التونسي قاله شني طانطات
مسكين رفضوه . لانه مايعرفش يتكلم ويحرك فيه ايديه هلبة ويكلموا فيه وهو متكي على الروشن
وموضوع النسبة الغيه ياخوي من راسك لافيه نسبة ولا شي . انت ونصيبك

بارك الله فيك خوى موفد والله كلامك ايريح القلب وكلامك صحيح ما فيش نسبة ممكن تكون فى نسبة قبول او رفض فى وضع ملفك انت الى مقدمه وطريقة واسلوب ردك فى المقابلة .
بس عندى سؤال لى خوى موفد انا قدمت ملفى فى 8-5-2012 فيه شخص موطف ليبي محترم الحق جدا هو الى يستلم فى الملفات هو يتاكد من الملف هل هو تام او ناقص ولى ملفه ناقص يقولة كمل ملفك وتعالة ولى تام ياخده منه بس لحطة منه انه مرة مرة يسئل فى اسئلة بطريقة مفاجئة يعنى هل هدا الموطف ليه دور فى التاشيرة ام هو مجرد مستلم للملفات وبعدين يرجع الامر للموطفيين الكنديين فى السفارة وحسب علمى انه الملفات يبعتة فيهم الى تونس او من غادى يا يرفضوك او يقبلوك هل هدا الموطف ممكن يساهم فى التاشيرة لانه هو يعتبر موطف يستلم فقط فى الملفات بس هو فعلا مرة مرة يسئل ويشوف فى طريقة الرد ووضع ملفك ؟

يا خوي الموظف هذا صح ليبي بس زيه زي أي موظف كندي و هو نفسه اللي دار معايا المقابلة (زي ما تسمو فيها ) وعلى فكرة ما تقلق نفسك أكثر من اللازم في فرق شاسع بين مقابلة السفارة الامريكية اللي مهمة لتحديد هل بيعطوك التأشيرة أو لا؟ وبين مقابلة السفارة الكندية اللي فقط جزء مش مهم هلبة وهذا الكلام من السفارة نفسها يعني لما قدمنا ع التأشيرة انا وزوجي انا بس مشيت ودرت المقابلة بروحي وحصلنا التأشيرة وحاجة ثانية هما أهم شي عندهم أوراقك كاملة خصوصا النماذج و من بيصرف عليك وورقة المكتب الكندي والباقي شكليات
ربي يوفقك

بارك الله فيك اختى حنان على الرد .هل انت درتى كشف صحى ؟وهل السفارة اتصلو فيك او بعثولك ايميل باش اديرى كشف صحى ؟

ربي يبارك في الجميع
بخصوص الكشف السفارة من تونس اتصلو بينا وبعتولنا ايميل بعد مرور تقريبا شهر من تقديمنا والايميل هذا كان فيه نموذج نرفعوه للسفارة في طرابلس ونختموه من عندهم بيش نقدرو نديرو الكشف الطبي بس ممكن يتصلو بيك بس وما يبعتولك النموذج وتلقى النموذج قدامك في السفارة في طرابلس هذا والله أعلم
ربي يوفقك