نبي منكم نصيحة بالله ( الزواج قبل او بعد التقديم على الإجراءات)

السلام عليكم
صباح الورد جميعا
نبي منكم نصيحة بالله عليكم , ربي يفتح عليكم و يجزيكم ألف خير
انا عندي ايفاد توا تبع احد القرارات الصادرة من قبل الوزارة مأخرا, و راح اتجوز ان شاء الله بس مش حاب نتزوج توا قبل الصيام لكن فيه شخص قال لي الاوراق حيطلبو منك اعزب او متزوج و من بينها ورقة التفويض المالي و التأشيرة و مش عارف ايش و قال لي لازم تقرأ الفاتحة توا من شان ما تتشحور بعدين في الاوراق لأنه يمكن ايكون السفر في شهر رمضان ع حسب قوله طبعا.
بالله عليكم نبي نصيحة من الناس العاقلة و اللي تفهم في الموضوع هدا
هل صح لازم نتزوج توا من شان الاوراق و الا نقدر نتم اوراقي ع اساس اعزب و ما نتشحورش يوم السفر و يتمو لي اوراق التفويض بسرعة بارك الله فيكم
أستودعكم الله جميعا

اسمع من شان ما تتشحور وتعاود الاوراق من جديد,,,,اقرا الفاتحه علي العروس
وبورقة الفاتحه تم اوراقك,,,,,لانك بورقة هذي تعتبر مرتبط وتقدر تاخذها معاك,,

بس سماطه تاخذها معاك بدون فرح,,,,,طلع الفرح وخوذها من شان الله

خوي دير زي ما قالك صديقك ... و ألف مبروووووك مقدماً .

السلام عليكم اخي libyana79
انى صار معاي نفس القصة , ونصيحة الاخت لوزا تمام , انى قريت فاتحتي وبعدين امشيت الي السفارة البريطانية بصحبة زوجتى وطلبو منى عقد الزواج مختوم قريب 4 اختام اخري يعنى من وكيل النيابة والقاضي " المحكمة الابتدائية " و وزارة الداخلية " اللجنة الشعبية للامن العام سابقا" في الفلاح نسخة اصلية ومعاه صورة طبق الاصل .
او تستخرج كتيب عائلة كان عندك وقت

الله يبارك فيكم جميعا
و عقبال اللي ع باب الزواج يا رب

تسلمو يا رب كلكم كلكم

اخي الكريم الجامعة والدولة تحكم فيك
بالنسبة لي قبرص الشمالية اني طالب فيها ووكيل لجامعتها ما فيهمش تعقيد ابدا بالاضافة الىان الليبيين يدخلون بدون تاشيرة يعني بدون اي اشكالات

أعقد وتجوز وبعدين يدير الله طريق

لا قالك أعقد وبعدين أقعد راجي..... يا والله عليك نصيحة.

هو كيف الخطوبة كيف العقد بالنسبة الا ادا كان انت ناوي نية سودا ,,,,فبورقة العقد اتكمل اجراءاتك من الاول لكن السؤال المهم هو متي ناوي الزواج هل بعد شهرين او تلاتة اشهر او اكتر من دلك..
فالشاب الذي يستطيع صون نفسه انصحه ان ياخد علي الاقل 6 شهور لغة وبعدين يرجع يزوج وكدلك هناك من المتزوجين الجدد تكون الزوجة صغيرة في السن وتشدها اعياط طوووووووووووووول اليوم تبي تروح لليبيا لان الزوج يطلع من الساعة 8 ويرجع الساعة 6 يعني اتشوفة في الويكند بس

نصيحتى ليك امشى رتب امورك قبل فى الدراسة بعد شهر او فترة تعرف روحك استقريت وامورك كويسة ارجع تزوج وارجع مرة اخرى لدراستك ومكتب الشؤون الثقافية من تاريخ تعبئة نموذج الوضع العائلى تحسب المنحة بالوضع الجديد وسهلة جدا تغيير الوضع العائلى يوم واحد لا ورق ولاتشحوير زى البعتات لكن ماننصحكش انك تقرأ فاتحة وتخش المواضيع هذه صدقنى رح تتعب نظم امورك قبل لانك بعد الزواج المفروض ترتاح مش تقعد فى الشقا
على فكرة انى نفس حالتك بالزبط 3 شهور فى بريطانيا وإن شاء الله المدة القريبة بروح نتزوج ونرجع مع زوجتى اكيد بعد لارتب كل الامور وعرفت كيف نعيش ومع شويه لغة
الكلام الى نحكيلك عليه رح تلقاه قدامك صدقنى
وإن شاء الله ربى يكتبلك أيام زها وفرحك ولكل خوتنا
وألف مبروك مقدما

لا زواج ولا كرنكاطي يا ودي يا عمو نصيحه من اخوك تعرف اكلام الضاوي صح ميه ميه الأفضل تفوت الرغبه ( الطهقه) في الزواج عللى الأقل كورس اللغه بس على خاطر تتعلم اللغه مزبوط وموفق ومبروك يا عروس تي العبنا بزوجك واخرنا اعليك فرحتك بس ههههه لصالحكم

اسأل مجرب ولا تسأل طبيب انا نفسي اؤيد كلام الاخ امشي اقل شئ بعد 3 شهور اتحسن من لغتك واتشوف الامور معاك مرات ماترجع الا بعد 6شهور وفيه يلي رجع بعد ماسوي الايلس واخد قبول من الجامعة بيش بعد مايجيب عروسته يستقر معاها في نفس المدينة يلي بيدرس فيها الاكاديمي وبالتالي يؤجر منزل ويجهز امورة ومن ناحية الاجراءات في السفارة ساهلة جدا لكن المشكلة هي في التاشيرة وهده لما تعرف انك راجع الي ليبيا بتزوج خلي اهلك يسولك العقد واخ العروس يمشي للبعتات يكملك رسالة التاشيرة للعروس علشان لما تجي للعرس اتكون كل امورك تمام

أنصح بأن تعقد قبل الإجراءات.

وإن شاء الله ربي يوفق ويهنيك