السلام عليكم ورحمة الله وبركاته
شكرا اخي المدير على مجهودك
لكن الموقع زي ماقلت تحت الانشاء
نبدا معاكم من الصفر
وخلي ندوي باللهجة الليبية
توصل للمطار تاخد القطار اللي يوصل الي محطة تيرميني termini لان في اكثر من قطار لهذا لازم تسئل على القطار اللي يرفع الي التيرميني قيمة التذكرة 14 يورو
عندما تصل الي التيرميني تطلع برة الي محط الحافلات وتاخذ الحافلة رقم 90 او 36
حتى تصل الي المكتب الشعبي
اللي عنوانه
via nomentana 365
الشارع اسمه نومنتانا وكلمة فيا تعني شارع
رقم السفارة 365
وخليك منتبه في الباص الي الرقم 365 تجيك السفارة على يدك اليسار
بعد سفارة ايران
طبعا حاتنزل في المحطة اللي قبل السفارة الايرانية او المحطة اللي بعد المكتب الشعبي
هذا بالنسبة للسفارة
--------
بالنسبة للطلبة اللي بيمشو الى بيروجيا فيه 3 طرق
الاولى من المطار مباشرة
اسم الشركة الناقلة sulga العربي سولقا لون الباص للتسهيل اما ازرق وشعار الشركة بالابيض او العكس
تنطلق من المطار 12:00 ظهرا او 4:00 طبعا لو ماصارش تعرقيل في الجوازات تقدر تلحق عليها وفيه الساعة 4:00
الطريقة الثانية هذا قلنا لو مماشي الي بيروجيا
تاخد القطار اللي يرفع الي stazione tiburtina ستزيوني تيبورتينا
وتطلع منه تمشي لمحطة الباصات وتاخذ السولقا تطلع من المحطة في الاوقات
2:00 مساء وهذي تكون جاية من المطار
4:00 واخر باص تطلع الساعة 6:00
الطريقة الثالثة القطار طبعا من stazione termini اخر قطار يطلع الساعة 8:300 مساء وهذا فيه تغيير في مدينة سمها فولينو يتم تغيير القطار وتوصل الي بيروجيا بالباص
طبعا القطار هذا مايمشيش لبيروجيا لهذا تلقاه في اللوحة متاع المغادرة بسام انكونا ancona
-----
لما توصل بيروجيا لو عن طريق الحافلة تنزل في مطة اسمها بارتدجاني وتطلع منها بالسلم المتحرك الي سنترالمدينة
لو بالقطار توصل لمحطة القطار تاخد الحافلة c من قدام المحطة ملاظة ماينطقوش في سي زي الانجليزي تنطق شي
-----
بالنسبة لدراة طب الاسنان والله في اكثر من طالب يقرا في جامعة كاتانيا في سيشيليا
بس الحقيقة مانعرفش اكثر من هكي وحانحاول ان نسئل الطلبة اللي نعرفهم
اما الطب البشري في موجودة اكثر من جامعة
في ميلانو - روما - كاتانيا
بس شرط القبول المعرفة التامة باللغة الايطالية والانجليزية بالنسبة لكليات الطب والهندسة
ملاحظة
كان في طالب خريج تقنية طبية اسنان ماحصلش قبول نهائي وغير الساحة
--------------
بالنسبةالى اجراءات الاقامة
للعازب ساهلة جدا عبارة عن قديم اوراقك عن طريق البريد
بس ملاحظة عند انتظارك للاقامة ماتقدرش تغادر ايطاليا بكل ولو غادرت معاش تقدر تخش الا بتاشيرة جديدة
-----------------
بالنسبة للمتزوج
صعب تحصل اقامة الا في حالة وحدة لو حصلت تاشير ليها اكر من 4 اشهر
او تكون زوجتك حامل وتولد في ايطاليا تحصل اقامة 6 اشهر وتبدا تجدد فيها على اقامتك
او ديرلها قبول لغة وديرو تاشيرت الزوز
------------------------
الصعوبات
تلخبيط المنحة اول شي شهر تنزل في يوم 9 الشهر اللي بعده يوم 28 والشهر اللي بعده 20 يعني مافيش موعد ثابت لنزول المنحة
وللعلم كل شي يدفع في بدياة الشهر الايجار ومصاريف الكهرباء الغاز المية
يعني ديما دير احتياطك
------------
العلاج والتامين الطبي
المشرف الطلابي مايدفعش في اي مصاريف عدا رسوم البطاقة الصحية اما مصاريف العلاج والصور والاشعة والتحاليل والادوية مايحلم بيها حد على قد ما تكلمنا وناقشنا ومش عارفين السبب
---------------
الشروط تقريبا كل جامعة وبرنامجها لكن معظم الجامعات تطلب في مقابلة شخصية بعد القبول المبدئي
----------------
عدم صرف المنحة من وصولك يعني جيب معاك فلوس والحجة عدم وصول الفلوس
يعني برقية الخزانة والبعثات ماليهمش فايدة
يعني ممكن بعد شهرين ينزلك فلوسك هذا من 4 اشهر توا مانعرفش
---------------
اي استفسار اني في الخدمة
الدراسة والمعيشة في ايطاليا
هذه هي الترجمة من الإيطالية
