بالتفصبل (رحلة في اتمام الاجراءات الموفدين الى الخارج)

ans2010 كتب:

00



أولا أهني كل المتحصلين علي الإيفاد للدراسة بالخارج
وأقول لهم ( ألف ألف مبروك )



وأتمنى أن يكون فاتحة خير عليهم وبناء مستقبل مشرف
وأهم شي النتيجة



والآن نبدأ في مشوار تجهيز المستندات المطلوبة لتنفيذ قرار الإيفاد

بسم الله
قبل كل شي يجب علي الموفد معرفة مواد لائحة البعثات
1- قرار لائحة البعثات
http://www.4shared.com/file/106198704/a194cace/Layeha_01.html

2- قرار اللجنة الشعبية العامة بشأن تعديل وإضافة بعض الأحكام إلى لائحة الإيفاد
http://www.4shared.com/file/106198723/dc63def/Layeha_02.html

وبعد ما قريت اللائحة وعرفت اللي عليك واللي ليك نتوكوا علي الله ونبدوا ...
أولا : تمشي لإدارة البعثات الدراسية في منطقة عين زاره – الفرناج وتخش ( السلام عليكم ) وبوجهك طول لنافدة القبول وتقوللهم انك موفد للخارج بقرار رقمه (كدا) ورقمي التسلسلي (كدا) وطبعا انت تكون نبه ومفتح تبدأ مجهز صورة من القرار طبعا مش كله ، الصفحة الأولى والصفحة اللي فيها اسمك وصورة من جواز سفرك العربي + الانجليزية تعطيهملهم ويعطوك نموذج تعبيه وتحددلهم الساحة ( البلاد ) اللي تبي تقرا فيها وتوقع تعطيهولهم ويقولولك راجعنا يوم ( كدا )وإذا كان قرارك صادر عن الجامعات أو جهات عامة يقولولك راجع منذوب الجهة اللي مرشحاتك أو الجامعة اللي مرشحاتك .

المهم خلينا في الجماعة اللي عندهم مندوب نزل النماذج هذي خليها عندك هيا المفروض يعطيهالك المندوب بس أنا مجهزهالكم ديجيتال .

1- نموذج لغرض القبول .
http://www.4shared.com/file/106164940/8dceb0/purpose_of_acceptance.html

2- نموذج لغرض التأشيرة .
http://www.4shared.com/file/106164939/3610e0d3/purpose_of_the_visa.html

3- طلب الحصول علي تذاكر السفر .
http://www.4shared.com/file/106164951/6e91cf67/Request_a_ticket.html

4- التأمين الصحي .
http://www.4shared.com/file/106164948/e564682/Health_Insurance.html

أول حاجة تعبي نموذج لغرض القبول وتوقع عليه وتعطيه للمندوب وترفق معاه صورة من جواز سفرك العربية والانجليزية .
وبعد ما تاخد ورقة الدعم المالي تبدا فيها عاد وينك يا جامعات وهات ما عندك
طبعا جامعات معتمدة مش متع مشي حالك
المهم في الوقت اللي تراسل فيه الجامعات وتستنى في القبول الأكاديمي وقبول اللغة أقرى النقص وجهز المستندات المطلوبة للإيفاد .

نجو للمستندات المطلوبة
أول شي تجهز ملفين
واحد أصلي والثاني صورة من الأوراق الأصلية



والمستندات هي :
1. المؤهل العلمي وكشف الدرجات
2. شهادة الميلاد
3. صور من كتيب العائلة
4. صور من جواز السفر
5. شهادة الوضع العائلي
6. الوضع العسكري
7. قبول لغة وأكاديمي
8. إخلاء طرف
9. عقدكفالة
http://www.4shared.com/file/106164947/9ee95b13/Held_Ensure.html

10. استمارةبيانات طالب
http://www.4shared.com/file/106164944/7e00aa9/Form_envoy.html

11. تعهدطالب
http://www.4shared.com/file/106164942/ee83af9c/Pledged_Envoy.html

12. تأشيرة دخول دراسية

نبدو توا وحدة وحدة

بالنسبة للمؤهل العلمي وكشف الدرجات
أول حاجة تاخد شهادتك وكشف الدرجات وتمشي لمترجم قانوني واترجمهم عنده .
وبعدها تمشي لمركز ضمان الجودة في بن عاشور قريب من مصحة المختار



وتختم علي شهادتك عندهم ( طبعا لازم تكون معتمدة ) .
وبعد ما تختمها تمشي تصدق علي الترجمة في مكتب التصديق في الظهرة في جانب شركة الزويتينة وخلف فندق الودان ( سيدي عيسى )
وبعدها تمشي تختم علي شهاداتك في الخارجية في منطقة النوفليين .
وهكي تكون جهزت النقطة الأولى من مستندات تنفيذ قرار الإيفاد

نجو توا للباقي
تمشي تاخد كتيب العائلة وتمشي لمصلحة الأحوال المدنية ( السجل المدني لمنطقتك ) وتقدم في طلب شهادة بالوضع العائلي وشهادة إدارية إذا كان الكتيب ازرق ( القديم ) وبعد ما تاخدهم تطلع بوشك للمصور عدل تصور صورتين صورتين من ( كتيب العائلة شهادة الميلاد وجواز السفر والوضع العائلي والاقامة ) وبعدين تصور صور شخصية لوجهك الجميل .



وبعدين تعبي نماذج عقد الكفالة واستمارة بيانات موفد ونموذج التعهد

وتمشي لجهة العمل اللي تشتغل فيها تختم عندها استمارة بيانات موفد وبعدين تمشي لأمين المؤتمر لمنطقتك تختم عنده استمارة بيانات موفد ونموذج التعهد وعقد الكفالة وبعدين شوف أول محرر عقود معتمد تصدق عنده عقد الكفالة .
دوشة ووجع راس صح
الله غالب معليش هانت
يلا انكملوا .... يلا

بعد ما تجهز الملفين وتكون كملت موضوع القبول الأكاديمي وقبول اللغة
تعبي نموذج الدعم المالي لغرض التأشيرة وتوقع عليه وبعدين طول لعند المندوب وترفق معاه صورة من القبول الأكاديمي وقبول اللغة وصورة من جواز السفر العربية والانجليزية والوضع العائلي .
وبعدين تستنى وبعد ما تاخد رسالة الدعم المالي طول بوجهك لسفارة البلاد اللي بتمشيلها تقدم للتأشيرة وتراجي التأشيرة لين تصدرلك .
وتوا أبدى جهز في شناطيك للسفر



مازال مش من توا تمشي للمطار مازااااااااااااال

وبعد ما تصدر التأشيرة تقدم في التفويض وتعبي الطلب للحصول علي تذكرة سفر وتوقع عليه وتعطيه للمندوب وترفق معاه صورة من جواز السفر العربية والانجليزية وصورة من التأشيرة وما تنساش تعبي نموذج التأمين الصحي حتى هوا وتعطيه للمندوب
وبعدين تراجي حوالي مدة من شهر الى شهرين حسب الظروف وحضك
لما يوصل التفويض للمالية تقدملهم صورة من جواز السفر والتاشيرة ويعطوك الإبراق يسموا فيه 3نسخ
نسخة تقعد عندهم
نسختين يعطوهملك وحدة تخليها عندك والثانية تعطيهالجماعة البعثات ويقولولك راجعنا يوم ( كدا )
وبعدين تمشي ويعطوك مجموعةصور أوراق ( تعريف طالب ، إبراق من البعثات ، رسالة ربع المرتب إذا كنت من جهة عامة أو من الجامعات ) .
وبعدين تمشي للمحفوظات تعطيعم الأوراق يعطوك النسخ الأصلية من ( تعريف طالب ، إبراق من البعثات ، رسالة ربع المرتب )
وتوا هكي كملنا برنامج أوراق البعثات .
بعد ما تلقى اسمك في المالية تمشي تشري كندرة جديدة وتقعد ماشي جاي علي مبنى الوكالات وهو في نفس مبنى البعثات تشوف اسمك في القوائم المعلقة ولما تلقى اسمك تمشي للوكالة وتقوللهم لقيت اسمي في القوائم يشوفوا اسمك ويتأكدوا منه وعلي طول يعطوك نموذج تعبيه وبعدين يقولولك راجعنا يوم ( كدا ) لين يصدرولك التذكرة
وووووووووووووو بعدين تاخد تذكرة السفر
وعلي طول لم قشيشك وشناطيك وبوجهك للمطار
وماتنساش أمانة في رقبتك إدعي لي دعوة خير
ما تنساش ايوة ( دعوة خير )

فما أجمل الأخوة باالله ..نباتها <<< الصدق و أرضها<<< الإخلاص



موفقين بإذن الله تعالى
وسامحوني إذا كان طولت عليكم أو نقصت عليكم حاجة نسيتها
( جل من لا يسهوا )

نصيحة : راجع إدارة البعثات ديما لأن مرات يغيروا في اجرائاتهم .





00

امة الله كتب:

السلام عليكم
يعجز المرء ان يمر بسؤال لك دون محاولة الاجابة

اختي نورا، سؤالك غير واضح؟
ففي احدى المشاركات فهمت منك انك في مرحلة اخلاء الطرف والتفويض؟

حبيبتي امه الله انا لم اقل انني في مرحلة التفويض المالي ولكن قد يكون ردي غير مفهوم انا كنت في مرحلة الدعم المالي ويمكن اخطأت بالتعبير وقلت التفويض المالي .. مع انه في فرق بينهم
والان السؤال بخصوص الدعم المالي؟
ولان خيرك سابق على المنتدى ، فلك المشاركات العديدة والقيمة التي لايستطيع ان ينكرها احد، لذا سأحاول الاجابة وان كنت لست افضل الموجودين:

1- تستطيعين نقل اوراقك والمراجعة عليها بطرابلس عوضا عن انتظار المندوب والذي للاسف كان سببا في التأخير في غالب الاحيان( وقد يكون تجربتي الخاصة فقط)، لذا افضل ان تأخذي اوراقك بنفسك، ولعل اخي الحسن يؤكد او ينفي ذلك فهو ادرى من الجميع.

انا حاليا في طرابلس فلو فعلا كلامك سأجهز اوراقي وارسلها الى ادارة البعتات ولكني سأتصل بقريبي واتأكد منه .. قد يراودك سؤال وتقولين : عندها قريب وحايرة ؟ .. والله يا غالية في مثل يقال كان صاحبك عسل ماتلحساش كله ومش كل حاجة نبي نعرفها نمشي نتصل بيه .. وبعدين انا حطيت هذا الموضوع ليس لعدم درايتي او علمي بالشئ .. لا والله .. ولكن لتعميم الفائدة واستفادة الغير من المشاركة ووضع اسئلتهم والرد عليها ..

2- رسالة التأشيرة لاتأخذ الكثير من الوقت ممكن في اقل من اسبوعين، ثم تتوجهين الي السفارة، وان كانت استراليا او نيوزيلاندا فصبرك صبر
ربك يستر وان شاء الله ماطول عشان تطلع .. لانه عندي قريبتي في نيوزلندا قالت ان تأشيرتها طولت قعدت قريب سنة ( تعيش هناك عشان زوجها في عمل وليس دراسة) ويمكن هذه الحالة تختلف

3- بعد الحصول على التأشيرة، تكملين ملف التفويض بالاوراق المذكورة، ولاتنسي اعتماد الجودة، ثم تذهبين مرة اخرى الي طرابلس لتسليم الملف وانتظار التفويض مع التذاكر
4- ان كان انت درتي هذا كله ، فيالسذاجة مشاركتي
لا يا حبيبتي هذا كله مادرتاش... شكرا لمشاركتك ولكني كل خطوة انديرها ساكتبها هنا ومنها اريد منكم التعقيب والاستفسار ... فلو نبي الطريقة والكيفية كلها مع بعضها لما اضطررت الى وضع هذه المشاركة ...

تمنياتي بالتوفيق وسلامي لبنوتك الحلوة