حلال عليهم وحرام علي المحرومين من إستكمال دراستهم في الخارج

قدسمعنا بصدور قرار من الدولة الليبية بتعويض سجناء أثناء نظام الطاغية بمبلغ قدره 8000 دينار عن كل شهر بما يعني أن المبلغ الكلي قد يصل 3مليون لبعض السجناء وذلك حسب مدة السجن
ومن المفارقة أن هناك عدد من السجناء قد تحصلوا علي تعويضات أثناء نظام الطاغية
هل بعض السجناء يسعون الى جني مقابل جهادهم خلال سنين السجن؟؟
هل أصبح الجهاد في سبيل الله وإعلاء كلمته لغرض الحصول على الأموال الطائلة؟؟
ومن هذا الذي قام بإقرار هذا القرار الإنتهازى في هذة الفترة الإنتقالية ؟ وبدون أخذ رأي الليبين جميعا
فإذا كان كلامي غير صحيح فأرجوا من المتسلقين واللذين يظهرون علينا في الإذاعات ويدعون الوطنية أن يكونوا صادقين مع الليبين ويغيروا شعار دولة الحق والقانون و المؤسسات إالي شعار أخر وهو دولة اللهف والصفقات
عندهاسوف يتيقن الليبين رقادين الريح أن شئ لم يتغير وإنما هو تبادل أدوار مع نظام الطاغية

اخي بخصوص القرار تعويض 8000

الكارثة ان نصهم اعضاء في المجلس الوطني الانتقالي قد تم الزج بهم في سجون الطاعية يعني فهمك كفاية هما الي نصو القانون لكي يتمشاء معهم و وضعهم الحالي يعني يسرقوا ويعدول بمزاجهم حتي معمر مكنش يسرق هكي عيني عينك هو او جماعته لكن هذوما سرقة بشطارة وحنكة مع تورط العديد من القانونين والسياسين في هذا الكارثة التي سوف نجني نحناء ثماره الطبقة العاملة الطبقة الوسطة في الدولة الليبية

salem elzway كتب:

اخي بخصوص القرار تعويض 8000

الكارثة ان نصهم اعضاء في المجلس الوطني الانتقالي قد تم الزج بهم في سجون الطاعية يعني فهمك كفاية هما الي نصو القانون لكي يتمشاء معهم و وضعهم الحالي يعني يسرقوا ويعدول بمزاجهم حتي معمر مكنش يسرق هكي عيني عينك هو او جماعته لكن هذوما سرقة بشطارة وحنكة مع تورط العديد من القانونين والسياسين في هذا الكارثة التي سوف نجني نحناء ثماره الطبقة العاملة الطبقة الوسطة في الدولة الليبية

يستر الله.........حتى فلوس ليبيا من كثرة البعزقة تمن زي قولة عزايزنا "طشة في ذيلها"....يعني تلحق و الا ما تلحق...

الهبرة الاخيرة لجمـأعة المجلس قبل خروجهم ،،، إن شــاء الله ما يصيرش منهـــم

أني حبسني النظام السابق 30 عام ومعنديش أي مستند يثبت صحة كلامي
عاد زي ما أنتم عارفين وبأعتراف كل الليبيين والعالم أن دولة القذافي تقدر تدير أي شي
أخفوا مستندات حبسي زي ما أخفوا قصة موسى الصدر.
ههههههه
زعمك دولة القانون الجديدة تديرلي حل وتعوضني؟؟؟؟

القصة خيالية باش منخشش في باب الكذب

أسأل الله أن يعوض الليبيين خير

المفروض كل الليبيين يمشوا لمكتب النائب العام ويقدموا شكوة.

قصدي شكوة لبن

وخلي بعدين يرفضوا الدعوة.
ههههه

بالك حتى الطلبة المحرومين من الدراسة في الخارج أثناء فترة نظام الطاغية وذلك لعدم وجود واسطة أو لأنهم ليسوا من أبناء رفقاء الطاغية....... بالك حتى هم يتم تعويضهم عن الفترة التي قضوها في السجن الثقافي.......يستر الله ليبيا وين ماشيه

قالك هات مايثبت الليبين ماعندهمش مشكلة في الورق وعلي فكرة بعد فترة حيكون عندنا 6 مليون سجين سياسي و6 مليون شهيد وكل بالمستندات يعني مافيش هزار

شكلي بندير ورق أني شهيد
مش الشهداء أحياء
وأني حي أرزق

فاهم كتب:

قالك هات مايثبت الليبين ماعندهمش مشكلة في الورق وعلي فكرة بعد فترة حيكون عندنا 6 مليون سجين سياسي و6 مليون شهيد وكل بالمستندات يعني مافيش هزار

صدقا لكلامك ........نعرف وحدين داروا أرواحم من الجرحى وعندهم أوراق ثبوتية من المجالس العسكرية وهم لم يمشوا للجبهة وما يعرفوا شكلها...................................ياهوا وين المصداقية والشفافية

أعتذار للشهداء نحسبهم كذلك والله حسيبهم

و الله الغلط كله من الشعب اللي ساكت و مش معدل .. ولا تستغربو هذي هي طبيعة الشعب الليبي شعب سلبي و كل واحد ماشي بمقولة اخطي راسي و قص ... بالله شوفو للشعب المصري و الشعب التونسي عندما يحس بان الثورة في خطر او ان هناك من يحاول الالتفاف علي الثورة او سرقتها ...... علي طول ينزل للشارع لكي يحدد مصيره علي عكس الشعب الليبي .... وزي ما القذافي ضحك علي الشعب و دار ما يبي لمدة 42 سنة حتي اللي بيجي للحكم حيضحك علي الليبيين ويدير مايبي لان الشعب الليبي لا حياة لمن تنادي .....الي متي هذه السلبية

الشباب اللي مكانش محبوس جوه الحبس كان محبوس برة مافيش وين تمشي ولا وين تدير فايدة على روحك لا يوجد إهتمام بالشباب تلقى الشباب قاعدين في الشوكات ولا في الحياش كارطة وبلي ستيشن ما عندهمش وين يقضوا أوراق فراغهم واي حاجة يبوا يديروها بلقوها مسكرة وعلى فكرة أغلب الشباب اللي ما وفقش في الدراسة سيب الدراسة وبدا يشتغل في أي مكان وهذا كله كان بهدف تجهيل الشباب حتى لا يخرج جيل متعلم ، أليست هذه مشكلة أولى بأن تصرف الأموال في رقي التعليم وترغيب الشباب في العودة للدراسة وكذلك الطلبة الليبين في الخارج هم أقل الطلبة من حيث المنحة حيث يكاد يكون الطلبة من أفقر الطلبة في الساحات الدراسية وهذا بشهادة الموفدين من رواد المنتدى فنرجو الإهتمام بالتعليم وصرف الأموال ما دام هناك أموال تصرف

حسبي الله ونعم الوكيل فيك يا حكومة او يا مجلس

أدعوا الله أن يعين قادة البلاد لما فيه الخير
الدعاء يا شباب