تنبيه ..للطلبة الموفدين

السلام عليكم,,,

هذه نصيحة القيتها في احد المنتديات قلت لازم تقروها ((مش بالغصب))


كيف حال الجميع ؟ ان شاءالله الجميع بخير وبصحة وعافية,,,,

بس حبيت يا اخواني واخواتي نبه علي بعض شئ لطلاب البعثات الراغبين في الدراسة خارج ليبيا

يوجد بعض الطلاب الي لما يتحصل علي بعثة, عادة يشغل نفسه بأوراق البعثة والتفويض المالي واوراق اللغة فقط , بمعني انه

يغادر ليبيا و ماعندش اي خلفية علي متطلبات الدراسة الاكاديمية سواء كانت بكاليريوس او دراسات عليا !

ولكن هضا خطأ البعض من اليبين يرتكبوا فيه !

في بعض الطلاب الي رجعوا ليبيا لما عرفوا متطلبات الاكاديمية كذا وكذا, وخاصة طلبة الاقتصاد في الدراسات العليا, وهضا بالنسبة للساحة الامريكية

في اغلب الاحيان المتطلبات اتكون امتحان اللغة الي هوا التوفل TOEFL او امتحان ثاني, علي حسب الساحة والجامعة طبعا,

مع امتحان (ج ر ي) لطلبة العلوم,,,,او امتحان (جيمات) وهضا لطلبة الاقتصاد في الدراسات العليا او امتحان( يو اس ملي) لطلبة الطب. ولكن هضا يختلف من جامعة لأخري...

الاخوان الي رجعوا ليبيا كان السبب هوا استغراق فترة طويلة للحصول علي متطلبات لانه يوجد فترة معينه فقط للطالب

من خلالها يحصل علي هذه المتطلبات.

معظم الطلبة ماكانش يعلم بانه يقدر ياخذ الامتحانات هذينا من طرابلس, سمعت في مراكز معتمدة في طرابلس للامتحانات هذينا

فطبيعي ان الحصول علي المتطلبات من بلادك حيكون اسهل من بلاد الغربة.

والحركة هادي ايديروا فيها الطلاب الي من البلدان الاخري, مثل الصين وكوريا والهند وا وا,,, لانها تختصر الوقت وفي نفس الوقت تخليك ضامن المتطلبات.

اني مش قصدي من الموضوع ان في الخارج يطلبوا في متطلبات صعبة او حاجة زي هكي

الغرض من الموضوع هو التنبيه بمعرفة متطلبات الدراسة الاكاديمية قبل مغادرة ليبيا, لا اكثر

وان شاءالله التيسير من الله للجميع,,,

السلام عليكم
بارك الله فيك علي هده النصيحة فعلا ينشغل الطالب بامور الاجراءات وينسي ماهو مطلوب منه في الخارج ممكن يخلص
وهو في بلده . والواقع ان الجهات المختصة هي السبب لانها بتضغط علي الطالب من صدور القرار وتحديد وقت معين للاجراءات والطالب خايف يفوت عليه القطار فاول شيئ يقوم به هو التفويض وبعدين يقول شن درت وحالته مكركبة.
هدي مشكلة وليها حل والمشكلة الثانية شن الحل فيها في نظرك :
الدراسة في اغلب الاحيان تبدأ في شهر( 9 ) وفي جامعات
يبدن في( 10) والبعض في (12) والتفويض بادي من(5او4) والمدة محسوبة .
وبعض التخصصات بخشوا علي الرسالة طول والبعض يدرس مواد تصل الي (14) مادة والمدة نفس المدة فهل هدا من العدل وعند السوال هل من امكاني لتمديد المدة يقولك المكتب الثقافي الطالب ما يبيش يقرأ ويضيع في الوقت .
ومع ان الطالب الي خش على الرسالةطول يادوب يكمل في المدة المحددله .
تصور طالب مفوض في شهر (8) والدراسة بادية في (12) ومواد التمهيدي (14)مادة وبعد تسجيل الرسالة لا يناقش حتى مرور سنة كيف بتسدة المدة ودورة الحاسب والتوفل شرط تسجيل مش مناقشة . طبعا هدا في الساحات العربية بالدات .
سامحوني طولت عليكم لكن هدا واقع مر والبعثات لم تأخد بعين الاعتبار هده الامور .

السلام عليكم
شكرا اخي لهذا التنبيه وجزاك الله خير

MANY THANKS FOR EVERY BODY WROTE IN THIS PAGE

اختي د-عريش شكرا جزيلا وجزاكي الله عنا الف خير
احب ان اظف ان سياسة قرارات الايفاد تحتاج الي اعادة نظر من حيث وجود العراقيل الجمة
التي تأخد وقت وتفكير الموفد وكأن الطالب عبارة عن (كمشة )اوراق فيضيع وقتنا بين المكاتب
والادارات الوقت الذي يجب فيه ان نحضر انفسنا اكادميا لمواجهة الاتي لذا فأملي ان يكون الغد اكثر اشراقا واقل تعقيدا للموفدين
مع فائق احترامي

شكرا ......د.وافية باشا على بصمتك المتميزة
وانشاء الله واملنا في ادارة البعثات ان يسهلوا امور الموفدين ..

يذهب الطالب الليبي للدراسة خارج الجماهيرية وللأسف أخوانا في الجامعات خارج الجماهيرية تحسهم يضعوا كل العراقيل أمام الطالب الليبي .
نحن كدولة ليبية عندما نبعث طالب للدراسة وندفع أقساط للدولة وللجامعة عربية أو أجنبية فالمطلوب منهم وضع برنامج تعليمي متكامل لتعليم هذا الطالب ومنحه الشهادة الموفد من اجلها مع عدم اخلال الطالب بلوائح الجامعة التي يدرس بها .
ولكن نجد بعض الجامعات العربية والاجنبية تضع العراقيل امام الطالب ولم نفهم القصد من ذلك وإذا كانوا يتاجرون بالصحة والعلاج ويعتبرونها من مدخلات اقتصاد الدولة فكيف بالتعليم .....

ياريت يخولوني أمين التعليم أسبوع واحد من كل سنة ويكون الأسبوع الي بيطلع فيه قرار الإفاد وشفوني أيش ندير
مع تجهيز غرفة عمليات فيها
أحدت الإتصالات بكل دول العالم
ومترجم واحد لكل لغة من اللغات العالمية شغالين 24 ساعة
أخر يوم من هذا الأسبوع لقاء مع كل الموفدين ويكون مصاريف حضورهم على حساب التعليم قصدي حسابي في أكبر قاعة في طرابلس من 8صباحا الى 8مساءا والغداء والعشاء مع بعض والصلاء في المسجد الي في جنب القاعة
خط مباشر مع الأمم المتحدة!!
حلم جميل

عبد المعين كتب:

ياريت يخولوني أمين التعليم أسبوع واحد من كل سنة ويكون الأسبوع الي بيطلع فيه قرار الإفاد وشفوني أيش ندير
مع تجهيز غرفة عمليات فيها
أحدت الإتصالات بكل دول العالم
ومترجم واحد لكل لغة من اللغات العالمية شغالين 24 ساعة
أخر يوم من هذا الأسبوع لقاء مع كل الموفدين ويكون مصاريف حضورهم على حساب التعليم قصدي حسابي في أكبر قاعة في طرابلس من 8صباحا الى 8مساءا والغداء والعشاء مع بعض والصلاء في المسجد الي في جنب القاعة
خط مباشر مع الأمم المتحدة!!
حلم جميل

بارك الله فيك وي عبد المعين وكثر الله من امثالك بس الناس اللي تفكريهم زيك مايخلوهمش يطولوا او يشد منصب من الاصل لانهم يحبوا انه الشخص اللي يمسك منصب يكون دبلوماسي (((بلعوط ))) باش تمشي الامور

والله صدقت
بعد تفكير عميق أقتنعت أن الدبلماسية (((( بلعطة)))) بحق
والحق يقال ولات الأمور يحتاجوا للدبلماسية في العلاقات الدولية
لكن مش مع الطلاب الموفدين!!! المساكييييين
والله ما أراه وأسمعه وأقراء بخصوص الطلاب الليبيين أنه لجريمة في حق الطالب والدولة
والمجتمع الليبي من ناحية النتظيم والأرشاد والتوعية قبل السفر والتواصل بين الطالب والبعتاث بشكل سلس .وكل هذا ناتج عن إنعدام التخطيط وعدم وجود أدن صاغية للموفد لا من البعتات ولا من التعليم.وإستغلال معضم الساحات (الدول ) لطالب الموفد بداية من أجراءات الإقامة الى المؤسسة التعليمية وعدم مراعات الأخيرة لمصلحة الطالب ودولته.
وزيادة على ذلك الإستمرار مع الإصرار على الإهمال والسكوت و عدم أنقاض ما يمكن إنقاضه والله المستعان

شكرا اخي الكريم ولكن معظم الطلبة قاريين دروسهم زين يعني مفيش حاجة فايتة عليهم
والله يوفق الجميع