جاني استفسار من الاخت هند بالنسبة للاجراءات الساحه الكنديه
وانا حبيت انجاوب علي العام وليس الخاص
لكي يستفيد الموفدين الجدد
اولا: بعد الحصول علي ورقة الدعم المالي لغرض القبول تصور سكانر وتنقل الي فلاش او ميموري..وانا حبيت انجاوب علي العام وليس الخاص
لكي يستفيد الموفدين الجدد
ثانيا: اذا كان وجهتك كندا وعندك رغبه تدرسي في مقاطعة تورنتو او برتش كولومبيا او نيوفوندلاند او كيبك او ادوارد او برانزويك ....الخ تدخلي علي
شريط القوقل وتكتبي كلاتي بلانجليزي بالزبط:
Canadian colleges for study of master pharmacology studies
تختاري احدث تصنيف ,حتلقي مكتوب بلانجليزي ان كل جامعه عندها ماجستير
فارماكولوحي يختلف عم الاخر مثلا ماجستير كلينيكال فارماكولوجي او كاردياك فارماكولوجي .....يعني انواااااع واااجده,,,,,
تختاري وحده من الجامعات وتدخلي علي خانة graduate study
Or prospective student or international student
يختلفن المسميات ولكن المعني واحد قصدهم الطلبه من الخارج ...
تقري متطلبات التقديم علي بالنسبه للطالب العالمي (نحنا) وتقري امتي بداية الكورس...(ضروري تعرفي امتي يبدا الكورس) وضروري تعرفي هل هو نظام دراسه كورس وورك ولا نظام بحث يعني ريسيرش research or course work لانهن يختلفن والبحث عادة اصعب ويحتاج مجهود اكبر...ننصحك تختاري الكورس وورك....بعدها تعرفي كم سنه الماجستير وتاخذي ايميل الجامعه عشان تراسليهم.......هههههههههههههههه هذا كله طبعا اولا ههههههههههههه
وخشي علي كل جامعه كنديه معتمده وافطني زززززين لكلمة معتمده بمعني accredited لان ليبيا والمكتب الكندي لا يتعامل الا مع الجامعات المعتمده فقط
وشوفي نظام الماجستير عندهم بالنسبه للطلبة الخريجين graduate student
بعد تعجبك جامعه معينه تخشي علي خانة home في الموقع وتعطيك فكرة كامله عن الجامعه من حيث موقعها الجغرافي ولغة الدراسه عندها ونشطاتها وسمعتها وعدد الطلبه فيها والديانات الموجوده والتسهيلات وطريقة التقديم وdead lines بمعني اخر يوم لاستلام الطلبات,,ويعطيك فكرة علي المواصلات والتأمين الصحي
ثانيا:اول شئ في متطلبات الدخول هي اللغه الانجليزيه في كندا وردي بالك تراسلي جامعة كيبك لان نظام الدراسة عندهم بالفرنسي (ركزي كويس)..
الجامعه الي عجبتك يا هندا عادة عندها معهد لغه انجليزية تابع لها اتخشي علي موقع معهد اللغه الانجليزية التابع لجامعتك( وركزي كويس علي كلمة تابع لان هناك معاهد خاصة وتجاريه وغير معتمدة),,, تدخلي علي موقع اللغه وتخشي علي خانة الطلبه القادمين من الخارج prospective student or international student…. طبعا يعطوا في انواع للغه الانجليزيه لكن انت اختاري فقط نوع واحد باسم لغه انجليزيه لغرض الاكاديمي English for academic purpose تخشي وتشوفي امتي مواعيد الخول ولاحظي اللغه الانجليزيه عندهم تبدا دائما في شهر يناير وهي عبارة عن اربع سمسترات في سنه مع وجود امتحان تقييمي في بدايه الدراسه وامتحان تقييمي في نهاية كل سمستر ولازم تحصلي B عشان تخشي دغري علي الاكاديمي....
بعدها تاخذي ايميل المعهد وتراسليه عن طريق ايميلك واذا كان عندك كردت كار داو ماستر كارد املي الابليكشن اون لاين وادفعي رسوم اللابلايكشنfee application ولو ما عندك وضحيلهم في الايميل انك غليانه وفقيرة وماعندك كردت كارك كيف لوزا هههههههههههههههههههه
ولما تراسليهم ابعثيلهم صورة من الدعم المالي للقبول اللي واخذتيه من ادارة البعثات الموقره,,,بعدها هم يبعثولك حاجه اسمها قبول مبدئ في صورة pdf تاخذيه (ياحنة) وتقولي لامك توزع مشاريب هههههههههههههههههههههه
وتقدميه الي المكتب الكندي المسؤول عن الطلبه الليبين cbie وهذا ايميل الخبير العلمي (كارين) المسؤول عنك بعد ما تقدميله القبول المبدئ,,,,كارين بعدها يراسل وزارة التعليم في ليبيا ويتاكد من طرابلس انك موفده وبعد ما يتأكد من ذلك يراسل الجامعه ويعطيها تاكيد ايضا وبعدها الجامعه تبعثلك تاكيد قبوووووول confirmation of enrolment COE ومبروووك ياحنه قبلووووووك
طالبه وسجلوك في الكورس تاخذي التاكيد هذا وتشليه لادارة البعثات يعطوك نموذج التقديم علي التأشيره وتبدي في اوراق التأشيرة والمكتب الكندي يبعثلك ايضا رسالة الدعم للتأشيره,,,,,وبعدها تخشي في اجراءات الـتأشيرة والتفويض وموعد مع السفرة في طرابلس والكشف الطبي وبعدها يصدر الابراق من الخزانه والتذاكر وتسافري (ونفتكوا من هرجتك في ليبيا هههههه)
بس لازم اطلعي ثلاث نسخ شهادة وكشف درجات وتختميهن من الجوده والخارجيه ولازم تحصلي ثلاث شهادات تزكيه مد دكاترة درسوك مع ايميلاتهم
ولازم تحصلي ورقه من جامعتك انك درستي الصيدلة بلانجليزي ولازم تكتبي cv ولازم اطلعي حسن سيرة وسلوك وتختميهن من السجل المدني والمحكمه والخلرجيه ولازم تحصلي ايفاده انك طالبه في الجامعه وترجميها وتختميها من مترجم قانوني ومن المسجل العام والخارجيه,,,,,وقبل ماتسافري لازم اتديري اخلاء طرف بعد ماتسافري تحتاجي لشهادة ميلاد بلانجليزي والوضع العائلي بلانجليزي ,,,,,والمرافق لو يبي يدرس لازم ايدير الجو هذا كله ولازم طبعا اديري سورة سكانر في الفلاش لجواز سفرك الصفحه الانجليزي والعربي وخوذي معاك نسخه من شهادتك طبق الاصل مع كشف درجات سكانر احتياطي (عجلة خلفيه)
اتمني ان دمي كان خفيف برغم طول المقال
واي استفسار نحنا في الجوار
(لسنا الوحيدون لكننا الافضل)
لوزا :عروس الشرارة
