تجربة مسافر

السلام عليكم ورحمة الله وبركاته
تلبية لطلب خوي مساسي ومشاركة لموضوع اختي امة الله::: وبمناسبة عيد ميلادي اليوم ... هذه هي رحلتي من ليبيا الى امريكا
هما رحلتين.. بس حنحكيلكم الاولى لان كان طعمها غير.
طبعا بعد المرور بإجراءات الفيزا والتفويض المالي والتذاكر.... الحمد لله كانت الاموور ماشية كويس الى ماوصلت لمرحلة التذاكر ... كان وقتها البعتات يحولوك على شركة معينة وانت وحظك. طبعا قعدت ماشي جاي عليهم يوميا وتلفونات..الحق تأخروا بيهم بس الحمد لله في الاخير طلعت التذكرة وحزمت الامتعة وانطلقت .

انا جيت على الخطوط الالمانية اللوفتهانزا... وبعدين غيرت من سياحية الى يزنس وزدت حوالي 350 دينار تقريبا ... المهم كان الترانزيت ليلة في فرانكفورت... وصلت الساعة 4 العشية شنطتي على ظهري وهـــــائم في مطار فرانكفورت.. مشيت دورت صالة البزنس.. عندهم صالة خاصة تفتح الساعة 6 صباحا ويسكروا الساعة 11 ليلا وفيها بوفيه مفتوح على مدار اليوم وشاشات عرض تي في ..فيها اخبار ورياضة ومسلسلات وافلام.. المهم الصالة مريـــــحة جدا وفيها باث رووم- اكرم الله القارئين – ومجهز بكل شي من معجون وفرشة اسنان وعدة حلاقة ومناشف وموزيل وشامبو وصابون الخ ... يعني كل متطلبات الدوش...
المهم مشيت طووووول للصالة وقعدت فيها.. طبعا عندي قاعدة ... لما اتخش لمكان جديد اول مرة اتشوفه... دير روحك فاهم ودير زي اللي قدامك.. واول كرسي او تركينة اقعد فيها وشوف وارصد كل الحركات اللي جنبك ..كيف يتصرفوا وعلى اي اساس.. هع هع
المهم خلاص لما شفت الوضع خذيت راحتي... وصار موقف كل مانذكره نضحك عليه لليوم:: مشيت للبوفيه وخذيت من كل شي اشوي...
الصحن كان كبير بس عبيته ماخليت حاجة مارفعت منها..
<<<على اساس بيرد حق 350 دينار
المهم جايب الصحن وهوا معبى فل وفي يدي التانية طاسة عصير برتقال على كيف كيفك - (طاسة = كباية = كوب = glass)
المهم الطاسة كانت طوييييييييييييييلة واني ماسك الصحن في يد والطاسة في يد تانية .. وديدش حب الرمان.. ولما وصلت للكرسي حطيت الصحن ومش عارف كيف قلبت الطاسة ...كشششششششششششششششش
توة الموقف الناس كلها تشوف فيا وكلهم بزنس كلاس ..يعني هبي واني خاش بالعرض... هههههههههههه
المهم معاش عرفت شن اندير ..مشيت لقيت اول منظفة قلتلها تعالي فيه كارثة حصلت... هههههههه ماتعرفش تتكلم انجليزي كريتها وجبتها للمكان وشافت الحوسة ووجها انقلب 360 درجة ... في سري قلتلها امالا دافع 350 ع الفاضي؟؟؟ امسحي توة يبالك.هههههههههه
المهم الصالة فيها انترنت وكمبيوترات... كسدت ع النت الى الساعة 11 اليل جتني المظيفة قالتلي بنسكروا طلعت وقلت انشدها دهواري في المطار ..المهم لفيت لفيت لفيت لفيت... بعدها قلت اكيد خلاص قريب الصبح خليني نرقد اشوي .. شفت الساعة لقيتها الساعة 1 الليل ...اوووووووووووووووووووو ماااااااااااااااااااااااااااااان
والرحلة كانت الساعة 9 الصبح .. خلاص دورت اول كرسي حطيت شنطتي تحتى وحاولت وتظاهرت بالنوم.. طبعا كل مابنرقد تنزل طايرة ويجيك هذاك الفوج بدوشتهم اتنوض مخلووووع والجو كان بااااااااااااااااااااااااارد
المهم اول ماجت الساعة 6 مشيت جري للصالة اصلا كنت راقد جنبها.... هههههههه خايف تهرب...
خلاص خشيت دوشت وطلعت فطرت ومشيت لبوابتي وانتظرت دوري وركبت الطايرة ..واحسن حاجة كان المقعد اول وااااحد ... رااااحة مش عادية ... اول ماطلعت الطايرة نزلت الكرسي وحولته لسرير وتغطيت بالبطانية وقلت للمظيفة ما اتنوضيني ..تعبااااااااااااااااااااااان... المهم نوووم نووووم نذكر اني نضت بعد 8 ساعات من الرحلة... يعني كلها مشت نوووم ...ههههههههه
نضت جيعاااااااااااان .. طبعا في البزنس تطلب امتى تبي... وكل اشوي جاية المظيفة شن تبي شن تبي.... المهم خذيت وجبتين وعوضت النقص وجابوا النماذج وعبيتهم وكانت جنبي وحدة المانية تتكلم 6 لغات... الا العربية... وعندها بنتها في نفس الجامعة اللي ماشيلها ..كسدنا هدرزنا وقرمت فيا اشوي ع النوم... لين ماوصلنا للمطار.
نزلنا وسألونا وطلعت من المطار ... والله ابيخ ابيخ ابيخ لقطة لما تطلع من المطار وماتلقاش حد تعرفه يستقبلك... اني متعود ع السفر ورهبة المطارات والحمد لله ماعنديش مشكلة... بس هذه كانت اول مرة انحس بالغربة.. حسيت اني ضايع.. احساس بايخ الصراحة ما انحبش نتفكره. المهم طلعت وكالعادة اول كرسي وشوف الناس وين يمشوا والتاكسيات كيف ووين الباصات... طبعا فيه نقطة ... اني قبل ما نطلع من ليبيا شادها معلومات ع المدينة والجامعة ع النت.. المدينة شفتها بيت بيت ع القوقل ايرث.. وعرفت الجامعة وين وكيف نوصللها من المطار واقرب فندق للجامعة.. طبعا كله ع النت والاوراق اللي بعتوهم مع القبول... خلاص طلعت وركبت في تاكسي ..قالي وين قلتله شن تعرف فندق اسعارة رخيصة وقريب من الجامعة .. قالي فيه وعطاني اسعار.. لقيت الفندق اللي عندي اقرب بس اغلى اشوي... قلتله ارفعني لهذا.. المهم وصلت.. وحجزت ونذكر اول حاجة درتها دوشت وغيرت لان الجو كان بارد (شهر 6) وطلعت للجامعة ..كان الفندق قريب جدا للجامعة تقدر اتقول في الحرم الجامعي... خلاص سألت عن مكتب الانترناشونال ستيودينت وعرفت مكانه ومشيتلهم وحجزت معاهم موعد امتحان تحديد المستوى وكملت الاجراءات التانية .وطلعت بعدها خذيت بيتزا... وكنت خايف من لحم الخنزير..قعدت انقوله مافيهاش بورك ؟ يقولي ايه.. انقوله اكيد؟؟؟؟ يضحك علي... ههههههههه ماعنديش فيهم ثقة.
خلاص بعدها مشيت للفندق ونوم ..نضت الساعة 1 الليل... الساعة البيولوجية امتاعي مزال بنظام ليبيا... كسدت ع الافلام للصبح ومشت الاموور بعدها وتعرفت على ليبيين في الجامعة وحصلت شقة وبعدها حولت مع عائلة وخشيت في جو القبولات واجري وسافر وقارن... لين ما توفقت بنعمة من الله وفضل وحصلت قبولات وبديت اكاديمي ومشت الامووور.
كلها بقت للذكرى... والله سبحان الله كانه امس.
سامحوني تكلمت بالعامية وآسف ع الإطـــــالــــة
أيضا آسف الموضوع مافيش صور الرحلة ...هوايتي التصوير.. بس الصور حاطهم ع الكمبيوتر ودرتله فورمات وضاع الضفدع في الضباب...
بس نوعدكم اني انزل صور لكل الولايات اللي زرتهم او عشت فيهم في موضوع اخر

هذه صورة للجامعة ::







لا تنسونا من الدعاء... الفترة هذه فاينل... وبالتوفيق لكل الشباب

تحياتي...

 

والله خوي romarحطيتنا في جو الرحلة وفعلا كانت فيها لقطات مضحكة علشان تكون لك ذكرة
ان شاء الله تروح سالم لبلادك و غانم بشهادتك باذن الله
وربي يوفقك

استمتعنا بتجربتك أخى Romar والباين انها كانت ممتعة .. وان شاءالله موفق فى الفاينل وما بعده وربى يستر حتى انى على الألمانية ان شاءالله ولأول مرة

وربى ايسهل أمورنا جميعا ان شاءالله .

بجديات استمتعنا برحلتك يا اخ Romar و الحمد لله حصلت قبول كله يهون و يقعد غير خراف ...و ربي ان شاء الله يوفقك في امتحانك و يسرلك الامور...........عليك بهدا الدعاء:
[color=red]
اللهم اشرح لي صدري
ويسر لي امري
واحلل عقدة من لساني يفقهو قولي

عجبتني هلبا رقدك في الطياره 8 ساعات

بالتوفيق للجميع

Romar كتب:

وفيك بارك خوي المساسي... اللهم آمين ... يسلمووووو
حبيت نسأل عن خوي هاشمي اللي عنده معلومة عنه... معاش خش للمنتدى... وايضا خوي الغراري... حتى هوا غائب... ان شاء الله المانع خير بس!!!!

بالنسبة للاخ الغراري هو متواجد بس مطلع اكثر من انه مشترك عادة يدخل ويشوف هل في استفسار او لا والحمد الله المانع خير بس الهاشمي للاسف لاتوجد لدي معلومة والظاهر انه في غاطس في الامتحانات

كل عام وانت بخير اخي romar

والله وبكل صدق عشت اللحظة معاك خوي رومار
وانا مجرب هاذه اللحظات اللحظات الي نبكي مع نفسي فيها بسبب الغربة ولماتكون في عالم عمرك مشفت زيه وطبعا انا عمري مسافرت لكن جربت هنا في وطني لبالك في امريكا اخر الدنيا واصعب اللحظات هي اللحظات الاولي الايام الاولي ايام كيف تتاقلم مع الوضع .
ونبي نقولك حاجة تقعد ذكري وتضحك علي روحك بعد وقت وفي نفس الوقت تقعد تبكي لانك ترجع في ذكريات من الماضي الي تشعر بنفسك انك كافحت تعبت وعشت اشد الايام الحلوة والمرة في نفس الوقت.............الوقت يجري والله يجري وسيورها تقعد مغامرة وذكري في العمر محفورة...

الاخ مساسي... كل سنة وانت بالف خير يارب.... مشكووور ع الرد
الاخت aliena:: جزاك الله خيرا على مرورك....
اخي عصام... مشكووور ع الدعاء وربي يوفقك ومرورك اسعدني أخي
اختي امة الله... بارك الله فيك ومشكووورة ع الرد الجميل..
اخي الجراح .. شاكرا مرورك اخي...
اخي محمد اقرين... بارك الله فيك على كلامك الطيب... نعم كانت أيام مرة وحلوة في نفس الوقت..مشكور على رد خوي
كل التوفيق اخوتي وسرني جدا ردكم على ماكتبت
تحياتي...

النجده ه ه ه ه ه ه ه ه ه

مبوش ينزلو الصور حجمهم كبير الباين و لا مش عارف......اعطوني حلول للمجربين

أخي عصام ... كم حجم الصورة؟؟؟؟

@ الغراري::
هههههههههههه... أضحك الله سنك أخي الغراري.. رحلة حلوووة كانت... وانا أيضا أكره الودااااااااااع...
مشكووور على مشاركتك... وموفق أخي.

اوكي شباب والله وخيكم منسجم مع قصصكم المشوقة باهي احكونا علي جو القراية غادي كيف تغير عليكم جوها وكيف خشيتو وتاقلمتو مع الوضع الاسادسة وكيف اللغة الانجليزية شادة معاكم ولالا لانه فيه الي خدي ايفاد والله الانجليزي مخطم عليه واعطونا بعد النصايح لانها اكيدة عندكم نقاط فهمتها عاد كيف احنا الليبين ميفوتنا شي جميع (الخرر
والدوزوريغ)نعرفوها بعد مدة اهاهاهاهاهاهاهاها .......

السلام عليكم ..كل الاخوان
اخ الغراري نبي نسألك كم كانت الساعة في مطار منيابلس لما وصلت ؟ و كيف غيرت الحجز امتع الرحلة اللي فتاتك؟
مع الشكر لجميع الأخوة

السلام عليكم..
اخي الغراري و الله ضحكتني هلبا قداش ليا مضحكتش و تلاقيت مع ليبين ..تجربتك انت رومار غايه في الروعه...ع العموم مترعشش روحك اني ديما نسافر و مع دلك السفره هده غير كل المرات و حتى الي قاريله النقص راح مني....

اختي امة الله...زوجتي هي التي تدرس احيانا عندما اكتب عن وضع الجامعه و الدراسه اتكلم علي لسانها بصفة التذكير بدل التأنيت بش منلخبطكمش ... يعني الاسم هدا مشترك بيناتنا
انا حاليا اشتغل حضانه للاطفال لين نعرف راسي من رجليا .... وخيكم انجليزيته بالهون ..نوعا ما بديت نمشي في اموري لكن الدراسه لم ابد\أ بعد لان وصلنا نهاية السمستر حتى الصغار محصللنالهمش حضانه...
لكن الي عرفته ان الحضانا للاطفال دون ال 3 سنين ب 600 او 700 دولار في الشهر
وفي البيبي ستر بالساعه..اني حصلت 2 في الحي متعي ( وحده امريكيه ووحده باكستانيه مسلمه) ب 2 دولار الساعه ( طبعا هادو سعرهم رخيص لان ميتبعوش لمدرسه او مؤسسه مجرد ربات بيوت يبو يستفيدو من وقتهم) في هلبا مسلمات جايين مع ازواجهم يشدو في الصغار بالساعه ,,,,,
و بالنسبه للاطفال بعد 3 سنين لازم تقدمولهم بكري بش يحصلو مكان

عصام

[color=cyan]