تجربة مسافر

السلام
اخي وين هذا المعهد
واتحصل قبول مشروط فيه اولا
اذا فيه ارجو الرد
وابعتلي رقمك
تحياتي

لا دخل لى المكتب الشعبى لا نهاء الاجراءات بل المكتب الكندى هو المخول بتمام الاجراءات

بسم الله الرحمن الرحيم
بالنسبة للاجرات المكتب الشعبي وهو ان المكتب المسؤل عن الطلبة اليبيين في امريكا هو المكتب الكندي ويتم الاتصال به عن طريق الايميل يعني انك لاتحتاج الى السفر الى واشنطنن وطبعا المسؤل عن ولايات فلوريدا موظفة اسمها سارة وهي في المكتب الكندي وهذا ايميلها Slevison@cbie.ca
وهذا رقم تلفونها 18773136133 بعد تطلب هذا الرقم تسمع اسطوانة نطلب 272
تبعتلها ايميل وتقوللها انك وصلت وتحددلها مكانك في فلوريدا بعدها هي تطلب منك مستندات مثل التفويض والقبول وكل اوراقك امتاعات ادارة البعثات وثم هي تفتحلك ملف وتعطيك رقم الملف وتبعتلك فورم اتعبيه وتسحبها وتوقع عليه بخط يدك بعدها اديرله سكنر وتبعثلها لغرض طلب منحة شهرين ولا تنسى اول ماتوصل فلوريدا تفتح حساب فالمصرف حتى تبعتلهم رقم حسابك وشيك ملغي وبعدها باسبوع ان شالله تنزل منحتك في حسابك و
ويمكنك الاطلاع على موقع المكتب الكندي وستجد فيه كل الفورم form
اللي ممكن يبعتوها لك .
وشكرا

طبعا الحمدلله أخيرا جاء دورى فى تجربة مسافر وهى كالتالى :

عندى ملاحظات حبيت انشاركم بيها وهى كالتالى :

اول شى انى ان شاءالله لو روحت الى ليبيا ورجعت الى امريكا مش حنختار الخطوط الألمانية ابدا وهذا رأى الشخصى وانفضل نختار انجليزية او هولندية باعتبارهم اسهل ومش معقدين وممكن الواحد ايحصل فيهم فندق للراحه .....

تانى شى بالنسبة للقبولات الأكاديمية .... حاليا اغلب الجامعات تقبل فى طلبات التقديم لفصل الخريف واللى عادة يبدأ من أغسطس ....بالتالى هذه فرصه ذهبية للى بيجى توا يعنى يستفيد من الوقت .....

تالت شى حبيت انقوله ومش عارفة لو غيره لاحظه او لا فى امريكا وهو اسلوب الناس هنا وطريقة تعاملهم مع القادمين الجدد ....بصراحة قمة فى الرقى والإحترام يعنى ما اتحس انك غريب ابدا .... وهذه نقطة مهمة كنا انفكروا فيها قبل ما انجو ....

اسفة أطلت عليكم ... بس ان شاءالله انكون ما انسيت حاجة ... وبالنسبة للصور للأسف حاليا ما تمكنت انحطهم بس ان شاءالله انحاول فى مرة تانية ....

دعواتى لكم بالتوفيق جميعا أخوتى ولا تنسونا من صالح دعائكم .....

اخوانى واخواتى انارحلتى انشاء اللة يوم الاحدالقادم الساعة 4:00م ارجوكم دعواتكم امعى انسيت انى انقول ماشية للكلورادو مدينة دنفرعلى الخطوط الهولندية

السلام عليكم ورحمة الله وبركاته
اختي aliena الحمدالله علي سلامة الوصول انشالله بالتوفيق ويعطيك الي في بالك وترجعنا مرفوعة الراس
الاخت عزيزة انشالله تمشي وتوصلي بالسلامة وتعطينا رايك في الرحلة وبالتوفيق مقدما

السلام عليكم و رحمة الله و بركاته
و الله للمنتدى و الاصدقاء وحشة مثل الي للوطن و الاهل تماما
معليش تأخرت بمشاركتي لأني ماكانش عندي نت بالشقة
قراءة تجاربكم تملأ الواحد فينا بمشاعر متنوعة و حلوة و اليكم تجربتي علي أجزاء
اليوم الاول 4/12/2010
النقلة تبدأ بوداع أسرتين و الكل مجرب صعوبة هاللحظة و خاصة في المطار "استودعناهم الله"
رحلتنا كانت علي Britishairways و بصراحة كانت رائعة في خدماتهم و تعاماهم "اني من محبيهم فينطبق عليا شكار العروس ههههههههه"
المهم الرحلة كانت سهلة و سلسة و اهتمو ببنتي هلبة لما عيطت بسبب اختلاف الضغط
اني ما حجزتش الفندق من ليبيا لأني ماكنتش واثق من خشوشي لما لقيته مسموحلي مشيت لمكتب Hotel Reservations في المطار و الحق كانو متعاونين و هم حجزولي في فندق حجرتين بأعتبار اسرتي 6 أفراد و كلفتني حوالي $400 بس من غير فطور و العشاء درت طلبية من مطعم حلال نعرفه من قبل جتني للفندق
المهم مشت امورنا تمام. بالنسبة للصلاة صلينا جمع و قصر و ان شاء الله ربي يقبل
و دوشنا و تريحنا و تهنينا في نومتنا و الحمد لله
في اليوم التالي أسرعنا للمطار و أتممنا اجراءاتنا و التفتيش عادي بس ما تاخدوش حاجات سائلة حياخدوها منكم و زي ماقال خوي عصام البسو احذية ساهل تنحيها و تلبسها بسرعة وقت التفتيش
و توة اعذروني جي وقت طلوعي بس بأذن الله للحديث بقية

السلام عليكم و رحمة الله
قبل ما نركبو و بالتحديد في صالة الانتظار جتنا المضيفة لعندنا و لأننا كنا عيلة خششونا للطائرة قبل الكل
بنأكد علي كلام خوي عصام بخصوص الاكل لأني صارلي نفس الموقف و الحق قعدو يستعذرو هلبة مع انها مش غلطتهم و حتي حني جابولنا من الي فاضل من جماعة vegeterian
و الخدمات ما توقفتش علينا شي نفاص جبنة شي كيكات شي مشروب و الحمد لله الرحلة تعدت علي خير حتى بنتي لعبت مشوار و اتفرجت مشوار علي أفلام كرتون و ارتحنا لما رقدت
القرابة 9 او 10 ساعات للي عنده الصغار يفوتو. و لما يرقدو تتفرغو للأدعية و قراءة القران و حتى انتم تتفرجو
ربي يوصلكم سالمين
لأن الكيبورد متعي مافيشي عربي و نكتب ببطء شديد فأسمحولي حنطول عليكم بأجزائي مش زي الاخرين
تبو الحق مانحسابش نفسي حنزبطهم
استودعكم الله

السلام عليكم
المهم الرحلة الطويلة الي فكرت فيها هلبة مشت علي خير و الحمد لله
لما حطت بينا الطيارة في دنفر وصولنا تزامن مع وصول رحلة المانية فالزحمة كانت لا توصف و لما وصل فينا الدور كان حالنا لا يوصف من التعب
ما يميز جوازات دنفر انه ماهفش تحقيق لاش جاي او غيره مجرد ادخالك في المنطومة بس الي اخرنا كان فيه اشكالية في منظومتهم
رغم التعب لقيت نفسي نقول في خاطري "حتى امريكا عندها خلل في منظومتها معادش بنلوم عالليبيين" ههههههههههه
المهم كملنا من الجوازات مشينا لجهة تسجيل فلوسك عبينا ورقة لأننا جايبين اكثر من المسموح بيه و سؤال ليش كان واضح ليهم همه الي قالوه حني عيلة كبيرة و من غادي لجهة الشناطي سألوني جايب ماكلة قلتلهم spices فطلبو مني يشوفوهم اني مداير احتياطي و لا مهم في ساكو واحد فتحته شبحوهم و ماخدو شي و طلعت لاقاني صومالي وصلني لواحد صاحبه وصلني للفندق كلفني 100$
الفندق اسمه LA QUINTA و حجزت فيه Family Room لمتنا كلنا و الحمدلله
ربي و الحمدلله كان معانا طول الرحلة الشاقة فرزقني بأخوة عرب وروني منين نشري اكلي و حتى عملولي Discount في السعر الخاص بالحجرة باعتبار اننا طلبة و انشجعكم علي الحجز في عالفندق لهلبة اسباب اهمها انه يشتغلو فيه عرب و انه يقابله مصرف Wells Fargo
الى القاء في الجزء الجاي
قولولي كترتها راك
بس و الله الكتابة بتخمين مكان الحروف صعبة فاعذروني

السلام عليكم
طبعا اول شي درته تاني يوم مشيت للمصرف و فتحت حساب و طريقة الاستقبال و الخدمات و الاسلوب مميز
و بعدين بديت رحلة البحث علي بيت
نصيحتي ما تستعجلوش زيي لأني بعد ما أجرت تعرفت علي الليبيين و وروني اماكن مختلفة
المشكلة صاحب العبلة الي زي ما يقدرش يطول في فندق
و راهو بروحك حتوه لأازم تستعين بالله اولا و هو حيرزقك بنت يساعدك
الله المستعان

لالالالا

مشكله كبيره قصص تخوف
انا طالع معا اختى ان شاءالله وللعلم انا ندرس فى جامعه سنه ثانيه هل استطيع ان اكمل دراستى هناك ام لالا
مرافق يعنى


ارجوك واحد يشرحلى شن اجراءات المرافق وفهمونى كويس

انا لازلت ماقدمت ولا ورقه للدراسات يعنى مزلت بادى جديد

وانا المرافق يعنى نريدو

هل الدوله تبدا بصرف فلوسك بعد ماتعمل حسا ب جديد

وهل انتو تحجزو الفنادق والاكل على حسابكم ام حساب الدوله

فهمونى من البدايه يعنى بصراحه كم ناخذ فلوس معاى

للعلم انا مرافق لأختى
يعنى لازم سكن اول بأول


لو بروحى اعيش حتى فى الشارع

تحياتي الحارة الى جميع المقيمن حاليا في امريكا
وانا ان شاء الله متوكل على الله ممكن في بداية 3 او نص شهر3 الى دنفر
ونبي نسأل خوي الهاشمي وكل المقيمين فيها على احسن اماكن للسكن وارخصها انا متزوج وعندي ثلاث اطفال واحد رضيع وولد في الصف الثالث وبنت في الصف الاول ونبي نعرف اسعار الايجارات واماكنها بالاخص من اخوي الهاشمي لانه قال انه بعد ما اجر قالوله اخوة ليبيين على اماكن افضل فياريت يا خوي الهاشمي تقولي على هل مكانات باش نحطهم في بالي ولما نوصل على بركة الله نمشيلهم ونشوفهم وهذا السؤال مطروح على كل الليبيين المقيمبن في دنفر نبي شاركوا معنا وانا طرحت هذا السؤال في موضوع درته على السكن لكن مافيش حد جاوبني غر زوز وينكم خوكم يبي اجابات

السلام عليكم اخوتى واخواتى فى هذا المنتدى الرائع
الذى بعد وصولى لامريكا حسيت نفسى وكانى عارفة كل شى فيها طبعا من تجاربكم ومعلوماتكم اللى قدمتوها لنا فى السابق ففى البداية نبى نشكر كل من قدم معلومة صادقة لهذا المنتدى الرائع
سنبدا الرحلة طبعا بسلامات الحارة والدموع على الوالدة وكلالاهل وعلى النظرات اللىانشاء ماتكونش الاخيرة على ليبيا وتذكرت كل ماكان حلو ومر وما عانيته للوصول لهذه المراحلة فكانت دموعى بين الفرح والالم فى وداع الاهل
طبعا اتجهنا من مدينتى الى طرابلس قبل موعد السفر بيوم وثانى يوم الساعة 1:30ظهرا اتجهنا لمطار طرابلس الدولى ونحب انوصى اخوتى اللى ماشسين على لهولندية على الشنط لازم ايكونو 2شنطة لكل فرد ووزن كل واحدة 23ك وليس ممجموعع الشنطتين فى شنطة واحدة كبيرة هكى حيسبوها لك 1هالبة الوزن وحتدفع عليها عموما الساعة4:00تمام ركبنا الطائرة واتجهنا الى امستردام طبعا الرحلة كانت مريحة4ساعات فقط استضافة جيدة اة نبى انقوللكم حاجة بالنسبة للمياة قدرت انهلبها بقدرة قادركانت فى الكروسة امتاعة بنتى وقلت اكيدة حيخذوها لكن ما خذوهاش حاجة اخلرى بدل المعلبات مشينا الساعة12ظهر فى طرابلس الى مطعم واخذنا منا وجبة دجاج وحوت مشوى وغلفها لنا اكويس واخذناها معنا الى امستردام طبعا وصلناالى مطار امستردام وما عجبنى شى الا النزلى الى نزلها كابتن الطائرة تقريبابرم بينا امستردام كلها قالك البراق من اعلى السموات الى اسفل الارضيين من غير اى مقدمات اللة المستعان طبعا خشينا المطار عالم بروحا نبو حد يسالنا هيه انتو وين كيف مافيش حد عدل لا وين ولاكيف قالت الزوجى احسن حاجة نمشو للفندق اللى حاجزين فيه ونرقدو وبكرا يجعل اللة 100فرج قالى ابدا لازم فى حاجة او ختمة على اساس ان نحن ترانزيت
مشينا من الواحد لواحد نين طحنا فى وحدة زى المكتب هكى خذت تذاكرنا وبحتت فى الكومبيوتر المهم عطتنا زى التذاكر اخرى فيها بكرةال ساعة كم طائرتنا
ومن اى بوابة وبعدها تبعنا اليافطات نين وصلنا للفندق دوشنا وتريحنا وتعشينا طبعا العشاء اللى جايبينا لانا الفندق مايشملش خدماتالاكل وثانى يوم وعينا كان الخروج من الفندق الساعة التاسعة وفعلا طلعنا على الموعد ومشينا الاقرب كافيه وفطرنا
وللحديث بقية

السلام عليكم ورحمة الله وبركاته
أنا أخوكم في الله بدأت رحلتي يوم 17 /12/2009 متجها الـــــي مانشستر وعند وصولي هناك استقبلوني مجموعه من الاصدقاء والأقارب وتوجهنا الـــــي بيت احد أقاربي وبعد وصولنا دخل وقت صلاة المغرب فذهبنا الـــــي المسجد والحمد لله وبعد الصلاة عدنا الـــــي البيت لنجد الغداء اعتقد كسكسي فضحكت كتيراههههه اصل الـــــي بريطانيا فأصلي في المسجد واتغداء كسكسي وكأني لم أسافر المهم بعد انتهاء العطلة وكانت عطله تلجية ذهبت الـــــي الكولج للتسجيل وعند دخولي الـــــي الفصل قلت قود مورنينق فردوا عليا صباح النور فضحكت وضحك الفصل بالأستاذ ولكن وللأسف بعد أسبوعين من الدراسه وهم احلي ايام في بريطانيا سأكمل لكم في صفحه اخري

بارك الله فمن اعطى المعلومة الوافية بعيدا عن الاطال او الكلام الزائد
ارجوا من اخوتى جميعا ان يركزو على المعلومة السريعة البسيطة ومافيش داعى للكلام الزائد وفق الله الجميع

اخوتي واخواتي الحمد لله على سلامتكم جميعا

السلام عليكم ورحمة الله وبركاته
ما فش حد سافر بيش يحكينا علي تجربتهم ، هل فيه فرق بين التجارب قبل وتوا او لا؟
وياريت اتفعلو هل الموضوع من جديد ، حتي يكون فيه تفاعل بين الطلبة لان المنتدي مكسد ؛؛؛؛؛؛؛؛؛؛

ربى يوفقكم......بس ياريت تبعثولنا عنوانكم على الفيس بوك.....عشان الراسلوكم ونستفيد من خبرتكم..