خاص بالموفدات (الموفدة الليبية بين الدراسة ,والبيت)... نقاش

المهم التعاون بين الناس وا>ا صار اي تقصير الطرف لاخر يتفهم الموضوع ويصبر لانها مرحله وتمر ان شاء الله علي خير

انا الحمدلله طالبة موفدة ومتزوجة قريت كورس اللغة اللي كملته الاربعاء اللي فاتت ونجحت فيه الترتيب الاول وانا حامل والحقيقة زوجي جدا متعاون معايا وانا كنت دايرة نظام معين ماشية عليه يعني مثلا تنظيف الشقة وغسيل الملابس وشراء حاجات المطبخ يكون يومي السبت والاحد ووسط الاسبوع نطيب كيفي كيف اي زوجة بس لما نون تعبانة نتيجة للحمل زوجي ايطيب وينظف عادي ونحاول اندير واجباتي قبل موعد تسليمها باش يكون عندنا وقت انا و زوجي نطلعو فيه مع بعض والحمدلله امورنا ما شاء الله ومتعاونين وان شاء الله لما ايجي البيبي على خير نستمرو في تعاونا هذا وربي يرزق كل الاخوات بأزواج متعاونين

ان شاء الله ربي يوفق الجميع ،،

نجاة الصغيره كتب:

انا مازلت انسه والحمدلله توفقت في دراستي ولكن بعد عناءءءءءءءءءء وبالنسبه لمتزوجات معي صديقات مقربات جدا لي متزوجات والله تبو الحق مقصرات مقصرات مقصرات مع الازواج والاولاد وقصه والله ونزيدكم من الشعر بيت الاولاد كل يوم مطفلات بيهم ع حد من العائلات الليبيه اللي في بلد الدراسه خلوهم عندكم لعند انجي ووووووو تبو الحق اللي تبي تقرا وتبي تستمر بدون ماتظلم اي حد عليها اتكمل وبعدين تتزوج لان والله صعب جداااااااااااااااااااااا

ماشاءالله عليك أختي نجاة ...من صعب التوفيق بين ثلاث أشياء فلابد من ان يحدث تقصير كبير لطرف ما

مش تعصب بس فى حاجات الازم ضحى بيهم ادا ما لقيتى حلول
وخصوص البنت عند الايفاد نتمنا يكون معه مرافق فى حالات طلعت بدون مرافق وهدا غلط لقدر الله امرضت تعرضت لسرقه الخ
وبالتوفيق للجميع

الموضوع في الصميم
لأن حتى أني موفدة ولدي طفلين ... وأفكر كيف سأقوم بعمل كل هده الواجبات ومتخوفة بعض الشئ ... ولكن بالترتيب والتنظيم أكيد رح تمشي الأمور ... فالبداية كل شئ صعب لكن بعد هكي إنشاالله ربي يسهلها... وأنا لم أدهب لبلد الدراسة بعد...

السلام عليكم 
مشكورة على طرح الموضوع اختى الكريمة 
وبالنسبة ليا عزباء وايام واكون ببلد الدراسة ..وحتى لو اعطيت رائى .... فزى ماايقولو المتفرج ديما فارس 
ومع ذالك ارى انه الاعتياد على تقسيم الوقت والحزم فى تنفيد ماهو مخصص لكل وقت  هو حل للاخوات اللى متزوجات وعندهم اطفال
لانه حسب اللى مريت بيه من ظروف (كبر العيلة وشغل البيت مع الضيوف ديما والدراسة تبى والشغل يبي  وحتى نفسك تبى ).كان الحل دائما تقسيم الوقت .
والنوضة بكرى .وديرى تقسيم لكل امورك حتى نومك ديرى كم ساعة بترقدى وكم ساعة او دقيقة بترتاح وامتى بيكون الغداء والعشاء وامتى يلعبوا الصغار وكم ساعة وامتى يرقدو
 وديرى جدول حتى لوجبات الاكل باش اتنحى من راسك فكرة شن بطيب كل يوم . وكان عندك اصغار سن 7 سنوات فما فوق حتى هم يندار لهم جدول للبعض المسئوليات كترتيب اغراضهم واو امور انتى اتحسيهم يقدرو عليها .
وحددى كم ساعة رح تقرى باليوم واى وقت ايناسبك  وتقريبا الامهات اوقات نوم الصغار او القيلولة ان وجدت هى وقت مناسب للمراجعة والدراسة ..
توضيح الامر للصغار ان كانو يتفهموا هالامر .وامر الحضانة بشرط ان تتوفر فيها شروط تحافظى فيها على طفلك حتى هو امر يساعد الام الموفدة  ويخفف العبء عليها 
وتحياتى لكم وربى يوفقكم .وسامحونى عالاطالة

السلام عليكم حبيباتى النساء بكل اوضاعهن الاجتماعية ... اما بعد الموضوع هذا مايبيش صفحة فى الموفد . هذا يبى صفحاات فى كتاب . وبما انه مطروح . اسمحواى ان ادلى بدلوى فيه! ....اولا" ان ام زى كل الامهات ولدى الحمد لله اربعة اطفال اعمارهم من 2 الى 9 سنوات ؟ ثانيا الموضوع هذا ما تعانيش منه الامهات الموفدات اللى خارج ليبيا بس . حتى الامهات العاملات ! على اعتبار انها أم وزوجة و موظفة و كنة وحماة وجارة وبنت عم وخال ومرت خو  الى الخخخخخخخخخخخخخ.... يعنى مليون التزام غير البيت والزوج والاولاد . ثالثا هناك امهات مازلو ما كملوش دراسة اى كانت .... يعنى من الاخير الموضوع يهم كل الامهات والزوجات وحتى العازبات , والتزام المرأة بالمسؤلية تتربى عليه حواء من نعومة اظافرها . وسواء عزيزتى كنت موفدة ام لا الحال مش بعيد عن بعضه . يمكن الفرق انك فى الخارج بعيدة عن الاجتماعيات شوية ... بس واجباتك هى نفسها . ومن تجربتى الشخصية ومن اعتبار لا ارضى لاطفالى وبيتى وزوجى يشىء اقل من الممتاز حتى لو كان على حساب راحتى احيانا" ولكن نظرة الفرح و الرضا ،واحيانا" كلمة شكر منهم تنسينى التعب والالم .... والمهم عشان تمسكى العصا من النص زى ما يقولوا عليكى اختى بالنظام ،ثم النظام ،تم النظام فى كل شىء من الابرة الى الصاروخ فهو ياحبيباتى :اساس تقدم الشعوب لذلك تعلمى شىء فشىء ،سوف تجدى نفسك  مع الوقت تدركى مدى فوضوية الاخرين من حولك . وسوف يتسنى لكى الوقت الكافى للقيام بباقى التزامك . واكيد تعويد باقى افراد اسرتك مهما كانت اعمارهم بأدوارهم فى البيت وواجباتهم الشخصية ( كأرجاع الالعاب الى اماكنها بعد الانتهاء من اللعب . وضع الاوراق والمخلفات فى القمامة اكرمكم الله. مساعدة الكبار منهم للصغار هكذا ) سوف تجدى ان  الامور يدأت تتنظم معك ،وأكيد دور الزوج مهم خاصة  دوره بما يخص الخارج من المنزل (كالتسوق. وزيارة العيادة لمن اكبر من عامين . امور الدراسة. وهكذا ) يعنى توزيع المهام ... ويالتالى يكون الحمل عليكى اخف . ايضا "الاعمال المنزلية يمكن ان تقومى بعمل جدول اسبوعى حسب ظروفك  ... كذلك البرامج الخارجية ممكن تعملى يوم  للراحة والترفيه حتى لكى انتى مش بس الاطفال .(كل اسبوعين مثلا"). واكيد النوم بشكل مبكر والاستيقاظ مبكر هو سر النجاح والشباب والحيوية حتى لصحتك . وكذلك يمكنك يوم الاجازة الاستيقاظ ابكر بساعة او اثنين للدراسة هيكون الجو ملائم عشان اطفالك و زوجك فى سابع نومة ولا يكون فى حد محتاج لوجودك غيرك وتستفيدى من الهدوء فى البيت . وأخيرا" عشان طولت عليكم اكيد تجهيز اى شىء ابكر من الوقت بفترة طويلة زى يوم مثلا" او نصف يوم..حتخلكى مرتاحة ودائما" مستعدة ومن  غيرعصيبة او تفلويج زى ما نقولوا،  والله يعين كل الامهات الى تربى وتبنى فى جيل مختلف عن اجيالنا جيل يحمل الغد بشكل اجمل واحلى ولابد انكونوا امعاهم عشان يقدروا يكملو بناهم وأن شاء الله اكون افدتكم عزيزاتى وعذرا" على الاطالة ودائما "تذكروا مافيش مستحيل والله ولى النعم والتوفيق ................

السلام عليكم 
طبعا انا انسه ومتحصله على الايفاد ولاكن عجبني الموضوع النقاش وحابه نبدي برأي واعتقد بان زي ماقالو الاخوات المساله بالنظام والتعاون نحس في كل شيء يمشي لان كلها سنوات وتمشي واعتقد حتى لو صار تقصير مش حيكون كبير لان الزوجه مش حتقعد طول اليوم برا ولا الزوج واكيد فيه وقت مخصص للدراسه ووقت للنوم ووقت للراحه ووقت للبيت وتنظيف  المشكله الكبرى هيا ممكن في وجود الاطفال واني نشوف ان لازم يكون تعاون بين الاثنين في كل الاعمال  وحتى فالاطفال اما اذا كانت كل اعباء تقع على الزوجه فاكيد حتكون صعب المهمه وربي يعينكم وان شاء الله كل وحده تطيح في راجل  يكون باله واسع  متعاون معها لان هذا طموح وكل انسان مايقدرش يتخلى عن طموحه وفي نفس الوقت الزواج والانجاب والقيام بالواجبات هيا من سنه الحياه  وواجب على الزوجين  واعتقد ان كل هذا يصير جيد بالتوافق والتفاهم بينهم الاثنين من البدايه وربي يكون في عون الجميع

تبو الصراحه
بجد موضوع قيم و اكثر من رائع لان معظم الموفدين يراودهم نفس التفكير وتقريبا نفس الاستعداد

بس عندي إضافه

ممكن انا قلت ممكن لاني مش مجرب أعزب ,,, موفد صح لكن ما زلت ما طلعت  .

ممكن لما يكون فيه أكثر من عائله طالعين مع بعضهم أو يستنو فيكم عائلة أو اثنين في بلد الدراسه  ممكن العائلات يساندو ويساعدو بعضهم


لكن بشرط يكونوا عائلات ممتازه بمعنى الكلمه ,( تفاهم ومعامله حسنه ومثل الجسد الواحد)

ملاحظه لو الزوج موفد والزوجه لا أكيد الزوجه رح تعين وتساعد زوجها والعكس صحيح
لكن لما الاثنين موفدين , فمن رأي أن يكمل واحد ويستنى الثاني وأعتقد أن يتم الزوج دراسته والزوجه تستنى مش لشئ إلا أن الزوج هو المسؤول الاول والاخير و الواجب عليه الانفاق على الاسره ومن البديهي أن عندما يتحصل على شهاده اعلى يكون مرتبه أعلى . هذا مجرد رأيي

المهم
بالتوفيق للجميع

ملاحظه لو الزوج موفد والزوجه لا أكيد الزوجه رح تعين وتساعد زوجها والعكس صحيح
لكن لما الاثنين موفدين , فمن رأي أن يكمل واحد ويستنى الثاني وأعتقد أن يتم الزوج دراسته والزوجه تستنى مش لشئ إلا أن الزوج هو المسؤول الاول والاخير و الواجب عليه الانفاق على الاسره ومن البديهي أن عندما يتحصل على شهاده اعلى يكون مرتبه أعلى . هذا مجرد رأيي

ليش بصراحة فى ناس واجدة موفدين هم الاثنين وماشية امورهم كويسة .....وبعدين نعرف ناس موفدين والزوجة قاعدة فى البيت وماتقراش بس شعور مؤلم واجحاف فى حقهم  .........

لان الفراغ قاتل ..بالنسبة للمرافق سواء الزوج او الزوجة لان التانى حيكون مشغول والاخر فراغ وملل ......مهما اشغلت نفسها بالبيت والاولاد سيكون هنا وقت فراغ .بالذات اذا كانت عندها جميع وسائل المساعدة فى البيت 
.....
أما عن نفسى اخى مرافقى  ان شاء الله ومازلت ما ذهبت لبلد الدراسة وأفكر فيه دائما واحاول أن اجد له مكان يدرس فيه حتى لو على حسابنا وما ضموش معاى 


واخيرا الانضباط بالواجبات والتفاهم بين الاثنين سيكون الفيصل فى تجاوز العقبات وبما ان الايفاد فترة محدودة وتنقضى فلابد التركيز فيها والتعاون من اجلها 
بالتوفيق للجميع

القصة تعتمد علي النظام من وجهة نظري حتي لا نحرم أحد من الطموح ...
ولو فيه أمكانية أن أحد ينفذ بحيت لا تضيع الفرصة  علي الطرف الثاني  ممكن يكون أحسن 
نتمني التوفيق للجميع

السلام عليكم
شكرا لاختي صاحبة الموضوع وبارك الله فيك ع الطرح
برغم انني عازبة ولكني احب ان اشاركم في هدا الموضوع فالحياة كلها مبنية ع التعاون
فمابالك الحياة الزوجية وخاصة في بلاد الغربة
ففي رائي ان التعاون مطلوب جدا بين الاثنين يعني مرات الزوج يجد نفسه يقوم باشياء بالعادة ما يعملش فيها في ليبيا
واظن ان هده قمة التعاون
واعتقد ا النجاح الدي تسعى له الزوجة او الزوج او كلاهما ليس حاجة خاصة بواحد دون الاخر
انما يمثلهما معا
في بلد الغربة لابد ان يضع ااثنان نصب اعينهم الوقت
فالوقت اهم شي وكيفية استغلاله بصورة صحيحة من حيث تنظيم حياتهم الدراسية والخاصة عليه
واسئل الله ان يعين جميعا الموفدين لا فيه خيرهما وصلاحهم

حتي اني متخوفة

اني متزوجة وام لطفلين وموفدة وطلعتي انشالله اقريبة بس بكل خايفة انضيع افحق زوجي قرة اعيوني واصغاري نبض اقليبي واللي امشجعني زوجي اجد ايقوللي انا امعك في كل شي المهم اتروحي متفوقة بشهادتك وانا ما نكذبش من قلبي نبي نقرا عندي كل العزم والاصرار بس انشالله ربي ايكون فعون كل أم وخاصة المرا اللي تقرا وعندها اصغار

الموضوع حلو ومهم وشيق والأهم هو تعاون الجميع للوصول للنجاح

أخواتي المشاركين أنا لدي مشكلة أنا موفدة وطلعتي قريبة ولدي بنتين وسنهن الكبرى 1و6أشهر والصغرى 6 أشهر فقط يعني على روس بعضهم .... زوجي يقول أنه حيسيب الصغرى مع والدته المشكلة أنه حاسم الموقف ومقرر و أنا ليس لدي رأي في هذا الموضوع ورائيه أنه يكفيني شغل البيت و الدراسة والعناية بالبنت الكبيرة .... مع أحترامي الشديد لأهل لكن بيتهم ما فيه الا والدة زوجي وهي سيدة كبيرة و لديها شابين في الجامعات البيت بيت عليه واحد طالع وواحد خاش وانا قلبي ما يطاوعني أنسيبها وبالنسبة لأهلى فوالدتي كبيرة في السن ومش حيل تقوم بطفل ومعها عيت خويا في الحوش والمرة عندها ما سادها ماحتى أعطوني رأيكم مع العلم أن زوجي متعصب جدا لرأيه وصعب أن يحيد عنه أفيدوني

اختي احلام تبارك الرحمن ... ربي يوفقك في حياتك الاسرية والعلمية ...صعبة واللي يقدرها يكون كانه نجح في امتحانه الاول ... اهم شيء الاصرار والتشجيع والتنظيم ونعرف شن نبي ومخطط صح اما الباقي كله بتوفيق من عند الرحمن

Ahlam Ramadan كتب:

الأخت اللي عنده بنتين وبتخلي واحدة في ليبيا بناء على رغبة زوجها .... بصراحة القصة صعبة جدا.... السؤال الأول هل زوجك موافق على دراستك بقناعة وإلا غير مسايرة فيك؟ لأن لو مسايرة ليك بس فهو ممكن يكون شرط النسيب الكاره زي ما نقولوا لكن لو ماشي معاك بقناعة فالموضوع فيه اخذ ورد .... يعني قابل للنقاش ولو توصلي تتظاهري بانك بتسيبي القراية والإيفاد ... بصراحة المسافة بعيدة والدنيا فيها كل شي .... ومتأكدة لو خليتيها ومشيتي حيقعد تفكيرك طول الوقت مشغول بيه وتتشتتي على قرايتك وتقعدي لا من بنتك ولا من قرايتك .... أنا أم لثلاثة صغار مشيت مؤتمر أسبوع للمغرب وخليتهم لأمي قريب هبلت وقعدت بين التلفون والنت لين روحت
تحياتي وزيدي فكري أيهما الأهم

أدعيلي الله بهديه ليا

موضوع مميز