دليل السفر و نصائح مهمة للقادمين الجدد إلى بريطانيا

الله يبارك فيك

الله يسهل عليك يا اخي حيث انك اخذت بايدي الشباب الجدد وفهمتهم والله انك ابدعت

نبي نعرف هل الافضل و(الاوفر ماديا ) ان الموفد وخاصة اللي معاه عائلة اول شي يديره بعد يوصل ان شالله بريطانيا يمشي للسفارة ويفتح الملف او انه يمشي للمدينة اللي جايب منها قبول اللغة ويشوف المعهد وبعدين يمشي للسفارة انا بصراحة كل واحد نصحني براي نبو راي الاخوة الافاضل لانها حتفرق في الحجز من هنا هل يكون علي لندن او مدينة الدراسة نفسها

هو سؤالك مهم
الحقيقة ذهابك للملحقية من عدمها يعتمد على عدة امور وماديا يجب ان متفكريش ماديا لما تكوني في بريطانيا
الحقيقة أنه عدة عوامل تؤثر في ذهابك للملحقية من عدمها
ادا كان الرحلة تصل بدري للندن وعندك من يراجيك في لندن وعايلتك صغيرة ممكن تمشي للسفارة على طول بس الاحسن لو ان العائلة كبيرة واول مرة تجي للندن ومفيش من يستناك في المطار انك تمشي طول للمدينة وتتريحي وتحجزي سكن وبعدها تجي بالراحة للملحقية
لو احتجتي اكثر تفاصيل ممكن تكتب لي على الخاص وتحدد الاسئلة وانا حاضر نناقشك ونوضحلك
انت اين مدينة ماشيلها

الموضوع يعتمد زي ماقال أخي عبدو على حجم العائلة ولكن أعتقد أيضا أن بعد مدينتك عن لندن يلعب دور لأن لو كنتي تبي تمشي لأدنبرا أو أبردين مثلا في أقصى شمال أسكتلندا معناها الأفضل تمشي للسفارة وممكن حتى تحجزي فندق في لندن لمدة يوم مثلا وتكملي إجراءاتك وبعدين تمشوا ولكن إذا كانت عائلتك كبيرة الأفضل تمشي لمدينتك وبعدين تجي على راحتك.
بس فيه حاجة أنكم مش لازم تمشوا شخصيا إلى لندن لفتح ملف لأن فيه واحد من شهرين تقريبا مشى وقالوله مش لازم تجئ يعني ممكن تبعث الأوراق المطلوبة عن طريق البريد أو الإيميل والأصلية منها زي التفويض او القبول عن طريق البريد.

أيضا بخصوص المطار اللي تنزل فيه يفضل يكون قريب من المدينة اللي تبوا تمشولها لو ماشية لمدينتك قبل ولو الفرق في السعر مش كبير
وممكن تشوفوا أسعار القطارات والباصات عن طريف النت موجودات في هذا الموضوع والذي سيتم نقل الموضوع هذا إليه.
http://www.almofad.com/t9800-topic



عدل سابقا من قبل ِAbu Mohamed في الأحد 30 سبتمبر 2012, 2:24 am عدل 1 مرات

جزاكم الله خيرا اسئلة مهمة واجابة واضحة وشاملة

في ميزان حسناتكم ان شاء الله

thank you

بارك الله فيك وجزاك الله خيراً

السلام عليكم

اخى ابو محمد نبي نستفسر عن تعباية الكارت اللى يعطوه لينا فى المطار

هل يعطوه لينا فى طرايلس والا قصدك لما الواحد اياب من لندن الى طرايلس ؟

الشئ التانى فى خانة متاع Length of stay in the UK

اللى زى حالتنا فيزا زائر شنى يكتب ؟؟ هل نكتب المدة الفعليه اللى مازالتى من الفيزا والا نكتب المده متاع دراسه اللغه ع اساس 11 شهر؟؟

وبارك الله فيك وسامحنا ع تعبك

عدل سابقا من قبل Abu Mohamed في السبت 09 فبراير 2013, 6:59 pm عدل 1 مرات (السبب : كتابة إنجليزية بحروف عربية)

om_tomy كتب:

السلام عليكم

الشئ التانى فى خانة متاع Length of stay in the UK

اللى زى حالتنا فيزا فيزيتور شنى يكتب ؟؟ هل نكتب المدة الفعليه اللى مازالتى من الفيزا والا نكتب المده متاع دراسه اللغه ع اساس 11 شهر؟؟

وبارك الله فيك وسامحنا ع تعبك

ونزيد على سؤال ام تومى يلى تاشيرته تاير 4 شن يكتب

مفيش اجابة؟؟

مجرد تذكير

سؤال بخصوص الكتب

ها يمكن ان ارفع معي بعض الكتب المطبوعة في مصر ( اي غير اصلية) او انها ممنوعة في المطار
وشن اسعار الكتب بصفة عامة في بريطانيا

انا موفد جديد سافرت الى بريطانيا بتاريخ 8-1-2013 على الخطوط الافريقية وكان الموعد الساعة السابعة والنصف صباحا لكن زي العادة الدقة في المواعيد شعارنا حيث اقلعت الطائرة على تمام الثامنة صباحا واستغرقت الرحلة ثلاث ساعات ونصف بالضبط وكانت الرحلة مريحة جدا وبعد ان وصلنا الى مطار قاتويك استغرق اتمام الاجراءات حوالي ساعة بالضبط بعد ذلك اتجهت بالتاكسي الى لندن وهي تبعد حوالي 50 ميل اي ساعة بالتاكسي بمبلغ 60 باوند لا السائق انتظرنا من الساعة التاسعة صباحا يعني اي تاخير في الطائرة تتحمله انت... لذلك يفضل ان تتصل باحد الاصدقاء لكي يؤمن لك تاكسي معرفة الى مكان سكنك لان سائقي التاكسي يستغلوا الغريب عندما يكون مايعرفش البلاد ونحن الليبين نطيحوا طياح غير فكني من التعب ايضا يفضل ان تعمل حجز فندقي حتى تريح بالك من البحث عن فندق ويفضل ان يكون قريب من الملحقية الثقافية الليبية.... بعد الوصول الى الفندق وبعد أن وضعنا الحقائب في الفندق اتجهنا مباشرة الى الملحقية الثقافية الليبية وتحتاج الى احد يدلك على المكان حتى تصل بسرعة وتفتح ملف في الملحقية لان عمل الملحقية لفتح الملف من الساعة 1 الى 3 او اكثر... بمجرد دخولك الملحقية تجد الاستقبال الكويس وتسجل في الاستعلامات ويعطوك نموذج للبيانات الشخصية والاكاديمية تقوم بتعبئته ثم يعطوك رقم وتنتظر في الصالة حتى ياتي دورك وتجد القهوة والشاي والكاباتشينو لكن لايغرك المظهر.... بمجرد ان ياتي دورك تدخل الى الموظف الخاص بالتخصص متعك وتبدا معه في تسليم المستندات مع العلم بضرورة احضار اخر وثائق متحصل عليها ومعتمدة من الجودة مع رسالة الخزانة الاصلية وتعريف الطالب وبرقية بداية الصرف وصورتين شخصية مع القبول لمدة 3 اشهر ضروري جدا لان بدونه لن تاخذ رسالة الضمان المال وكلها يتم ترجيعها لك بعد ان يتم اخذ نسخة منها بالاضافة الى جواز السفر
بعد ذلك يفترض ان يسلموا لي لك رسالة الضمان المالي لكي تذهب بها الى المدرسة لكي يعطوك رسالة الى المصرف والسكن لكن السادة الموظفين في السفارة يقولولك توا نبعثوها بعد اسبوع او عشرة ايام عن طريق الايميل وانت تصرف الفلوس اللي عندك وتستنى الباشاوات امتى يحنو عليك وانت لازم تسكن والايجار مقدم ومرات تضطر الي السكن في فندق واقل ليلة ب 40 باوند من غير اكل بالاضافة الى المصاريف الاخرى باعتبارك جديد على المنطقة.... حسبنا الله ونعم الوكيل في موظفي السفارة...
يجب ان تعرف اخي الموفد انه يجب عليك التسجيل في اقرب مركز شرطة خلال اسبوع من وصولك الى المنطقة اللي ساكن فيها بحيث ترفع معاك صورة شخصية وجواز السفر ومبلغ 34 باوند وعنوان سكنك بالتحديد واذا كنت متزوج لازم ترفع زوجتك معاك لا الحضور الشخصي مهم
واذا غير ت السكن لازم تعطيهم علم بالعنوان الجديد
اذا السادة موظفي السفارة اعطوك رسالة الضمان المالي تمشي للمعهد وتطلب منهم رسالة الى البنك لتفتح حساب هناك واذا كنت في ليدز يفضل ان تفتح في اللويدز وحسب مايقال هو الافضل في ليدز... بعد ان تفتح حساب تبعثه الى الملحقية الثقافية لكي تنزل المنحة واشبح امتى انت والنصيب...مع العلم باننى الان لي اربع ايام وفاتح ملف ولم يبعثوا لي ورقة الضمان المالي الى الان ومازلت ساكن في فندق الليلة ب 43 باوند لان كل شي مرتبط بهذه الورقة
وربي يهديهم .... بصراحة اخوتي الموفدين انا لا اريد ان ازرع فيكم الخوف لكنها الحقيقة المرة التي يجب ان تعرفوها ان الاجراءات بطيئة جدا والتعقيد فيها اكثر من التسهيل وياريت وزارة التعليم تعلم بحقيقة عمل الملحقية لا الطالب الليبي يعاني يامسؤلين.... والله فيه حالات نتاسف لها لدرجة ان هناك الكثير من الليبين وفيه منهم بنات يبعثولهم اهلهم في الفلوس من ليبيا والملحقية لم تحرك ساكنا ...... اين هي الثورة التي مات من اجلها الاف الليبيون واين هو الفساد الاداري الذي كنا نعاني منه .... الحقيقة اننا نعيش الان في قمة الفساد الاداري
نصيحة لكم اخوتي الموفدين من اراد المجي الى بريطانيا عليه ان يحضر معه مبلغ من المال لايقل عن 2000 باوند او ينسق مع احد الاقارب لكي يسكن معه حتى يكمل اجراءاته ويتجنب الكثير من المشاكل.... ربنا يهدي المسؤلين

السلام عليكم ورحمة الله وبركاته

بارك الله فيك شكرا على كل هالملاحظات

اكيد حتفيدنا

يعني نستنى في اجراءات التفويض وما معه من اوراق ورسائل

ولو طلعوا في فترة شهر او اربعين يوم معناها ورانا معاناة ثانية غادي

يستر الله ان شاء الله خير

بارك الله فيك مرة ثانية على هالملخص واكيد عندنا اكثر من تساؤلات

غير يقرب اكثر وقت السفرة

وربي يوفقك

نبي نسألك بعض الاسئله لو سمحت وانشالله نلقى عندك الجواب الكافي
1- عند حجز التذاكر الي بريطانيا في اي خطوط نحجز
2- وهل جميع الرحلات من ليبيا الى بريطانيا تنزل في لندن
3- ولو تنزل في اي مدينه اخري في بريطانيا هل نلقا ملحقيه ثقافيه في اي مدينه او لازم في لندن فقط
4- وهل السلفه اللي تعطي فيها الملحقيه الثقافيه من اول يوم او تعطل
5- وكم ناخذ معايا فلوس في اول ايام اذا تأخرت السلفه
6- والمرافق اخي هل في اوراق معينه ايجيبهن معاه مع العلم ان تأشيرته زائر لمدة 6 شهور
7- وانا 11 شهر (سبيشل ملت ) وهل نقدروا انجددوا التأشيرات في بريطانيا ام لا

اختك محتاجه لجواب كافي الله يرحم والديك ويجعله في ميزان حسناتك

amira.shibani كتب:

نبي نسألك بعض الاسئله لو سمحت وانشالله نلقى عندك الجواب الكافي
1- عند حجز التذاكر الي بريطانيا في اي خطوط نحجز
على أي خطوط مناسبة الليبية أو الأفريقية
شوفي الموضوع هذا
http://www.almofad.com/t11147-topic

2- وهل جميع الرحلات من ليبيا الى بريطانيا تنزل في لندن
لا الليبية فيه تنزل في لندن وفيه في مانشستر لو مدينتك في الشمال الأفضل تأخذي مانشستر
وممكن تشوفي الموضوع هذا
http://www.almofad.com/t9800p30-topic

3- ولو تنزل في اي مدينه اخري في بريطانيا هل نلقا ملحقيه ثقافيه في اي مدينه او لازم في لندن فقط
الملحقية موجودة في لندن فقط

4- وهل السلفه اللي تعطي فيها الملحقيه الثقافيه من اول يوم او تعطل
لا يعطوا فيها بعد ماتفتحي كشف حساب ومرات يأخذ وقت فتح الحساب وحى بعد ماتفتحوا ممكن يعطلوا فجيبي معاك فلوس بالزايد

5- وكم ناخذ معايا فلوس في اول ايام اذا تأخرت السلفة
ممكن 2500 إلى 3000 باوند أو اكثر كويسات

6- والمرافق اخي هل في اوراق معينه ايجيبهن معاه مع العلم ان تأشيرته زائر لمدة 6 شهور
لو يبي يدرس حتى هو يجيب ورقة تقريبا من البعثات (تعريف) على أساس أنه حتى هو طالب ويبي يدرس لأن السفارة بعدين مايعترفوش بيه إلا إذا تغيير البرنامج هذا.

7- وانا 11 شهر (سبيشل ملت ) وهل نقدروا انجددوا التأشيرات في بريطانيا ام لا
أكتبي بالعربي أو بالانجليزي عشان نفهموا كلنا مش عارف شنو تقصدي بسبيشل ملت لكن اللي فهمته أن عندك تاشيرة طالب زائر لمدة 11 شهر وبالتالي لازم تطلعي برا بريطانيا وتغيريها أو تجديديها بعد انتهاء المدة.

اختك محتاجه لجواب كافي الله يرحم والديك ويجعله في ميزان حسناتك
بالتوفيق إن شاء الله

مشكور جدا جدا علي الرد وسامحني طولت عليك في الرد لان الضي كان مقطوع من امس انا المدينه اللي ماشيتلها في برطانيا اسمها كاردف (cardiff) عاصمة ويلز في الشمال الغربي من لندن او الغرب يعني علي كلامك نمشي لندن افضل عشان الملحقيه
يستر الله وانا واخذه معاي 7000 دولار لان الباوند مالقيتش انشالله خير والله يبارك فيك علي المعلومات
بس معليش ثقلت عليك ممكن تعطيني عنوان فندق رخيص في لندن وقريب من الملحقيه اذا كان تعرف لوسمحت
ومشكووووووووووووووووووووووووور مره اخري

amira.shibani كتب:

بس معليش ثقلت عليك ممكن تعطيني عنوان فندق رخيص في لندن وقريب من الملحقيه اذا كان تعرف لوسمحت
ومشكووووووووووووووووووووووووور مره اخري

http://www.almofad.com/t14481-topic

تأنسينا في كارديف وان شاء الله بالتوفيق