بخصوص الدعم المالي للتأشيرة

الى كل الطلاب يلى تحصلوا على التاشىرة الانكليزية بعد شهر 6 هل احد منكم يضيع لنا صورة الضمان المالى لانى سمعت انهم غيروها بعد شهر 5 وهل مازال يوجد فيها قيمة المنحة المالية ارجو احد منكم ايفيدنا وله خالص الشكر

السلام عليكم
رسالة الدعم المالي لغرض التأشيرة اصبحت بدون تحديد قيمة مالية وعلى اساس انهم يتكفلوا بمصاريف الموفد ومرافقيه خلال فترة دراسته ببريطانيا و لكني لا اعرف اي موفد تحصل على التأشيرة وفقا لذلك .

قيمة المنحة تذكر
وهذه صورة من رسالة الدعم المالي الخاصة بنا وهي بتاريخ 16-6-2012

صورة من رسالة الدعم المالي لغرض التأشيرة
لطالب متزوج ولديه طفل ..
بتاريخ 16-6-2012

mohab كتب:

بالنسبة للاخت التي ارفقت نسخة من الدعم المالي ومذكور بها القيمة المالية
هذا كان قبل التغيير
حاليا القيمة لاتكتب
وتكون هناك ايضا افادة بارسال الدعم المالي الي السفارة
وهذا يدعم بقوة طلب الفيزا
للعلم شخصيا استلتمت الدعم المالي منذ ايام فقط

السلام عليكم اخى الكريم

بالله بوضوح اكتر يعنى فى زحمة الطاوبور بيعطيك ورقة دعم التأشيرة صح ولا ولا هو بيقولك انها نبعتت نسخه للسفارة لانها الاسبوع الى فات ولد صاحبى كنت معاه فى البعتات عطوه ورقة الدعم لا اكتر فى هديكا الزحمه ولو عندك انت صورة نزلنا نشوفو

شكرا اختى ام عائشة ولكن هذه نفس يلى عندى وان خديتها من شهر 3
اخى mohab ارجو ان ترفق لنا صورة الرسالة الجديدة والافادة يلى قلت انها تبعث للسفارة ولك الشكر

ما شاء الله دائما في تقدم مبهر من ادارة البعثات في وزارة التعليم العالي بالله يا سيد طاهر رسالة باللغة الانجليزية والختم بالعربي راكم ادارة بعثات للخارج مش مكتب خدمات عامة

مش مهم الشكل المهم ان الطلب يكمل شغله بأي ورقة..وتحياتي للجميع وتمنياتي بالتوفيق

بعد مااستلمت رساله دعم تأشيره لقيت حرف متغير فى اسم جد واسم اول ولقب صحيحين وموعد المقابله مازاد عليه شى وكلمت المندوب جامعه قالى وقت قصير لتغير حرف خطأ ومرات تضيع على مقابله اذا اعطيت رساله للبعتاث وقالى هم يركزو على اسم اول ولقب سؤال هل نمشى للمقابله وانى مطمن ولا لازم نغير

قصدك في اسم الاب او الجد؟؟
اذا كان في اسم الجد اعتقد ان مش مشكلة لان الاسم في جواز السفر باللغة الانجليزية ثلاثي.....

اسم الجد هو وليس الاب

شوف جواز السفر متاعك اذا كان اسمك فيه ثلاثي يعني مش مكتوب اسم الجد بالانجليزي معناها مش مهم.... خلي المترجم يترجملك شهادة الميلاد والوضع العائلي زي ما مكتوب في رسالة الدعم المالي وخلاص....
اما اذا كان اسم الجد مكتوب فالامر فعلا محير: يعني عندك اثبات ثاني وهو رقم جواز السفر فمش معروف مرات يمشوها مرات لا..... زيد استشير وفكر ....

ياخوي تاخذ بنصيحتى انا قبل 3 ايام من تقديم التاشيرة طلعلى الدعم غلط في التاريخ .... علما بانى من الشرق سفرت خصيصا لطرابلس وصلحتها في نفس اليوم خذت منى ربع ساعه ..... انت حاول تمشي لطرابلس وجرب حظك وربك كريم الا رب يسخرلك حد يسرعلك في اجراء التغير بس امشي وحدك من غير المندوب

انى عن نفسى فى رسالة الدعم المالى للقبول غلطوا فى حرف فى اللقب ولما راسلت بيها ردوها وقالوا لازم يكون مطابق لجواز السفر .. وهما ايدققوا هلبا فى الامور هادى ونصيحة تغيرها قبل المقابلة ماتندريش مرات يردوها عليك ويضيع تعبك ع الفاضى

غيرها وريح روحك من التعب

ahmed2030 كتب:

بعد مااستلمت رساله دعم تأشيره لقيت حرف متغير فى اسم جد واسم اول ولقب صحيحين وموعد المقابله مازاد عليه شى وكلمت المندوب جامعه قالى وقت قصير لتغير حرف خطأ ومرات تضيع على مقابله اذا اعطيت رساله للبعتاث وقالى هم يركزو على اسم اول ولقب سؤال هل نمشى للمقابله وانى مطمن ولا لازم نغير

يا أحمد موضوعك ساهل بس يحتاج مساعدة المندوب متاعك..

أنت توكل على الله و عدي لطرابلس قبل الموعد متاعك بيومين و تحمل مصاريف الفندق و الأكل و خوذ الرسالة و عدي بيها للبعثات بس قبل ماتعدي بلغ المندوب امتاعك واتفق معاه أنه يتصل بالمسؤول و انت في البعثات و يفهمه القصة و انت لما توصل غادي كلم المندوب و عطيه للموظفة هو يعرف اسمها و توا ايقولك عدي لفلانه أو فلان و ماتخفش صدقني راح ايتعاونوا معاك و يطلعولك وحدة جديدة..

أنا صديقي تأخرت رسالة الدعم للتأشيرة فاضطر انه يمشي للمندوب و قاله عندي مقابلة يوم كذا عشان الفيزا ولازم نسافر بيها لتونس فقاله المندوب أنت عدي لطرابلس لفلانه و لما توصل عندها كلمني و عطيها لي و فعلا مشا للبعثات و طلعوله وحدة بس كانوا غالطين في اسمه قاللهم لازم اتصلحوها لي لأني من مكان بعيد و فعلا دارولا وحدة جديدة في نفس الوقت و روح بيها في نفس اليوم ..

الخلاصة : مشكلتك ساهلة بس قوي عزمك و توكل على الله..

______________________________

رَبَّنَا آَتِنَا فِي الدُّنْيَا حَسَنَةً وَفِي الآَخِرَةِ حَسَنَةً وَقِنَا عَذَابَ النَّارِ

ماتسهلوش عليه الامور هكي.... معليشي هذي مرحلة جهاد يتعب توا ويرتاح بعدين...

مافيش حاجة مضمونة من البعثات يعني ماتخليش روحك لاخر لحظة.... تعالى وشوف هل يتصحح الخطا بسرعة والا لا؟؟؟
ايضا اسال في مكتب الوورلدبريدج هل يمشي الحال والا لا؟؟ بالنسبة لموظف السكيوريتي ماتقدرش تاخد علي كلامه لكن اصر عليه يدخلهم داخل ويستفسرلك.... انا استفسرت علي صور الاطفال هل هي كويسة او لا لانهم صغيرين ومش حيكوني معاي يوم المقابلة وخديت منهم اجابة شافية.....
حاول وماتياسش وانا نقولك لو كان اسم الجد مش مكتوب في الصفحة الانجليزية من الجواز راهو مافيش مشكلة....

أؤكد على كلام بعض السادة والسيدات ، غير رسالة الدعم المالي ودير واحدة جديدة ، ذلك أفضل وأضمن لك، جاتك في تأخير أسوع افضل من نتائج غير مرغوبة لا قدر الله ، لأن الأجانب كل تعاملاتهم باللقب ، فهو مهم جداَ ويركزوا عليه هلبة .

وبالتوفيق إن شاء الله !!

السلام عليكم

انا قدمت في للتأشيرة الانجليزية وتم رفض طلبي ان شاء الله خير

نبي نعرف هل دعم التأشيرة يتم تجديده ولا نقدم بنفس الدعم مرة تانية

وكيف نقدر نقدم مرة تانية

افيدونا يرحمكم الله

على معتقد يأخي تقدم بدعم جديد بتاريخ جديد ..... الا اذا الاصل مازال معاك ...... وعلى معتقد الاصل ياخذه فيه في الاغلاب .... بالنسبه ليا الاصل ردوه ليا مع الاوراق وربي يسرلك حالك

الاصل موجود عندي
بتاريخ 5 ديسمبر 2012

بارك الله فيك ابو محمد ارجو منك الرد على سؤالي للضروره القصوى انا عضوه جديده سجلت اليوم في المنتدى بالامس كنت في طرابلس لكن كان عندي موعد بالأمس للحصول على التأشيره البريطانيه لكن قدر الله و ما شاء فعل لم يتمم الله و ذلك لقيام الموظف بالمكتب اللي عبيت فيه الابلكتين انا و اخي مرافقي يتعديلات بناء على طلبنا لكن لم ياخذ لنا الموعد بارقم الجديد و بالتالي حصل تضارب في الموعد و رقم اللي في الابلكتين و طلبوا منا ام ناخذ موعد جديد بالرقم اللي في الابلكتين المعدل و سؤالي اني سمعت ان صلاحية رسالة دعم التأشيره شهر من صدورها علما بأن رسالتي من اواخر نوفمبر 2012 ارجو الرد على رسالتي للضروره القصوى لاني اريد اخذ موعد جديد و اريد التأكد من هذه المعلومه حيث قيل لي انها سبب رئيسي في الرفض مع العلم ان مصدر هذه المعلومه مكتب السندباد و قال ان القرار انزل بالامس بتاريخ 20/2/2012 ارجو افادتي افادكم الله