[rtl]السلام عليكم جميعا [/rtl]
[rtl]حبيت نشارككم بتجربتي في كندا و نجاوب على بعض الأسئلة بما أن صاحب الموضوع أكيد انشغل و ما شافهاش. [/rtl]
[rtl]الإيجار غالي في كندا عموما و تورنتو بزيادة لأنها مدينة كبيرة و معبية هلبه و من الصعب تلاقي ايجار بسهولة .. اني ساكنة في مدينة واترلو جنب تورنتو ساعة بالسيارة بينهم و الايجارات زي ما قال الأخ اللي رد تتراوح من 900-2000 دولار حسب المكان يعني الواحد الاحسن ياخذ ايجار بعيد عن وسط البلاد و يستخدم الباصات او المترو لأنهم موجودات في تورنتو و الحمد لله . [/rtl]
[rtl]الأخت نونا مافيش اي اجراءات مطلوبة للتحويل من معهد لغة لآخر يعني خلي القبول اللي حصلتي بيه التأشيرة معاك علشان تستخدميه في المطار لأنهم لازم ايشوفوه و بعدين تقدري تجيبي قبول ثاني و تقري وين ما يعجبك ..[/rtl]
[rtl]الاخت حرة سؤالك غير واضح يا اختي يا ريت تعيديه...[/rtl]
[rtl]الاخت لينا اني ليا قريب سنة و نص في كندا و عمري ما سمعت عن ايجار مقدمه 6 شهور يعني ردي بالك يا اختي النصب موجود في كل مكان و مرات المكتب مش ثقة .. غالبا الايجارات تكون شهرين مقدم ( شهر وديعة لو صارت حاجة في الشقة ما عاد يردولك الوديعة و الشهر الثاني يكون ايجار اول شهر) .. ردي بالك يا اختي ستة شهور هلبه ...[/rtl]
[rtl]الاخ معتوق تخصص الاتصالات موجود في كل الجامعات الكندية تحت قسم الهندسة الكهربائية و القبول يختلف من جامعة لأخرى بس عموما في 3 حاجات خليهم في الحسبان.. اولهم الله ولي التوفيق يعني كل شيء بتوفيقه و فضله .. و الثاني القبول يعتمد هلبه على المشرف يعني لو حصلت مشرف تكون قطعت نصف المسافة .. الشيء الأخير القبول في مقاطعة كيوبك اسهل من باقي المقاطعات لأن ما فيهاش طلبه هلبه و معظم الطلبة يجو لأونتاريو او البرتا لذلك المقاطعة تسهل في قبولات الطلبة كعامل جذب ليهم ...المكتب لو تحب يقدم عنك و ممكن ينسخلك شهاداتك و يعتمدهم من محامي كندي اذا ما عندكش نسخ كافية من الشهادات .. [/rtl]
[rtl]الاخت ميار الفنادق في تورنتو غالية غالبا لو تحقلي شقة مفروشة تجيك ارخص و اوسع و اريح .. [/rtl]
[rtl]الاخت جوي اهم مواقع الايجار kijiji ,,,,craiglist ,,,, gottarent بس المشكلة ان مرات الصور يكون قدم للشقة و تشوفيهم تعجبك و لما تمشي يكون الواقع شيء ثاني..[/rtl]
[rtl]الأخ اسامة ربي يفتح عليك و يسهلك التفويض ننصحك ما عاد تمشي للبريك و سيرس لأنهم غاليات شوف في محلات اونلاين يخدمو بس تقدر تشري منهم حاجات ارخص بس عموما زي ماقلت كل شي غالي و الله المستعان.. [/rtl]
[rtl]بالتوفيق و ان شاء الله نكون ساعدتكم [/rtl]
