تجربة مسافر كندا

السلام عليكم

امل من كل موفد وفقه الله وسافر ان يخبرنا ولو بايجاز عن

رحلته بالطائرة والدروس المستفادة

ايامه الأولي بالمعهد

اسبوعه الاول وبرنامج الايجار والبحث عن سكن ...الخ

حقيبة سفره ، وماليته فعل وماليته لم يفعل ...لكي يستفيد باقي الموفدين.

اكيد شفتوا الموضوع في منتدى الساحة الامريكية وعجبتني الفكرة فقلت نجيبها للساحة ااكندية باش نستفيدوا.... ياريت يكون في اقبال على الموضوع

وفقكم الله

وعليكم السلام خوي محمد :

حبيت انقولك ان في تجارب منقوله من موفدين ومعلومات وافية عن الدراسة في كندا والسفر وكل شي ...راجع مواضيع الساحة و ما يكون خاطرك الا طيب .















موفق يا خوي محمد

اخي يوسف انت شفت الموضوع في منتدى ااساحة الامريكية وطريقة سرد القصص؟ اعجبتني الفكرة فلماذا لا يقوم الاخوة الذين عاشوا هذه التجربة الا يسردوها لنا في قصة ممتعة وظريفة... انا الموضوع درته من باب مشاركة القصص وان يضعونا في وسط الحدث.... وعندما يثبت حيقراه كل موفد سواء الان او لاحقا وبالتالي الاستفادة اكبر.... انت شوف الموضوع في منتدى الساحة الامريكية وستفهم قصدي إن شاء الله.

السلام عليكم
مشكور اخي علي الفكرة
وانا معاك فكرة حلوة وذات فائدة ونتمني من الجميع ان يتفاعل معها
وحقكم عليا غير تطلع التاشيرة ونسافر بس
نحكيلكم القصة كلها
غير ادعولي تطلع التاشيرة بس

mohamad.ali كتب:

اخي يوسف انت شفت الموضوع في منتدى ااساحة الامريكية وطريقة سرد القصص؟ اعجبتني الفكرة فلماذا لا يقوم الاخوة الذين عاشوا هذه التجربة الا يسردوها لنا في قصة ممتعة وظريفة... انا الموضوع درته من باب مشاركة القصص وان يضعونا في وسط الحدث.... وعندما يثبت حيقراه كل موفد سواء الان او لاحقا وبالتالي الاستفادة اكبر.... انت شوف الموضوع في منتدى الساحة الامريكية وستفهم قصدي إن شاء الله.

 خش على الرابط هذا وان شاء الله تحصل فائدة ولو خفيفة ....وادعي لصاحب التجربة .
    
http://www.almofad.com/t19663-topic

ههههههه... حتى هذا الموضوع قاريه وبالتفصيل... موضوع متكامل وحلو حقيقة ويتحدث عن الاشياء الضرورية والمهمة ولكن لم يتطرق الى رحلته العديد من الاشياء فلم يتحدث عن تفاصيل رحلته والفكرة انه اكثر من شخص يحكي وتخيل كل واحد بيحط قصته بمواقفها الطريفة واكيد كل واحد بتكون مختلفة عن الاخر بالتالي نعرف  اشياء اكثر وتتعرف على طبيعة الاجواء، السفر.... الخ.
فهمت قصدي؟

 mohamad.ali كتب:

ههههههه... حتى هذا الموضوع قاريه وبالتفصيل... موضوع متكامل وحلو حقيقة ويتحدث عن الاشياء الضرورية والمهمة ولكن لم يتطرق الى رحلته العديد من الاشياء فلم يتحدث عن تفاصيل رحلته والفكرة انه اكثر من شخص يحكي وتخيل كل واحد بيحط قصته بمواقفها الطريفة واكيد كل واحد بتكون مختلفة عن الاخر بالتالي نعرف  اشياء اكثر وتتعرف على طبيعة الاجواء، السفر.... الخ.
فهمت قصدي؟

 
   

              فهمتك يا حموده ....انا معاك في الفكرة ...وندعوا الأخوة ان يستجيبوا للطلب هذا .

السلام عليكم اخي محمد حبيت  انشاركم  وباختصار عن تجربتي في السفر
انا من بنغازي وصلت لكندا من 10 ايام طبعا من التفويض رقم 12  وصلت ولله الحمد علي الخطوط التركيه طبعا الرحله كانت من ليبيا الي تركيا بعد اذان المغرب مباشرة اي في الصيام كانت قصيره  وكويسه بس المطار وامتعاعهم والانتظار الي ان يوصلوك الي الفندق كان متعب المهم وصلنا للفندق بعد قربة ساعتين من وصولنا الي مطار اسطنبول وبعدها اي الساعه 12ليلا تقريبا بتوقيت ليبيا  وتريحنا في المطار الي الساعه 10 اتصلوا بينا وقالولنا جهزوا رواحكم الباص الماشي للمطار جاي في الطريق وبعدها نزلنا طبعا في الفندق لانا وصلنا الساعه 12 قدملنا فقط وجبة الافطار  وبعدها وصلنا للمطار حولي الساعه 11 والي ما اكملنا اجرءات المطار بلغونا ان الرحله حتتاخر ساعه قعدنا منتظرين لين وصلت الطياره وانطلاقنا الساعه 2 بتوقيت ليبيا اي 3 بتوقيت اسطنبول وكانت الرحله طويله تقريبا 10 ساعات او 10 ونصف بس كانت الطياره مريحه وخذيت اغلب الوقت وانا انهدرز علي مع اهلي علي الفيس لان نبكي اشويه وانهدرز شويه ههههه وكان اجمل شي الطياره فيها الشبكة النت اللاسلكي مجاني  ومشت الرحله بتوفيق الله الي انا وصلنا الي مطار تورنتو والي ما كملنا اجراءات الدخول واخذ ورقه اذن الدراسه والبحث عن الحقائب اخذ من ساعتين وبعدها خرجنا الي صاله الخروج وجدنا الاخ زكريا صاحب مكتب الطالب في كندا في انتظارنا منذو ساعتين المسكين كان صايم وفطر في المطار بالتمر وصلي المغرب في المطار وهو ينتظر فينا واخذنا لبيته وعرفنا علي زوجته وعشانا  عنده بارك الله فيه وبعدها وصلنا الي بيتنا الي كان هو مأجره لينا طبعا هذا الشخص هو صاحب مكتب يجيب قبولات للطالبه وهو مقيم في تورنتوا وهويقدم خدمات اخر متل البحت عن الاجار وتاجير البيت وايضا الاستقبال في المطار وفتح حساب بنكي و شراء الشفرات وكذلك يعرفك علي طرق والقطارات الي توصلك الي مكان درستك الحق هوياخذ مقابل مادي قربه 500 دولا مقابل هذه الخدمات وممكن اكثر شويه بس هو حسب ما قال انه اخذ من 500 دولار فقط لان حامل و في الشهر الاخير والدوله ممكن تتاخر في انزال المنحه يعني رأفة منه عليا ولكن لا اعتقد انه يطلب بلغ اكثر من 500 الي 600 دولار والي ممكن تضيعهن في 5 او 4 ايام في فندق وخاصا انا في الصيف المهم وصلنا الي البيت وكان اصلا طالب مني 300 دولار زياده عشن يشري شويه التجهيزات طبعا انا حولت له مبلغ الايجار والتجهيزات والخدمه امتعته ما يقارب 1600 دولار وفعلا وجدته شاري شوسة اشياء للمطبخ وفراش للنوم وغطاء ومناديل وصابون واشياء خفيفه ووصلنا الي البيت الساعه 11 ونص بتوقيت كندا  وبعدها بيومين مشينا للمعهد وسجلنا طبعا معه وفتحنا حساب في بنك تي دي وشرينا الشفره وفي التالي مشيت مع زوجته الي عياده عشن نفتح ملف

شكرا علي اضافة تجربتك يا اخت Laina
حبيت نسالك شوية بخصوص تجربتك .. 

بالنسبة للسفر المراة وهي حامل ... ومثلا ما انتي وضحتي انك كنتي في اخر شهر من الحمل ... ممكن توضحيلنا شن هي الاجراءات في المطارات بخصوص سفر في هده الحالة للمراة؟ وخصوصا ان المسافة طويلة جدا  ( لكي تعم الفائدة للجميع ) يعني هل فيه تقرير طبي ترفقيه معاك من الدكتورة ؟

وبالنسبة لي فتح الملف للمراة الحامل في احدي مستشفيات كندا ، ما هي الاجراءات ؟ وما هو المطلوب؟

لان هدا الموضوع مهم جدا .. بالنسبة للناس الي عندهم مرافيقن او هما نفسهم في حالة حمل .


وجزاكي الله خير .. ونسال الله ان يوفقك في حياتك العلمية والعملية

لا والله ما رفعتش معيا ولا حاجه ومحدش سالني اصلا ممكن البنات الي يفتشن في المطار بعدما تبي تسافري من تركيا الي كند ينتبهوا بس محدش يعلق وبالنسبه لفتح الملف الاربعاء الماضي مشيت للدكتوره العائله وهي طلبت مني صوره والتحاليل قالت بعدما تبحثلي  علي دكتورة ولاده تقبل بمتابعة حالتي حتي الولاده واتجيني وقت الولاده وهذا صعب جدا لان من صعب ان اي دكتوره تقبل بمتابعة واحده في الشهر الاخير من الحمل   وان شاء الله خير وهي عطتني موعد يوم الاربعاء القادم عشن تعطيني اوراق التحويل للدكتوره الولادة وعنوان الدكتوره ان شاء الله خير

الحمد لله اختي علي السلامة
مكن نسئل علي الخطوط التركية هل كانت تذاكرك درجة عادي او غيرتيهم الي درجة اولي
واذ غيرتيهم كم كلفك ذلك وهل تنصحي بالتغيير الي الدرجة الاولي او ان الموضوع مافيش فرق حسب خبرتك
انا من بنغازي واريد الذهاب الي فانكوفر المشكلة التركية ماعندهمش الي فانكوفر حسب علمي هل اختار خطوط اخري او تنصحي بالتركية ؟؟؟؟؟؟؟؟؟؟؟؟؟ لان بعدين ضروري تكون في رحلة داخلي في كندا واكيد تكلفتها عليا مش علي البعثاث؟؟؟؟؟؟؟؟؟؟؟

الله يسلمك اخي وان شاء الله توصل بالسلامه
بالنسبه للخطوط انا كنت اتمني ان نسافر علي الخطوط الانجليزيه بس الوكاله الي طحت فيها وكاله زليتين رفضت وقالت ان الخطوط الانجليزيه نعطوا فيها فقط الي الامكان الي ما تمشيلهش الخطوط الاخري وتورنتو تمشيلها الخطوط التركيه والمغربيه والاردنيه والالمانيه ولكن السبب الرئيسي حسب اعتقادي هو ان الترنزلايت امتع الخطوط البريطانيه  والمبيت في الفندق علي حساب الوكاله والترنزلايت امتع الخطوط التركيه والخطوط الاخري علي حساب الخطوط, وبالنسبه لي الدرجه فلم استطيع تغير الدرجه لسبب انه الرحلات في الاسبوع الي انا كنت امسافره فيها الدرجه الاولي محجوزه كلها يالله حصلت مقعدين عادي ليا ولزوجي في يوم 1 /8 وبالنسبه لتكلفه تغير الدرجه لشخصين تقريبا 960 دينار علي حسب كلام موظف الوكاله , بس الحمد لله مع اني حامل وفي الشهر الاخير مشت علي خير والحمد لله, وان شاء الله بالتوفيق

laina كتب:

الله يسلمك اخي وان شاء الله توصل بالسلامه
بالنسبه للخطوط انا كنت اتمني ان نسافر علي الخطوط الانجليزيه بس الوكاله الي طحت فيها وكاله زليتين رفضت وقالت ان الخطوط الانجليزيه نعطوا فيها فقط الي الامكان الي ما تمشيلهش الخطوط الاخري وتورنتو تمشيلها الخطوط التركيه والمغربيه والاردنيه والالمانيه ولكن السبب الرئيسي حسب اعتقادي هو ان الترنزلايت امتع الخطوط البريطانيه  والمبيت في الفندق علي حساب الوكاله والترنزلايت امتع الخطوط التركيه والخطوط الاخري علي حساب الخطوط, وبالنسبه لي الدرجه فلم استطيع تغير الدرجه لسبب انه الرحلات في الاسبوع الي انا كنت امسافره فيها الدرجه الاولي محجوزه كلها يالله حصلت مقعدين عادي ليا ولزوجي في يوم 1 /8 وبالنسبه لتكلفه تغير الدرجه لشخصين تقريبا 960 دينار علي حسب كلام موظف الوكاله , بس الحمد لله مع اني حامل وفي الشهر الاخير مشت علي خير والحمد لله, وان شاء الله بالتوفيق

 مشكورة اختي علي الرد وبارك الله فيك 
يعني الي فهمتة منك لاني نبي نمشي لفانكوفر معناه ان الوكالة سوف تحجز لي علي الانجليزية او شن 

مع العلم ان الانجليزية من طرابلس شن رايك الافضل في رسالة طلب التذاكر نكتب من طرابلس الي فانكوفر او نكتب بنغازي الي فانكوفر
لاني بجد نبي الانجليزية لانه افضل ولان معي اطفال خايف نكتب من بنغازي يحجزولي  علي التركية و نتعب بعدين في قصة الرحلة الداخلية الي فانكوفر
وبارك الله فيك ويسهلك كل امورك ان شاء الله

اخي الكريم في نموذج طلب التذاكر ان لم احدد طرابلس او بنغازي فقط من ليبيا الي كندا والمنطقه تورنتوا هذا الي كتبته بس بعدين التفاهم كلها مع الوكاله عن الرحله والخطوط والدرجه , توكل علي الله وان شاء الله ربي يسهلك امورك وبعدين لو كانت الخطوط الانجليزيه تمشي لي فانكوفر الوكاله وحدها تلقائيا حتقولك الحجز امتعك علي الانجليزيه وان شاء الله بالتوفيق

بارك الله فيك على التوضيح وإن شـاء الله تكونى بصحة وسلامة وتجيبي مولودك على خير يارب
                                

مشكورة وبارك الله فيك علي التوضيح

وفيكم بارك الله
تحياتي
وان شاء الله موافقين

خالص الشكر ليك يا أخت لينا ع التوضيحات.
ونسأل الله أن سهلك في جميع أمورك .

اللهم امين , اللهم اجمعين

السلام عليكم اخت ليبنا
كثرنا عليك بالاسئلة تحملينا
هل اعطوك منحة الاستقرار الي يقوللها السلفة واذا مانزلوها لكي هل اخبروك بانه ممكن تنزل المدة الجاي ولا اخبروك بانها موقفينها نهائي

و عليكم السلامه بالنسبه لمنحة الاستقرار سالت جمانه فماردت عليا وطلبت من زميلتي المقيمات قيلي في كندا اسم النماذج عشن انعبئه واندزه لهم لعند توا نرجا فيهم ليا اكثرمن 5 ايام وكل وحده اتقولي سع اندورها لكي وشانا بعثتلي رساله وقالت الاسبوع القادم ينزل مرتب شهر 8 بدون منحه الاستقرار وباضافه الي 1000 دولار حق الكمبيوتر فقط
وإن شـاء الله خير والحمد لله علي كل حال

السلام عليكم,,,اختى laina الحمد الله على السلامة وشكرا لك على هذه المعلومات القيمة ربى يحفظك .

الحمد لله على سلامتك وأن شاء الله موفقة في دراستك، لدي استفسار هل مكتب الطالب له فرع في اتوا ياريت تسأليهم وادل كان نعم الرجاء ابعثي لنا عنوانهم وبارك الله فيك

اخت laina
السلام عليكم,,و بالله عندي استفسار,, هل الحمل كان ضاهر عليك لما دخلتي مطار تورونتو,,, اني سمعت ان الجوازات و الهجرة لديهم مشاكل بالنسبة للحوامل اللي يدخلو كندا بحكم انهم بنزاد عليهم مولود و بياخد الجنسية,,هل هادا صحيح ؟؟
شكرا و موفقة

وعليكم السلام
لا احد يعلق ولاحتي ينظر اليك من بعدما توصل لمطار تورنتوا
ممكن انا مش ظاهر عليا واجد لا ملابسي واسعه عبايه ومحرمه طويله بس كانت معيا وحده اجنبيه ظاهر عليها الحمل اتقول توام ووحده اخري باكستانيه ظاهر عليها التعب والارهاق بس ماحد كلمها