حجز الفندق لامستردام و غيره من الفنادق

السلام عليكم...........
من مدة كنت في حيرة حجز الفندق الي في مطار امستردام لاني معنديش فيزا كارد و منبيش انديرها لين نوصل.............المهم صديقي دلني على و كاله سياحيه تقوم بحجز الفنادق في كافة انحاء العالم و ارخص من لما تحجز بروحك
امس كنت في الوكاله و فعلا حجزت حجره بسريرين يعني double +child ب 166.5 ليبي و عطوني الواصل الي نمشي بيه للفندق و مع الحجره فطور بوفبه مفتوح ( mercure amesterdam airport) بينما لو بنحجز بروحي بتكلفني 210 دينار بدون فطور هدا غير نسبة الفيزا كارد.............
يمكنكم الذهاب و الاستفسار من هده الوكاله لكافة الحجوزات و هدا العنوان:

الخيمه للخدمات السياحيه
برج الفاتح \ الدور الارضي 10#
3351342
3351343

او بنغازي:

[/b]

وربي يوفق الجميع
[b]

شكر ا وبارك الله فيك, وربى يوفقك

بارك الله فيك و جزاك الله كل خير

ولكم جزيل الشكر و بارك الله في الجميع....ع العموم اني مسافر يوم الاحد القادم ان شاء الله على الخطوط الهولنديه ......زلو تبو نستفسرلكم على حاجه معينه قولولي و حنقعدو علي اتصال .....................
تحياتي
عصام

ربي يوصلك بالسلامة
وين ماشي ان شاء الله؟

ماشي لبنسلفانيا ان شاء الله

بالتوفيق

انا شهر تسعة الماضى يعنى فى رمضان كنت ماشية من طراباس الى امريكا وحجزت بالهاتف من طرابلس فى فندق امستردام ولما وصلت دفعت حجرة زوجية ب 90 دولار فقط من غير الافطار طبعا بس المطاعم هلبة فى المطار

انا مشيت 15-10 وحجزت بالتيليفون و دفعت لما وصلت حجرة زوجية+ سرير بيبي ب 104 يورو من غير فطور صراحة المطاعم اكثر مما تتصور و اكيد ارخص من الهوتيل

بنت ليبيا كتب:

انا شهر تسعة الماضى يعنى فى رمضان كنت ماشية من طراباس الى امريكا وحجزت بالهاتف من طرابلس فى فندق امستردام ولما وصلت دفعت حجرة زوجية ب 90 دولار فقط من غير الافطار طبعا بس المطاعم هلبة فى المطار

السلام عليكم
الاخت بنت ليبيا عندي استفسارين اذا سمحت
الاول كيف يتم التأقلم مع الحياة الجديدة في امريكا
الثاني المرافق وخصوصا السيدات كيف يقضن اوقاتهن

اخى msasi
الحياة فى امريكا كلها بالنسبة لى كدارسة هندسة مدنية كلها بين المحاضرات والمكتبة والمعامل يعنى غارقة فى القرايةز
بالنسبة لللسيدات المرفقات فهن يقضين اوقاتهن فى تعليم اولادهم منهاج الدراسة المقررة بليبيا وفى بعض المناسبات التى تحدث وفى قضاء وشراء حاجيات البيت من الاسواق

alous2030 كتب:

ولكم جزيل الشكر و بارك الله في الجميع....ع العموم اني مسافر يوم الاحد القادم ان شاء الله على الخطوط الهولنديه ......زلو تبو نستفسرلكم على حاجه معينه قولولي و حنقعدو علي اتصال .....................
تحياتي
عصام

السلام عليكم اخي عصام

نتمنى انك واسرتك الكريمة وصلتوا بالسلامة دون عناء

تمنياتنا بالتوفيق

الحمد لله وصلنا الى امريكا بس كان الفندق الدى حجزنا فيه عن طريق الوكالة خارج المطار طبعا من غير تاشيرة لا يسمح اليك بالدخول ورغما عنى دفعت فى فندق داخل المطار بس بصعوبة الحجز فى هده الفنادق ............يجب اخد الحيطة والحدر

الحمد الله على السلامة انستنا واى سؤال تفضل

بارك الله فيكم اجمعين..................الرحله كويسه بس الي تعبوني الصغار كان هدا فهي تجربه جديده و ادهوريه مليحه من بلاد لبلاد و خاصة مطار امستردام رائع و متحسش بالوقت فيه...........
يا ريت اي حد يبي يكتب معلومه او ينزل صوره يتاكد قبل ..اني الغلطه الي صارتلي سببها احد المشاركات الي كانت بصور الفندق فلما مشيت للوكاله و دفعتلهم كنت بناء علي الصور الي ريتها في المنتدى .. ردو بالكم راهو الي بيكتب حاجه مسؤول عليه و تشحويرتي اني و العيله يوم امستردام كان سببها اني خديت الكلام الي مكتوب على محمل الجد دون التدقيق في مصداقيته.....تني تو مشكلتي بس الحوش الجامعه مش معاديه غدوه بنبدا الكورس وربي يست متطولش قعدتي في الفندق
ملاحظه: متكتروش حوايج و بضاعه ارفعو الضروري الضروري كل شي متوفر و اسعار زي طرابلس الخضره ارخص من طرابلس لكن المواد الغدائيه التانيه شويه غاليه مع دلك ماشي حالها.....متخافوش و متلخبطوش روحكم و لاي استفسار عن الخطوط و المطارات ..انا في الخدمه............
في المطار يطلبو في الى 20 ضروري جداااااااااا...ومادا بيكم تشرو شنطة ظهر زي ماقال الخ THE GOOD مره و بارك الله فيه لان نصيحته كانت في محلها و حتى زوجاتكم عادي يلبسوهم اريح ليكم و ليهم من تكركير اليدين .و مادابيكم زوجاتكم ميلبسوش ذهب او اي اكسسوار معدني لان كل مره حيطلب منهم ينحوه....والبسو حداء مريح و ساهل اللبس لان حتى هو بينحوه ويحطوه في الماكينه............
لو جاكم الحجز ع الخطوط الهولنديه قولو للواكاله تذكر انكم مسلمين بش يوفرولكم اكل اسلامي راهو الرحله طويل و حتجوعو.اني مبلغتش الوكاله ( المفروض هدا شغلهم) المهم لحسن حظي فضل من اكل النباتيين وجبات عطوهالي ومشي الحال نوعا ما
ع العموم هدا الي تفكرته توا و لو تبو تسالو تفضلو مادامني قاعده المعلومات طازه
تمنياتي بالتوفيق للجميع
عصام

السلام عليكم و رحمة الله و بركاته. الحمدلله علي سلامتكم. جزاك الله خيرا على مصداقيتك. بالفعل ناخدو في المكتوب بمحمل الجد. و مش لازم نكتبو معلومة فقط لملأ فراغ او "show off" . العازب يتحمل اي طارئ لكن صاحب العيلة ربي يكون معاه. خوي alous ياريت تقوللنا علي الاجراءات اللي مريت بيها في مطار امريكا. مثلا كيفية التفتيش و نوع الاسئلة الي تطرح ..... اي حاجة تفيدنا للأستعداد. و ياريت تبعتلي معلومات عن الجامعة و كيفية القبول اعني هل يمكن الحصول علي قبول مشروط منهم؟ و جزاك الله خيرا. اني رحلتي حتكون علي ال British Airways ان شاء الله في شهر 12 الى دنفر/كولورادو علي خاطر اولادي "زي ما تعرف المدرسة الليبية غادي" قبل ناوي نسافر مع بداية الشهر الجاي بس قالولي قانون امريكا ما يسمحليش بالدخول بأكثر من شهر قبل موعد الدراسة. و ربي يسترها معانا الموفدين اجمعين.

معليش ما تزعلوش مني لأني بنتكلم بصيغة الجمع و من غير تخصيص لأني ما نبيش نؤذي حد بكلماتي بس نبي نقول ان الدردشة لمجرد الدردشة متوفرة في منتديات كثيرة و هذا المنتدى غرضه مساعدة الموفد بتوفير معلومات تنيرله دربه و تساعده علي اتخاذ قرارات مناسبة ليه و لظروفه. ياريت نسعى لذكر الحقيقة و المعلومة الصحيحة لأننا نحاسب عليها. يعني نحاول و نسعى و نذكر المعلومة اللي متأكدين من صحتها.و ياريت اللي صار لخونا عصام مايتكررش. و جزاكم الله خير علي تفهمكم.

اخ alous2030 ياريت تقولنا على ارقام تليفون هذا الفندق واسمه اذا كان مازال معاك الارقام حتى تعم الفائدة
وفقك الله واعانك انت والعائلة اللي معاك