رحلة شقاء: من قرار الإيفاد، والحصول على التاشيرة، وحتى السفر والاستقرار

بسم الله الرحمن الرحيم

والصلاة والسلام على أشرف الخلق والمرسلين

أعزائي وأخواني السلام عليكم ورحمة الله وبركاته

منذ دخولي على المنتدى والاشتراك به، ومساعدته الكبيرة التي لا تقدر بثمن من خلال مجموعة من المعلومات القيمة التي ساعدتني في هذه الرحلة، عهدت نفسي، أن أشارك الجميع بأي معلومة بحوزتي، قيمة كانت أو بسيطة، ومساعدة من أستطيع مساعدته بقدر المستطاع

الأن وهنا سأسرد لكم رحلة شقاء، ودائماً أتذكر كلمات صديق عندما تحصل على قرار إيفاد وذهب للدراسة بمصر الله يذكره بالخير، عندما أقول له "يا فرحتك بالايفاد وبتكمل قرايتك"، وهو يرد عليا ويقول "كان جاك قرار إيفاد متفرحش بيه"، وبالفعل اليوم وقبلها عرفت شن يقصد صاحبي بهالكلمة

يعني أقل شئ ممكن نقوله أنه رحلة شقاء وعناء وتعب وصبر ومحنة، هذا صاحبي في مصر، فما بالك باللي بيدرس في أمريكا

المهم بعد ما صدرلي قرار إيفاد والحمد لله، بدءت رحلة الشقاء اللي نقصدها، وطبعاً رح نتكلم عليها بالتفصيل لأن فيها كثير من المعلومات رح يستفيد منها الجميع إن شاء الله، واللي رح تكون على مراحل، حتى يسهل الرجوع إليها، ونتمنى عدم المشاركة أو الاستفسار حتى أنتهي من الموضوع من الألف حتى الياء، ليصبح أكثر تناسقاً، وبعدها متأكد مش رح يحتاج أي شخص أنه يسأل أي سؤال لان الموضوع رح يكون شامل، وحتى لو حد احتاج سؤال او استفسار يتفضل ورح نجاوبه، وممكن حتى نساعده بقدر استطاعتي ومن غير جميل ولا منة

والأن رح نبدأ في سرد القصة بمراحلها المختلفة

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

المرحلة الأولى: مرحلة الاستقصاء وجمع المعلومات

أول خطوة قمت بها ومن أهم الخطوات جمع كافة المعلومات، بمختلف أنواعها، عن ساحة الدراسة المتمثلة في أمريكا، وعن تخصصي، وعن إجراءات اتمام قرارات الايفاد، وعن قبول اللغة، وكذلك اجراءات التأشيرة، وحتى معلومات العيش والدراسة في أمريكا بالرغم ان الواحد مزال مش متأكد من حصوله على التأشيرة.

طبعاً أول شئ قمت بإنشاء ملف على اللابتوب باسم USA DOCUMENT، وجميع المعلومات والبيانات ومواقع النت وحتى المستندات نحفظ فيها بهذا الملف، وحتى في ايميلي قمت بإنشاء ملف بنفس الإسم ليتضمن أي إيميل له علاقة بهذا الموضوع، واي مستند يخص الاجراءات نعمله في سكان "سكنر" على صيغة Pdf في غالب الاحيان ونخزن فيه في هذا الملف، وهذا من وجهة نظري أهم واول خطوة، لان في المستقبل أي معلومة أو أي مستند رح تجده في هذا الملف، ومتقعدتش متشتت وتريح أي معلومة كنت تعرفها.

طبعاً هني مافيش مجال أن الواحد ينسى يشكر ويثني على منتدى الموفد، لان بصراحة ومن غير مجاملة كان أقوى وأفضل مصدر للمعلومات، وهذا بفعل إدارته وأعضائه، بالإضافة إلى بعض المنتديات الأخرى، واللي غالبها خليجية، نظراً لكثرة الطلبة الموفدين من دول الخليج بعكس الدول العربية الاخرى.

ومنكذبش عليكم قعدت في هالمرحلة ما يقارب ثلاث أسابيع، كان كل همي تحديد أي مدينة رح استقر فيها، واي جامعة ومعهد لغة رح التحق به، والصراحة الموضوع كان صعب ومش ساهل، وفي فترة صارلي التشتت في التفكير ومعاش فهمت حاجة، لان أمريكا قارة بحالها ومتنوعة الاختيارات ويحكمها النظام الفيدرالي، وكل ولاية قصة بحالها.

ومن خلال هالمنتدى الرائع وغيره حاولت نحصر خياراتي في الولايات المفضلة، وكانت حسب الترتيب: ولاية بنسلفانيا، ولاية فلوريدا، ولاية كولرادو، وبديت انجمع عليها في المعلومات بشئ من التفصيل، ومن خلال بعض المعايير، من خلال جودة التعليم، وظروف المعيشة، والطقس ومستوى الامان.

أول شئ انجي لولاية بنسلفانيا، كان اهتمامي منصب على مدينة بتسبورغ ومدينة فلادلفيا، ومدينة ستيت كولج، مدينة بتسبورغ فيها جامعة قوية ومشهورة اسمها جامعة بتسبورغ، وجامعة ترتيبها متقدم، استبعدت التفكير فيها لسبب ان معهد اللغة التابع لها مافيشي مستويات المبتدئ، واحني الليبين الانجليزية الله الله، وخاصة اني مصمم ان اللغة ندرسها في المعهد اللي تبع الجامعة منبيش المعاهد الخاصة لسبب رح نذكرها لاحقاً.

بعدين انتقل التفكير لمدينة فيلادلفيا، فيها جامعة بنسلفانيا من اقوى الجامعات الامريكية الصراحة، بس قبولها صعب، واللي خلاني نستبعدها ان المدينة مش مناسبة، تعتبر من اغلى المدن الأمريكية، ومستوى الأمان فيها مش يعني، يكثر فيا السود، ومن بعد انتقل التفكير لجامعة ولاية بنسلفانيا في مدينة ستيت كولج، الصراحة جامعة قوية وترتيبها متقدم، وهاذي الجامعة حطيتها من ضمن خياراتي.

أما بالنسبة لولاية فلوريدا، جامعات اقل مستوى واقل قوى من جامعات ولاية بنسلفانيا، لكن مناسبة للعيش والدراسة، وحتى طقسها مناسب، شبه استوائي، المهم بعد البحث العميق وقع الاختيار على جامعة سنترال فلوريدا، ترتيبها في المتوسط، وتقع في مدينة اورلاند الشهيرة بدزني لاند

ولاية كولرادو، الصراحة غنية عن التعريف، ومشهورة من قبل الجالية الليبية وحتى الجاليات الخليجية، متنوعة، وجامعاتها مستواها متقدم الى متوسط، ومناسبة للعيش والدراسة من حيث المعيشة والامان، وبعد البحث وقع الاختيار على جامعة دنفر بمدينة دنفر، وجامعة ولاية كولرادو بمدينة فورث كولينز.

وبعد هذه المعلومات قمت بترتيب الجامعات حسب الاولوية، حتى نتمكن بعدها من البدء في إجراءات قبول اللغة، وفي التالي ترتيب تلك المعاهد:

1- جامعة ولاية كولرادو Colorado State University

المدينة: فورت كولينز Fort Collins ،،، الولاية: كولرادو

عنوان الجامعة على الويب: www.colostate.edu

عنوان معهد اللغة التابع للجامعة على الويب: www.iep.colostate.edu

2- جامعة دنفر University of Denver

المدينة: دنفر Denver،،، الولاية: كولرادو

عنوان الجامعة على الويب: www.du.edu

عنوان معهد اللغة التابع للجامعة على الويب: www.duedu/intl/elc

3- جامعة كولرادو – دنفر University of Colorado – Denver

المدينة: دنفر Denver،،، الولاية: كولرادو

عنوان الجامعة على الويب: www.ucdenver.edu/pages/ucdwelcomepage.aspx

عنوان معهد اللغة التابع للجامعة على الويب: www.ucdenver.edu/academics/International/programs/OIA/Pages/default.aspx

4- جامعة ولاية بنسلفانيا The Pennsylvania State University

المدينة: ستيت كولج State College،،، الولاية: بنسلفانيا

عنوان الجامعة على الويب: http://www.psu.edu

عنوان معهد اللغة التابع للجامعة على الويب: www.iecp.psu.edu

5- جامعة سنترال فلوريدا University of Central Florida

المدينة: أورلاند Orland،،، الولاية: فلوريدا

عنوان الجامعة على الويب: www.usf.edu

عنوان معهد اللغة التابع للجامعة على الويب: ................

يتبع،،،

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

خدمة وطنية وليس ايفاد

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

بارك الله فيك اخى اسماعيل وجزاك الله خيرا
يا ريت تحكينا تجربة مرحلة تاشيرة
وشكرا لك

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

آنست بلادك اسماعيل، ومبروك التأشيرة

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

حاضر رح نحكي م مرحلة التأشيرة بالتفصيل ، بس اصبروا عليا لأن في هلبا معلومات رح تفيد الجميع وممرتبطة بالتأشيرة، والنت تاعب ها
ﻻيام
الله يأنسك خوي هاشم ويبارك فيك وعقبالك ان شاء الله

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

السلام عليكم اخي الفاضل
ألف مبروك وإن شـاء الله ترجع بالسلامة وفيدك الشهادة ,وربي يوفقك فيها
انا زيك تعبت وعانيت ومازلت نعاني من هم الاوراق بس بدي استفسر منك :بعد مايطلع اسم في التفويض المالي شنو الخطوة الي بعدها هل تسافر مباشرة ام في اوراق ضروري تعملها؟وكم تاخد من وقت هده الاوراق؟

مع العلم ان قدمت على التفويض المالي منذ 8 أيام

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

نشهد بالله انك انسان صداقته لاتشترى بثمن وموفق فى كافة شؤون حياتك العلمية والعملية وادعيلى بالكى يسقدونا بالتفويض المالى الى حسيته سكن وقبل كل حاجة نطلب من الجميع بالدعاء بأن يصلح الله رب العالمين من حال البلاد والعباد وان يجعل بلادنا وسائر بلاد المسلمين دار سخاء ورخاء

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

الف مبروك اخونا أسماعيل حصولك على تاشيرة ورجوعك الى الوطن وعقبال للجميع
موفقين جميعا

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

بـــــارك الله فيــــــك
اخى اسماعيل وجزاك الله خيرا
يا ريت تحكينا ك يف كانت مرحلة تاشيرة

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

السلام عليكم ورحمة الله وبركاته

اخوتي الأعزاء نتأسف على التأخير لبعض الظروف وضعف الانترنت هذه الايام،،،، وسنتابع كما يلي

المرحلة الثانية: إتمام إجراءات المستندات والاوراق ذات العلاقة

وأني برأي هذه من اصعب المراحل حقيقةً، وخاصة في ليبيا في ظل تدهور الاجهزة الادارية، وقصة الورقة باش تكملها تبي فيها اسبوع

طبعاً المرحلة هاذي تهيئة للمراحل اللي بعدها اللي متمثلة في الحصول على قبول اللغة، وكذلك التأشيرة

ومنخفيش عليكم سر ان المرحلة هاذي خذت مني من ثلاث اسابيع لاربع اسابيع،،، وبصراحة شئ مؤسف اللي صاير في ليبيا،،، لا مبالاة بمصالح الناس، وفساد اداري غير عادي،،، لكن الله غالب ربك يصبح حال البلاد والعباد

المهم، اول خطوة قمت بها استخراج افادة البكالوريوس والماستر من نفس الكلية، وهاذي خذت مني 10 ايام بحالها، قالك المنظومة عاطلة وتاخذ وقت، ويوم تمشي يقولك الضئ هارب، وتقعد شاد بها من مكتب لمكتب باش تكمل اختامها، وطبعاً متنسوش ختم الجودة اللي من بداية السنة بدي من اختصاص الجامعات، يعني اللي بيختم ختم الجودة يراجع الجامعة اللي متخرج منها، وكل جامعة عندها ختم جودة خاص.

المهم، من بين الاوراق اللي جهزتهم رسالة من العمل، وجهزت كذلك كشف حساب لمدة ستة اشهر سابقة، وكذلك استخراج شهادة وكشف درجات الثانوية، لانها مهمة وقد تساعدك في القبول الاكاديمي

بالنسبة لشهادة الثانوية يتم استخراجها من مكتب خدمات التعليم التابع له ثانويتك، وبعدين تمشي تختمها من ادارة التقويم والقياس على مستوى ليبيا، وهاذي مقرها في قرقارش طرابلس، قريب من مطعم الفروج الشهير، تاخذ يومين وتلقاها جاهزات، وع فكرة فيها حتى ختم الجودة من نفس المكان

بعد ذلك قمت بترجمة كافة الاوراق اللي ذكرتها في الاعلى، بالاضافة لذلك ترجمة عقد الزواج،،،، وبالنسبة لعقد الزواج ضروري عليه ختم قاضي المحكمة الكلية، وقاضي المحكمة الجزئية، وبعدين تمشي بيه لوزارة العدل بمنطقة الفلاح طرابلس وتختم عليه.

وبعدين تختم اي ورقة مترجمة من الخبرة القضائية، تحط اوراقك الصبح وترجعلهم بعد الساعة 12 بجنب فندق الودان الظهرة طرابلس، وطبعاً في احتمال ان يرجعوك لتصحيح الترجمة زي ما صار معاي، يعني مافيش حاجة ساهلة، ومتنساش تحطهم في ملف وتكتب اسمك عليك، خير ما تقعد طالع ادور في مكتبة زي ما صارلنا طبعاً

وبعدين تمشي بالورق كله لوزارة الخارجية، وتشد الطابور من صبح ربي باش يوصل فيك الدور وتختم ورقك، وع كل ورقة 5 دينار، الله اعلم علاش،،،

وبعد هكي يكون كل ورقك جاهز،،، وع فكرة هذا كله ما تمش دفعة وحدة، يعني كل مرة تطلع ورقة جديدة تبي الختم والترجمة نبدأ فيها ونكملها لن الأخر، وهذا اللي حكيته باختصار يعني هالمرحلة زي ما قولت خذت اكثر من 3 اسابيع،،،

ومنبيش ننسى اخر حاجة ان اي ورقة نترجمها او نتحصل عليها يندارلها سكان وتتخزن ع الكمبوتر او فلاش،،، لان ضروري الاحتفاظ بها.

في لقطة صارتلي ان كشف درجات البكالوريوس بعد ما ترجمته وصدقته من الخبرة القضائية والخارجية اكتشفت فيه خطأ فادح، الكلية حاطين التقدير العام مقبول، وهو جيد مرتفع، بالرغم ان الافادة صحيح جيد مرتفع، يعني في اختلاف وهذا مرات يضرني في مقابة التأشيرة، فالله غالب مجبر اني غيرت كشف الدرجات بسبب عدم تركيز الموظفين في الكلية وعاودت ترجمته وصدقت عليه من الخبرة القضائية والخارجية

يتبع... المرحلة الثالثة

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

السلام عليكم ورحمة الله وبركاته

المرحلة الثالثة: اجراءات قبول اللغة

طبعاً زي ما اشرت في المرحلة الأولى، اني حددت 5 او 6 معاهد لغة ورتبتها حسب اهميتها، اللي درته اني دخلت على مواقع هذه المعاهد في الويب سايد وشوفت شروط القبول، ودرت حتى برنتنر للابليكشن

بس الموضوع مش ساهل بالصورة اللي يتخيلها البعض، في قصة دفع رسوم، وكيف رح تحوللهم الرسوم، لان ميقبلوش دفعها بالكرديت كارد، يبي تحويل مصرفي، واعتقد حتى بالويسترن ما يمشيش الحال، لان هما يطلبوا في تحويلها لحساب مصرفي معين.

المهم هذا الموضوع خلاني نلجأ للمكاتب الخاصة بالدراسة في الخارج، وشوفت اكثر من واحد، بس للاسف وجدت ان جميعها تجارية، وحتى معاهد اللغة اللي يتعاملوا معاها معاهد خاصة، والبعض منها ان لم نقل غالبها سمعتها سيئة، لدرجة انك تقدر تبدا الكورس كل بداية اسبوع، بعكس معاهد اللغة التابعة للجامعات اللي معتمدة نظام السيمستر، والصراحة اني كنت مصمم اني ندرس في معهد لغة تابع لجامعة، وهذا ليه ميزات اكثر وجودة التعليم أفضل

على العموم قمت بتنزيل موضوع في هذا المنتدى وطلبت المساعدة في الحصول على قبول لغة بإحد الجامعات اللي ذكرتها في المرحلة الاولى، وشخص واحد رد عليا وقدم مساعدته بارك الله فيه، واللي هوا خونا CE Hashem الله يذكره بالخير ويفتح عليه وإن شاء الله في ميزان حسناته لانه تعبته معاي هلبا، عرض عليا قبول لغة في معهد اللغة بجامعة كلورادو ستيت، واني كنت مفضل هذه الجامعة بالذات ومناسبة من جميع المقاييس، وتقع في مدينة فورث كولينس الرائعة.

المهم بعثله شهادة الماستر مترجمة بالانجيليزي ومش محتاجة لختم الخارجية، وصورة من رسالة الدعم المالي، وصورة من جواز السفر اني والمرافق، وعطيته كامل المعلومات الخاصة بالابليكشن، والحمد مسألة ثلاث أيام تقريباً وجاني الرد بالقبول على ايميلي، وبعدين جاني نموذج I-20 على الايميل تأكدت منه وراجعته وكله تمام، وتم ارساله على شركة البريد العالمية UPS ووصلني لطرابلس في غضون اسبوع.

وهكي تمت هاذي المرحلة الحمد لله، والواحد تحصل على قبول اللغة والاي تونتي، وتخطى مرحلة مهمة، ومعاش مزاله الا مرحلة التجهيز للتأشيرة، وبعدين مرحلة التقديم على التأشيرة

يتبع... المرحلة الرابعة

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

السلام عليكم ورحمة الله وبركاته

المرحلة الرابعة: التجهيز للتقديم على التأشيرة

مافيش شك أن هذه من أهم المراحل، وبدأ العد العكسي زي ما يقولوا، وهذه المرحلة فيها خطورة بعض الشئ، لان اي مستند ناقص أو معلومة تكون خطأ رح تقابلك بالرفض في التأشيرة، وبالتالي وجب التركيز في هذه المرحلة، وخاصة في تعبئة الابليكشن.

اول خطوة بديت بيها تصوير صور شخصية 5 في 5، طبعاً المصورين عارفين هالصورة وخلفيتها بيضاء، ولازم تكون واضحة والجزء الاكبر من الصورة للوجه، وخلي معمل التصوير ينزل الصورة على فلاش ميموري بش تستخدمها اون لاين في الابليكشن.

طبعاً صارلي موقف مع قصة الصورة، لما بديت انعبئ في الابليكشن الصورة مباش يقبلها البرنامج، ضروري حجمها لا يتجاوز حد معين تقريبا 240 KB، المهم لقيت نفسي مجبر اني نرجع لمعمل التصوير، وغير ابعاد الصورة اقل من 5 في 5، وحجمها بدأ أقل من المطلوب، طبعاً تأكدت من كلامه وقالي ماشية امورها في الابليكشن، وفي السفارة يوم يطلبوا منك صورة اعطيهم صورة 5 في 5. يعني لازم تركزوا في هالنقطة، باش ميضيعش عليكم وقت زي ما صار معاي

المهم ثاني خطوة هيا تعبئة الابليكشن،،، طبعاً هالخطوة مش ساهلة، ومش صاعبة في نفس الوقت، تحتاج لكثير من التركيز في الاجابات، لان متوقع يسألوك اي سؤال في المقابلة من أسئلة الابيلكشن، ولازم وضروري يكون نفس الجواب، كان هذا رح ينتابهم الشك منك ومن أجوبتك.

طبعاً مالقيتش من يساعدني في هالخطوة فقررت انديرها بنفسي، في رابط في هالمنتدى ساعدني كثيراً وواضح وساهل، بالاضافة لبعض المعلومات اللي ساعدتني كثيرا تحصلت عليها من خونا هاشم بارك الله فيه، منبيش ننسى ونأكد أنه ضروري يكون النت عندك قوي لان رح تشوف شئ ما تتوقعه لو النت ضعيف.

المهم اني عبيت 6 ابليكشن اني وزوجتي، وصديق اخر معاه عائلته، نذكر فيها بديت فيهم الساعة 11 صباحاً وكملتهم الساعة 1 ليلاً، كان يوم لا ينسى الحقيقة مع صعوبة أحياناً في أسئلة الابيلكشن مع ضعف النت،،، طبعاً الابليكشن منبيش انخوض فيه هلبا لانه يوجد موضوع واضح وشامل في هالمنتدى، بس باختصار كان طويل شويا، يتكون من 6 اقسام، كل قسم مختص بشئ معين، معلومات شخصية، ومسيرتك الدراسية، واسئلة امنية، واهم قسم في اعتقادي الخاص بخطة رحلتك، لازم تكون عندك خطة لرحلتك واضحة ومحددة ومختصرة.

ثاني شئ وبعد ما كملت الابليكشن وسحبت صورة من صفحة التأكيد اللي فيها رمز التأكيد وصورتي، وبعثه ع ايميلي، قمت بدفع رسوم السيفيس، واللي هيا اتم عن طريق موقع معين على الويب ومعروف،،، طبعا اني عندي فيزا كارت من مصرف الصحاري، بس لم اتمكن من الدفع بها لم يقبلها الموقع، بالرغم ان في ناس دفعت بفيزا كارت صادرة من مصارف اخرى حسب علمي، المهم كلمت قريب عندي في أمريكا ودفعلي بالكرديت كارد الخاصة بيه، وتمت عملية الدفع في نفس الوقت وبعثولي تأكيد الدفع وعملتله برنتر، مع الاحتفاظ بصورة منه زي العادة ع اللابتوب.

بهالخطوات قربنا على التقديم للتأشيرة، ولم يتبقى الا خطوة اخيرة، الا وهي دفع رسوم التأشيرة، ومن حسن الحظ كان عندي صديق ليبي متواجد بالصدفة في نفس الفترة بالاردن، كلمته وعطيته عنوان مكتب العيسي اللي موجود في الشارع المقابل للسفارة الامريكية، وبعثله ع الايميل صورة من قبول اللغة، وصورة من تأكيد الابليكشن، وصورة من الاي تونتي لكل شخص، وصورة من جوازات السفر، بعثها على ايميل مكتب العيسى، وعملوله ورقة سنتانلي، وذهب بها لفرع مصرف القاهرة الموجود في السيتي مول، طبعاً مقبلوش يدفع علينا الرسوم قالوله ضروري من الحضور الشخصي او اقل شئ جوازاتهم الاصلية، فحاول معاهم مرة واثنين وشرحله الاسباب وافقوا بشرط ياخذوا صورة من جواز سفره، الراجل رجع للفندق باش ياخذ جواز سفره ويرجع للمصرف ودفع الرسوم بالدينار الاردني طبعاً بما يقابل 160 دولار امريكي.

وبهكي كملت كل اجراءاتي ومستنداتي جاهزة للتقديم على التأشيرة، وهذا اللي رح نحكي عليه بالتفصيل في المرحلة القادمة

يتبع....

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

السلام عليكم ورحمة الله وبركاته

المرحلة الخامسة: التقديم على التأشيرة

طبعاً بعد ما صديقي دفع عليا رسوم التاشيرة توكلت على الله، وحجزت رحلة لعمان الأردن، كانت الرحلة يوم 14/11/2013 مساءاً، كانت الرحلة على الخطوط الجوية الليبية درجة رجال الاعمال، الصراحة طيارات جديدة وفاخرة وافضل من هلبا خطوط حتى اوروبية، الطائرة فيها خدمات الاتصال بالنقال وفيها حدمات الانترنت،،، الصراحة ما شاء الله ونتمنى الحفاظ عليها، وان شاء الله ترتقي بخدمات الخطوط الجوية الليبية اللي كانت متميزة في زمن بعيد.

وصلنا لعمان متأخر في الليل، طعاً مستحيل نسافر لمكان قبل لانحجز في هوتيل من البوكينج بالفيزا كارد، افضل من حد يمشي غادي ويوصل متأخر وتاعب ويبدأ يدور في السكن،،، المهم كنت حاجز في فندق ميرديان 4 ايام فقط، مرات ما يعجبنيش الفندق نغيره، وبالفعل هذا اللي صار 4 ايام غيرت الفندق لاخر افضل منه بكثير، فندق الكور اكزيكتيف.

المهم ثاني يوم كان جمعة وعطلة وكساد في كساد، لن جي وقت الغدي باش الواحد طلع تغدى وشدها مولات واللذي منه،،، طبعاً الاردن ماشيلها من قبل اكثر من مرة وما عنديش فيها مشكلة،،، بعدين انجي ليوم السبت، من الصبح امشيت لمكتب العيسى في الشارع المقابل للسفارة الامريكية، وعطيتهم ورقة دفع رسوم التأشيرة، وخذولي موعد، وكان اقرب موعد يوم الخميس الساعة 8 صباحاً، وجهزولي كل الاوراق، وشغلهم منظم ومرتب ما شاء الله.

انجي ليوم المقابلة مباشرةً،،، كان في نوع من القلق مافيش شك،،، بس تختلف درجته من شخص لاخر، الواحد ناض صلى الفجر وشدها دعاء لن قريب فاته موعد المقابلة، المهم وصلت للسفارة في الموعد بعنوانها المعروف في شارع الامويين، عبدون، اول شئ بتشد طابور مش طويل ويتأكدوا من ورقة الموعد، وبعدين يبدأ التفتيش، تدخل لبوابة اخرى فيها طابور وفيها 2 شباك، ياخذوا منك ورقك المهم الاي تونتي وتأكيد الابليكشن، ودفع السيفيس، ودفع الرسوم للتأشرة وجواز سفرك، ويحطوهم في ملف بلاستيك ومعاهم رقم مقابلتك.

بعدها تدخل على بوابة اخرى للتفتيش الدقيق، وممنوع اصحاب الهواتف النقالة، وترجع لك عند الخروج، تدخل بعدها لصالة خاصة بأخذ بصمات اليدين، وبعدها تدخل لقاعة المقابلات، تلقى اكثر من شباك موجود فيه قنصل امريكي، وتنتظر رقمك الكترونياً،،، اذكر ان رقمي كان 22،،، المهم شاهدت حالات تخرج تبكي،،، واضحة رفض، وفي ناس ممكن قالولهم تحتاج لاجراءات ادارية، وفي ناس وافقولهم، والجق كنت متوكل على ربي وكنت هادئ ومتريح لان هذا اهم شئ في المقابلة.

المهم لما جي رقمي تقدمت لقيت قدامي شخص مبتسم ورحب بيا وبادلته نفس الابتسامة، وسالني تبي المقابلة بالانجليزي او العربي، طلبت العربي،،، الصراحة مكنتش متوقع بيعطيني التأشيرة، اول شئ سالني وين ماشي لامريكا، قتله الجامعة والولاية، قالي اعطيني ورقة قبول معهد اللغة، بعدين سالني وين تشتغل جاوبته وقتله معاي رسالة من العمل رفض ياخذها، وبعدين سالني قالي من بيصرف عليك قتله الدولة الليبية، قتله معاي ورقة الدعم المالي رفض ياخذها او يقراها.

الصراحة انتابني الشك من ردوده، ولا طلب مني شهادات التخرج، ولا اي مستند كان معاي من غير اللي ذكرتهم في البداية، المهم قعد يشوف في جوازي لاقاني واخذ تأشيرة الشنغل، سالني وين ماشي لاوروبا، جاوبته، وبعدين وجد تأشيرة بريطانيا سالني ليش روحت للندن، قتله شغل.

بعدها رد عليا بكل بساطة وحرفياً قالي لقد وافقنا على منحك التأشيرة، الحق اني مش مصدق، قعدت نقوله شنو شنو،،،، باش عاودها وصدقت،،، وقالي ارجع يوم الاحد استلم جوازك لان كان يوم المقابلة الخميس،، وعطاني ورقة صغيرة بيضاء فيها رقمين باش تدخل بيهم السفارة وتستلم الجواز.

المهم طلعت من عندهم والسعادة تغمرني،،، وكنت متوقع انها تكون رفض بسبب تصرفات القنصل،،، وطبعاً رجعت الاحد الساعة 2 مساءاً واستلمت جوازاتي، وحصلت تأشيرة لمدة سنة..

اللي بنقوله بالرغم ان انتابني الشك في المقابلة لكن ما خوفتش كنت طبيعي وهادئ ومبتسم،،، وهاذي حقيقة مش مجاملة،،، وهذا اهم شئ في المقابلة، لو مستنداتك تامة وكل شئ تمام، تبقى المقابلة وشخصيتك واداءك امام القنصل،،، لازم تكون طبيعي وهادئ ومبتسم ومن غير تكلف،،، هذا اللي ننصح بيه اي حد

وبعدها روحت يوم الاثنين وغيرت الخطوط على الاردنية،،، وللاسف كانت سيئة بعض الشئ طيارة بطيئة وصغيرة هلبا،،، الليبية افضل بس ما حصلتش حجز في العودة...

وبهكي انكون خلصت كافة المراحل،،، ورح نكمل باقي المراحل لما نوصل فيها من السفر وحتى الاستقرار وحتى الدراسة،، علّ وعسى الواحد يحصل دعوة طيبة تنفعه يوم يقابل رب العالمين...

والان رح نجاوب ع اسئلتكم بعد ما كملت،،، ومستعد للاجابة عن اي سؤال او استفسار،، او تقديم اي مساعدة قدر استطاعتي

والله ولي التوفيق

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

azkola كتب:

السلام عليكم اخي الفاضل
ألف مبروك وإن شـاء الله ترجع بالسلامة وفيدك الشهادة ,وربي يوفقك فيها
انا زيك تعبت وعانيت ومازلت نعاني من هم الاوراق بس بدي استفسر منك :بعد مايطلع اسم في التفويض المالي شنو الخطوة الي بعدها هل تسافر مباشرة ام في اوراق ضروري تعملها؟وكم تاخد من وقت هده الاوراق؟
مع العلم ان قدمت على التفويض المالي منذ 8 أيام

وعليكم السلام ورحمة الله وبركاته

والله الحقيقة ما عنديش جواب،،، لان قرار ايفادي مش من وزارة التعليم، ايفادي من جهة العمل وعلى نفقتها،،، والاجراءات تختلف كثيراً

نتمنى حد من الزملاء يقدر ايفيدك

والله ولي التوفيق

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

السيد فرج, عادل مرعى كتب:

نشهد بالله انك انسان صداقته لاتشترى بثمن وموفق فى كافة شؤون حياتك العلمية والعملية وادعيلى بالكى يسقدونا بالتفويض المالى الى حسيته سكن وقبل كل حاجة نطلب من الجميع بالدعاء بأن يصلح الله رب العالمين من حال البلاد والعباد وان يجعل بلادنا وسائر بلاد المسلمين دار سخاء ورخاء

إن شاء الله ربي يسخرلك الحال خونا فرج،،، ويفتح عليك ويوفقك يارب،،،،

وربي يحفظ ليبيا وشعبها من شر الحاقدين ومن شر الفتن

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

الف الف الف مبروك اخي اسماعيل
وان شاء الله ربي يوفقك في دراستك
وبارك الله فيك وعلي شرحك المهم

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

hamza saber كتب:

الف الف الف مبروك اخي اسماعيل
وان شاء الله ربي يوفقك في دراستك
وبارك الله فيك وعلي شرحك المهم

الله يبارك فيك خونا،،، وربي يوفقنا جميعاً

وعقبالك ان شاء الله

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

بارك الله فيك اخى اسماعيل وحزاك الله خيرا على توضحيات طيبة .
وعندى بعض الاسئلة
1- فى ابليكشن 160 بالنسبة مرافق نكتب فى خانة عنوان اتصال واقامة عنوان معهد اللغة ؟ وايضا فى نموذج مرافق زوجة نكتب فى خانة مرافقين انا باعتبارى مرافق رغم اننى موفد انا ؟
2- فى ابليكشن 160 عندما توصل الى صفحة ابلود صورة شنو خطوة بعدها ؟
3- بالنسبة باركود هل نسحبها على طول او ارسله على اميل ثم سحبه من الاميل ؟
4- بالنسبة ابليكشن خاص بالموقع حجز عندما نصل الى صفحة خيارات الدفع الورقة ستانلى كيف تطلع لان نت ضعيف عندى ؟ باش نسحبها وعند خروج من ابليكشن ودخول اليه مرة الاخرى يعطينى خطا فى اسم المسخدم وكلمة سر رغم ان بياناتى صحيحة ؟
5- فى حالة دفع صديقك فى مصرف ما هى الاوراق مطلوبة للمصرف ؟ وهل ارسلت له الورقة ستانلى على اميل ؟
6- عند استلام مصرف الورقة ستانلى وفلوس ؟ هل يعطوه ايصال مالى للدفع رسوم تاشيرة وهذا ايصال يوجد فيه رقم المرجعىCGI او رقم ايصال ? لان فى خانة خيارات الدفع توجد مربع هل هذا نكتب فيه رقم ايصال ام يكتب تلقائيا خصوصا بعد دفع وبعد يوم من دفع ؟
7- بعد مقابلة رجعوا لك جميع الاوراق بماذا فى ذلك اى تونتى ؟ يعنى ماذا اخذوا منك ؟ بالنسبة اى تونتى يوجد فىه توقيع طالب وتاريخ ؟
8- بالنسبة نموذج 160 فى صفحات الاخيرة قسم حول الامان ولامراض الذى يتكون من 5 اجزاء نضغط نو على جميع خيارات ؟
9- بالنسبة سكن فى فندق كويس الذى شكرته وقعد فيه طيلة اقامته نريد اسم فندق وعنوان وكم سعر غرفة ؟
شكرا جزيلا للك

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

salem.amssad كتب:

بارك الله فيك اخى اسماعيل وحزاك الله خيرا على توضحيات طيبة .
وفيك بارك الله

وعندى بعض الاسئلة
1- فى ابليكشن 160 بالنسبة مرافق نكتب فى خانة عنوان اتصال واقامة عنوان معهد اللغة ؟ وايضا فى نموذج مرافق زوجة نكتب فى خانة مرافقين انا باعتبارى مرافق رغم اننى موفد انا ؟
نعم هذا صحيح،،، زي ما ذكرت بالزبط

2- فى ابليكشن 160 عندما توصل الى صفحة ابلود صورة شنو خطوة بعدها ؟
مافهمتش سؤالك الصراحة

3- بالنسبة باركود هل نسحبها على طول او ارسله على اميل ثم سحبه من الاميل ؟
الافضل طلب ارساله على الايميل باش تفضل محتفظ به لاي طارئ،، وهذا اللي درته اني بالزبط، وبعدين اسحب منه زي ما تبي

4- بالنسبة ابليكشن خاص بالموقع حجز عندما نصل الى صفحة خيارات الدفع الورقة ستانلى كيف تطلع لان نت ضعيف عندى ؟ باش نسحبها وعند خروج من ابليكشن ودخول اليه مرة الاخرى يعطينى خطا فى اسم المسخدم وكلمة سر رغم ان بياناتى صحيحة ؟
بالنسبة لورقة استانلي معنديش عليها فكرة، لان صديقي تمله مكتب العيسي، وهوا اللي تمله الاجراءات هاذي، وبالنسبة للرجوع للابليكشن اكيد في خطأ لان يطلب منك رقم التأكيد وبعدين 5 الاحرف الاولى من لقبك، وبعدين تاريخ ميلادك السنة فقط، وبعدين الاجابة على سؤال الامان، وبعدين يفتحلك الابليكشن من جديد.

5- فى حالة دفع صديقك فى مصرف ما هى الاوراق مطلوبة للمصرف ؟ وهل ارسلت له الورقة ستانلى على اميل ؟
الاوراق المطلوبة صورة من جوازات السفر، وورقة استانلي فقط، هذا لو وافقوا لان يطلبوا في الحضور الشخصي او الجواز الاصلي، وانت وحظك.

6- عند استلام مصرف الورقة ستانلى وفلوس ؟ هل يعطوه ايصال مالى للدفع رسوم تاشيرة وهذا ايصال يوجد فيه رقم المرجعىCGI او رقم ايصال ? لان فى خانة خيارات الدفع توجد مربع هل هذا نكتب فيه رقم ايصال ام يكتب تلقائيا خصوصا بعد دفع وبعد يوم من دفع ؟
اكيد بيعطوك ايصال الدفع ولازم يكون معاك في المقابلة، وفيه رقم الايصال هو اللي ادخله لما تأخذ الموعد، بس زي ما قتلك اني حتى الموعد خذاهولي مكتب العيسى.

7- بعد مقابلة رجعوا لك جميع الاوراق بماذا فى ذلك اى تونتى ؟ يعنى ماذا اخذوا منك ؟ بالنسبة اى تونتى يوجد فىه توقيع طالب وتاريخ ؟
اكيد، كل الورق رح يرجعلك بعد المقابلة مباشرة، باستثناء ايصال دفع رسوم التأشيرة، وتأكيد الابلكشن فقط، وبالنسية الاي تونتي تكتب اسمك وتوقع عليه وتكتب تاريخ التوقيع.

8- بالنسبة نموذج 160 فى صفحات الاخيرة قسم حول الامان ولامراض الذى يتكون من 5 اجزاء نضغط نو على جميع خيارات ؟
اكيد، كل الاجابات No

9- بالنسبة سكن فى فندق كويس الذى شكرته وقعد فيه طيلة اقامته نريد اسم فندق وعنوان وكم سعر غرفة ؟
هذا رابط الفندق على البوكينج، تقدر تختار التاريخ وعدد الايام وتشوف السعر، الفندق 4 نجوم ويعتبر غالي شويا لان السعر الاصلي ايزيدوا عليه في ضرائب، بس فندق رائع:
http://www.booking.com/hotel/jo/crop-executive.ar.html?sid=a454a19295f0e48d2d42c3b893bf5a25;dcid=1;checkin=2013-12-09;checkout=2013-12-10;srfid=068a73f11c874345e5c8bb151f7101fdec3f7aa4X2

شكرا جزيلا للك
العفو، حاضر لاي مساعدة، وربي يوفق الجميع

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

شكرا جزيلا للك
فى سؤال ثانى
فى ابليكشن 160 نقصد فى صفحة االتى نقوم ابلود صورة التى حجمها لا يتعدى عن 240 كيلو بايت يعنى شنو خطوة بعدها لانى انا وقفت هنا هل تاتى الورقة مراجعة ثم ارسال الى موقع السفارة ثم ياتتك ادخال رقم الجواز ثم تضغط على صفحة وبتطلع باركود وهذا كان موجود من قبل ام حصل تغير فى ابليكشن ؟
يعنى بعد تحميل صورة ماذا ياتى هل صفحة باكودة مباشرة ام ماذا ؟

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

salem.amssad كتب:

شكرا جزيلا للك
فى سؤال ثانى
فى ابليكشن 160 نقصد فى صفحة االتى نقوم ابلود صورة التى حجمها لا يتعدى عن 240 كيلو بايت يعنى شنو خطوة بعدها لانى انا وقفت هنا هل تاتى الورقة مراجعة ثم ارسال الى موقع السفارة ثم ياتتك ادخال رقم الجواز ثم تضغط على صفحة وبتطلع باركود وهذا كان موجود من قبل ام حصل تغير فى ابليكشن ؟
يعنى بعد تحميل صورة ماذا ياتى هل صفحة باكودة مباشرة ام ماذا ؟

نفس الشئ اللي ذكرته،، تستمر في تعبئة اقسام الابليكشن ورقم الباركود يطلعلك من الاول،،، باش لو خزنت الابليكشن وطلعت منه،،، وبعدين تبي ترجع تكمله يطلب منك رقم التأكيد،،، وباقي البيانات اللي ذكرتها من سنة الميلاد واللقب وجواب سؤال الامان

وبعدين تستمر في تعبئيته للنهاية،،، وبعد ما تكمل يعطيك فرصة تراجع كل قسم من اقسام الابليكشن لو كان عندك خطأ او تعديل،،، وبعد المراجعة تطلعلك صفحة التأكيد وفيها البيانات المعروفة وكذلك صورتك الشخصية...

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

طبعا صفحة تاكيد فييها خيارات اما تطبع صفحة او ارسالها الى اميل .
وهل توجد بعد مراجعة ارسال بيانات الى موقع السفارة الامريكية ؟
وفى بداية ابليكشن طبعا انت اخترت سفارة الاردن بلد ؟
وهل يمكن سحب صفحة مراجعة ؟
افضل وقت للقديم قبل موعد دراسة بيكم شهر ؟
شكرا لكم

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

salem.amssad كتب:

طبعا صفحة تاكيد فييها خيارات اما تطبع صفحة او ارسالها الى اميل .
وهل توجد بعد مراجعة ارسال بيانات الى موقع السفارة الامريكية ؟
وفى بداية ابليكشن طبعا انت اخترت سفارة الاردن بلد ؟
وهل يمكن سحب صفحة مراجعة ؟
افضل وقت للقديم قبل موعد دراسة بيكم شهر ؟
شكرا لكم

وايضا فى نقاط تالية
1- بعد مراجعة نضغط تالى تطلع صفحة باركود تاكيد ؟
2- فى خانة اقامتك فى امريكا نكتب اسم شارع معهد الذى ندرس فيه لانى لم احدد سكن ابدا يعنى نكتب عنوان معهد ؟
3- فى خانة اتصال بيك فى امريكا توجد خيار person وخيار اخر موسسة نحتار ماذا لان برسون فيه اسم اللقب وانا ليس لدى اقارب يعنى نكتب ماذا اسم معهد وعنوانه او رئيس معهد يا ريت توضح هذا نقطة ؟
4- فى خانة اتصال اكتب اسم اشخاص ليسوا اقاربك وهذه موجودة قبل صفحة السيفيس ؟
شكرا للك

رد: رحلة شقاء: من قرار الإيفاد، والحصول على التاشيرة، وحتى السفر والاستقرار

salem.amssad كتب:

salem.amssad كتب:

طبعا صفحة تاكيد فييها خيارات اما تطبع صفحة او ارسالها الى اميل .
بالتأكيد

وهل توجد بعد مراجعة ارسال بيانات الى موقع السفارة الامريكية ؟
مافهمتش السؤال الصراحة.

وفى بداية ابليكشن طبعا انت اخترت سفارة الاردن بلد ؟
بالتأكيد،،، أول خطوة تختارخ اللغة،، وبعدين تختار المدينة والدولة اللي بتقدم فيها،، وهاذ ضروري منه،،، لان بعدين في صفحة التأكيد بتطلع فيها عنوان السفارة في الاردن مش دولة ثانية.

وهل يمكن سحب صفحة مراجعة ؟
معاش نذكر الحقيقة،،، لكن أعتقد لا يمكن ذلك تراجعها الكترونياً فقط.

افضل وقت للقديم قبل موعد دراسة بيكم شهر ؟
والله مافيش معيار محدد، اني قدمت قبل الدراسة بشهرين والحمد لله امشت الامور،،، واعتقد من شهرين لن 3 كويس..

شكرا لكم
العفو
وايضا فى نقاط تالية
1- بعد مراجعة نضغط تالى تطلع صفحة باركود تاكيد ؟
بالزبط

2- فى خانة اقامتك فى امريكا نكتب اسم شارع معهد الذى ندرس فيه لانى لم احدد سكن ابدا يعنى نكتب عنوان معهد ؟
نعم،،، تكتب عنوان المعهد بالتفصيل اللي بتدرس فيه، زي ما درت بالزبط

3- فى خانة اتصال بيك فى امريكا توجد خيار person وخيار اخر موسسة نحتار ماذا لان برسون فيه اسم اللقب وانا ليس لدى اقارب يعنى نكتب ماذا اسم معهد وعنوانه او رئيس معهد يا ريت توضح هذا نقطة ؟
اني درت عنوان السفارة الليبية في واشنطن.

4- فى خانة اتصال اكتب اسم اشخاص ليسوا اقاربك وهذه موجودة قبل صفحة السيفيس ؟
ضروري من شخصين غير اقارب،،، وهاذي مافيهاش مشكلة اثنين اصدقائك المقربين، اسمائهم، وارقام هواتفهم، وايميلاتهم.

شكرا للك
العفو، وتفضل اي استفسار اخر اني حاضر

ملتقى الطلاب الليبيين للدراسة في الخارج، اخر قرارات الإيفاد، التفويضات، إدارة البعثات

رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار

descriptionرد: رحلة شقاء: من قرار الإيفاد، والحصول على التاشيرة، وحتى السفر والاستقرار