السفارة الليبية تتوقف عن تجديد جوازات السفر للمغتربين الليبيين بكندا و تطلب منهم العودة لليبيا و الحصول ع الجواز الجديد

قرار إعتباطي من شخص غير مسئول

اللهم انتقم منهم مثل ما ايعقدو في إجراءات الطلبة

القرار ليس اعتباطيا مع احترامي لرأي بعضهم لانه يتعلق بالامن القومي والمصلحه العليا للبلاد والعباد ... اي نعم سيخلق هذا المنشور بعض المتاعب لبعض الناس ولكن نفعه اكثر حيث لن يستطيع ان يكون ليبيا الا الليبي الاصيل والمواطن الصالح ومن اراد ان يكون صالحا فله ذلك ولكن بعد ان يقف علي ميزان العداله اما بطاقات التطعيم الخضراء التي كانت تمنح حتي لعابري السبيل فقد ان الاوان لتمحيصها واستبدالها لاهل هذا البلد وحسب .

باهي واللي يدرس ع احسابه الخاص يعطوه تذكرة ذهاب وعودة ولا جواز السفر ايكلف الاف الدولارات خاصة ابو الاسرة - بصراحة القرار بصيغته الحالية مجحف

الشئ الاخر اذا كان لايوجد ثقة في السفارات ع الاقل للتقديم للجواز الجديد والاستخراج من ليبيا - بمعنى اذا الخارجية لا تثق في دبلوماسييها فهذا الاجراء لن يضر الا المواطن البسيط لان الخارجية لم تقم بالغاء الجواز الاخضر لذلك بكل بساطة اي شخص بشوية علاقات  يمكن يستخرج جواز اخضر بتاريخ يسبق تاريخ هذا القرار بيوم واحد والجواز مدته 8 سنوات 

اكرر هذا القرار - ان صح - بصيغته الحالية مجحف

اي امن قومي يا راجل اذا رئيس لجنة الامن القومي يسعمل في التل يوميا في مراميطة سيارته باش اتاكد فيها قنبلة او لا . يغني خلاص معادش قيه حلول اش يغني الكاميرا غالية او ارسال الجواز ايكلف مو كل سقارة فيها ظابط من الجوازات يمشله شخصي كان مسالة الثقة ايصكروا السفارات

يا أخي كيف يصير في الطلبة اللي في أمريكا وكندا ؟؟
يعني بعد ان يسقط الجواز يبي يرجع لليبيا ويعاود اجراءات التأشيرة ؟؟؟؟
العزابي بيتحمل !! لكن اللي عنده أسرة فيها 3 أو 4 أشخاص كل لما بيسقط جواز بيلم حوايجة وبيرجع لليبيا


اللهم أصلح البلاد

ونرجع ونقول قرار إعتباطي غير مدروس

وقفوه للي جوازه اخضر بس... اعتقد قرار صحيح وخاصة ان الجوازات الجديدة اصبحت الكترونية... هذا رأيي

لا اعتراض علي القرار لانه عاجلا ام اجلا كانو اجوازات حتتغير لانه مشروع مدروس ليه وقت مواكبة للتحضر ولهلبة مميزات..كون في ناس بتنضر هذي ضريبة الله غالب ..ممكن طريقة تنفيذ القرار باقل خسائر هي اللي كانت مش مدروسة ...ع الاقل تعطي السفارات اصلاحية للاصدار الجديد .... في بداية التورة اللخبطة اللي صارتفي الجوازات والتجديد اللي في قريب 4 مرات متجدد؟؟؟هذا ويييين؟؟كفانا مهزلة الحق ... لو تنحل مشكلة الاصدار من السفارة فقط حتي اللي ما طاحش باسبورته حيكون السباق انه يغيره للجديد ...وربي يهديهم ويفكرو بقلب وعقل لخوتهم واقل خسائر واعم مصلحة...

اللي يقول امن قومي نقوله كلام فارغ،،،، مافي امن قومي غير في ليبيا،،،،، القنصلية خدمتها تجديد واصدار الجوازات،،،،،، بيوقفوا الاخضر وبيديروا الالكتروني كويس،،،،،، تلم حوايجك انت وصغارك باش تجدد باسبورتك،،،،، وبعدها بشهور شوية ايطيح جواز فرد ثاني من العايلة نمشي نكروا روحنا لليبيا من جديد وهلم جرا فهذا غباء،،،،،

وقبل لا يتفلسف اي واحد،،،،، لا يجدد الا لمن ما زال له اقل من ستة شهور في عمر الجواز،،،،، يعني لو فيه زوج وزوجة بيناتهم سنة من حيث تجديد الجواز،،،،، فجايتهم في رحلتين لليبيا في خلال سنة او يقعمز في ليبيا لين يجدد الجوازات كلها،،،،،،،،

مهزلة واللي ايحط في قرارات زي هادي ما ايشوفش للعواقب والنتائج دائما قرارات  تعرقل الطالب وتكره في حاجة اسمها قراية . توا  الواحد بيقرا و الا بيقعد ايجدد كل مرة جواز خصوصا العائلات خلي من غير تكلفة التجديد من تذاكر سفر و مصاريف اخرى و ضياع للوقت..... حسبنا الله و نعم الوكيل

الأخ اللي يحكي على الضريبة أنا متأكد أن ما عندكش صغار بتمشي بيهم لكندا

تخيل روحك عندك 2 صغار وزوجتك وقاعد في كندا وماشي في دراستك الأكاديمية والجواز امتاع حضرتك يكمل بعد شهر وزوجتك عندها الى بداية 2015 والصغار الى بداية 2016 كذا قولي الضريبة اللي بتدفعها حضرتك شني ؟؟
والله بتسيب القراية أحسن لك ...
اللهم انتقم في كل من يتسبب في عرقلة الطلبة بالخارج

إستمرار لمسلسل القرارات الغير مسؤولة للأسف بداية بقرار منع تغيير الساحة وما يستبعه من مشاكل مالية ودراسية وإنتهاء بإلغاء تجديد الجوازات , بالله حسب رأيهم صاحب العائلة والأطفال اللي زي حالاتنا كيف يدير , يترك دراسته ويوقف صغاره من المدارس ويدفع الآف الدولارات علي خاطر يجدد جوازات سفر . صحيح من ليبيا يأتي الجديد

لا حول ولا قوة الا بالله..... والله القرار مؤسف... الله ينتقم منهم

أولا بالنسبة للجواز الجديد تقدر ادير جواز جديد حتى قبل ما ايطيح جوازك الأخضر يعني تروح العيلة كلها ويغيروا جوزاتهم كلهم التذاكر حتكون مكلفة صح بس لعلهم ايديرولنا فيهم حل ولعل أن القرار هذا بيكون فترة محدودة فقط وبعدها يبدوا يصدروا فيه ف السفارات، بس عموما أنا نبي نسأل هل لو غيرت جوازي معناها لازم انقدم ع التأشيرة من جديد؟

باختصار ... حتي لو تكفلت الدوله بكل مصاريف العوده لاستخراج الجواز الجديد لكل مواطن انتهت صلاحية جوازه فسيكون ذلك في مصلحة ليبيا .. انا لست ضد راحة الناس وانا احدهم ولكنني افاضل بين المصالح اما كيف تؤخد الحقوق فالسبل كثيره ..ويضل هذا المنتدي ساحه لتبادل الافكار والخبرات دونما داع للتعصب لها .

يا اسامه المحترم .. في ناس هاربه بالاموال والدماء في رقابها ومش هكي بس وبانتهاك الاعراض يخي ..هذا مدخل للحديث
بالاضافه الي ان السفارات او بعضها لازالت خاضعه للفساد الكامل ووزير الخارجيه حتي وان كان قديسا يشتغل ضمن منظومه شامله فايهما افضل تتحمل الدوله بعض المصاريف بشكل مؤقت متمثله في ثمن تذاكر والا يحوسوا فيها السفراء برا في اصدار الجوازات للهاربين من العداله ...لما انت تلغي الجواز الاخضر بشكل تدريجي وتخللي الاصدار بشكل مركزي لمده محدده ( مش طول العمر يعني ) كيف بيتحركوا الناس الهاربين من العداله ؟
هذا من جانب ومن جانب اخر مش كل الناس اللي برا جوازاتهم منتهيه .. وقاعد انكرر في وجهة نظرى يمكن ايجاد اليه بالنقاش تخفف عالناس التعب لكن فكرة اصدار الجواز من ليبيا صائبه تماما في الوقت الراهن لاني يا اسامه احتكيت في فترة ما بعد الثوره بسفارة ليبيا في بلد ما وشفت العجب العجاب
واخيرا الكلام فارغ في النقاش الموضوعي ماعنداش محل وانا اربأ بك عن هذا اللفظ
مع تقديري .

ياخوي أول شي أنا لما علقت فاهم الموضوع ومتضرر منه قبلك، وأنا ماقلتش ان الأمر ساهل ومافيهش تشحوير، أنا بش قدمت حل ع الأخ يلي ذكر قصة ان كل فرد من العيلة بنقعد انسافروا ع خاطره فأنا وضحتله انه يقدر يجدد للعيلة كلها ف سفر واحد، وياريت يا استاد يلي فاهم تعطينا حلول مش تقعد تشكيلنا، القرار توقع والضرر وقع إشكي لغدوة مش حيتغير، لهذا احنا اولاد اليوم وهذا عائق وماعندناش حل الا نتجاوزوه ونلقوله حل.

أخي على الدين أحسنت، كلامك زين العقل، بارك الله فيك

يا أخي معقولة في اعتقادكم أن الهاربين بملايين الدولارات خانبينها من ليبيا ما ايكونش عندهم جنسية أخرى ؟؟
يا أخي قذاف الدم مش قادرين يوصلوله وهو قاعد في مصر معزز مكرم !!
يعني الخطة العبقرية اللي طلعت بيها وزارة الخارجية رح تفشل 100% في جلب الأزلام ورح تنجح 100% في التضييق على الطلبة بالخارج

وياريت الأخوة اللي موافقين على القرار حلفتكم بالله قولولنا بكل صراحة ومصداقية ( صلاحية جوازاتكم الى متى )