كل مايتعلق بتأشيرة طالب زائر وتأشيرة سائح

الله يسلمك اختي حنان كندا وربي ابياركلك في عمرك

اختي الكريمة التأشيرة اللي هي 6 شهور يقال انها يجب انها تتجدد من خارج بريطانيا يعني بنرد مع زوجي والصغار ...المهم خليها على الجبار القادر على كل شئ املنا فيه كبييييير

(حسبنا الله سيؤتينا الله من فضله انا إلى الله راغبون)

تفرج ان شاء الله اختي
قال تعالى { وَمَنْ يَتَّقِ اللَّهَ يَجْعَلْ لَهُ مَخْرَجًا (2) وَيَرْزُقْهُ مِنْ حَيْثُ لا يَحْتَسِبُ وَمَنْ يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا (3) } صدق الله العظيم
ربي يفرج علينا وعليك يا وخيتي

يا اختي داانيه فيه ناس حصلت 8 في الايلتس و في حياتهم ما سافروا خارج ليبيا.. و 8 هدي حصلوها وقت القدافي.. الي عنده نيه يتعلم الطريق كانت مفتوحه قبل و توا.. و اللي ما عنداش نيه مش حيتعلم لا قبل لا توا.... نعرف ناس ليها قريب 5 سنوات في بريطانيا و مش قادرين يحطوا كلمتين على بعض.. فحتى لو جيتي هني مش معناها بتتعلمي و بسرعه... البعض مخدوع بجامعات الغرب.. يحساب روحه لو وصل هني يعني خلاص العلم مضمون...

طريقة تدريس اعضاء هيئة التدريس في ليبيا ادسم من هني لانهم يتبعوا الطريقه التقليديه الي التعب يكون فيها على الاستاذ.. المدرس هني يتوقع منك اديري كل شي.. على المستوى الشخصي.. انا بديت قرايتي من كم شهر.. المشرف متفاهم معاه من كم شهر على موضوع المشروع.. توا سحب روحه و كل شي يتوقع فيا اني انديره.. نجيبله كود نوريهوله يقولي ما نقدرش نساعدك, نسأل سؤال في ليمين يرد عليا باجابة في ليسار.. الملخص هو اني اللي ندير فيه هني نقدر انديره في ليبيا و في اي مكان اخر.. الفرق في النيه بس..

دانة توكلي على الله و اللي فيه خير ان شاء الله يصير

انا قلت من قبل ان الدكتور بن طاهر قال
انه سيكون هناك اسثناء بخصوص التأشيرة
بخصوص الطلاب الدارسين على حساب الدولة
حيث انه سيكون هناك اتفاقية مع مفوضية بريطانيا

وانا اتصلت به امس قالي في حد قدم و رفضوه .. قتله لا ..
قالي خلاص قدموا على تأشيرة طالب مع مرافقين وكان رفضوك خليه ايجيني ..

و اليوم في شريط عالتلفزيون على قناة الوطنية تؤكد ماقلته في السابق

طبعا قبل مافيش حد قدم و صار منه
لانه السفارة في ليبيا كانت مسكرة و توا فتحت و ان شاء الله حيصير كل خير
ويطلع كل هذا الكلام مزبوط مية المية

يعني ادعوا انه هذا الكلام صحيح و بيصير منه ..
الى الان هذا مجرد كلاااااااااااااااااااااااااااام من مدير ادارة البعتات شخصيا


ملاحظة..
وارجوا من الاخوة من يريد الرد ان يرد بأسلوب حضاري
و الا انني سأظطر الى حذف تعليقه

thank you

اختى نورا
مش شايفة في الردود رد غير حضاري!!
ربما لم يكن الرد منمق ولكنه يعبر عن وجهة نظر هامة ولها وجاهتها
وبالحقيقة حتى طرح الموضوع من صاحبته لم يكن منمق ابدا
كونك مشرفة يجب ان تكوني حيادية ولا تنحازي لشخص او لوجهة نظر معينة
ويقتصر دورك على منع تجاوز قوانين المنتدى فقط

أنا نضم صوتي ليك أخت هدى ولاحظت الفترة هذي المشرفين ابتعدو عن الحيادية وانحازو في بعض المواضيع اللي قريتها مع احترامنا ليهم وللأعضاء وللمنتدى ككل

انا لم اقصد عليك يا هدى و لا على احد من الاعضاء و لكن في بعض الاعضاء لما نقول ان الدكتور بن طاهر قال يردون بأسلوب لايليق بالناس المتعلمة ..
ولو قريتي ملاحظتي كويس راك فهمتي كلامي انا قلت من يريد الرد و ليس من قام بالرد
تحياتي

ملاحظة..
وارجوا من الاخوة من يريد الرد ان يرد بأسلوب حضاري
و الا انني سأظطر الى حذف تعليقه .

حاسه بيك اخت نورا,,,,,واللبيب من الاشاره يفهم...

بـــــــــــــــــــــــــــــارك الله في الجميع

وان شاء الله تفرج علينا كلنا..

بنقدم على تاشيرة طالب زائر لدراسة اللغة اقل من سنة
بس جوازى يطيح 7/2013 وصورتى فى الجواز متغير هلبا هو طايح من 2010 لكن فى الاحدات درتله تجديد ختم 2013
افيدونا بارك الله فيكم

مفروض جوازك يكون صالح لمدة 6 شهور من تاريخ تقديمك.. يعني في حالتك انت تقدر تقدم بدون اي مشاكل

بارك الله فيك خوى محمد وربى يفتح عليك

معذرة اختي نورا ،انا لم اكون من ضمن من ردوا سابقا بس فعلا مقتنعة بوجهة نظرهم

وفي نقطة مهمة نحب نقولها ممكن لو الواحد يتوقع الافضل من الاخرين احسن

يعقوب قال لابنائه اخاف ان يأكله الذئب فقالوله انه اكله فعلا
تخوفنا من شيء ما يشعر البعض بالجرأة علي هذا الشي
تحياتي

هي القصه نسوان في نسوان اني محبيش ندخل من اول مره
لكن قلت شويه تعليق ميضرش الموضوع مع احترامي الشديد للتريس اللي خشت وعلقت
وبعدين خيركم على المشرفين
والله يبو الخير بس
وبعدين المشرفين ما همش زباينة النار
المشرفين بشر زيكم يحسوا ويشعروا زيكم
المهم الاخت نورا كان قصدها مستقبليا بس يعني بعد ردها مش قبل
بالسبه ليا اني شخصيا نقول عندها الحق , لانها خايفه من الرد السلبي من بعض الاعضاء , اللي ل ما الاخت نورا تكتب رد فيه الدكتور الطاهر يبدوا الجماعه في التعليق والاستهزاء والاستفزاز والنقض الهدام اللي ميجيبش غير وجع الراس يعني (نفخ)
تعرفو يا خواتي اني مشرف على قسم الاحتجاج والنقض البناء
والله تعب ما هو تعب ولله الشكوى , والله مرات نطيح في اعضاء اسلوبهم مش ولا بد يعني مش لازم نتكلم على اسلوبهم خير,
طبعا حاش البعض (الا ما رحم ربي)

بالنسبه لموضوع الانجليزي الحق ينقال , صحيح البلاد قصره في التعليم بشكل عام والانجليزي اللي جيت فتره وتنحا من المنهج بشكل خاص, واكيد لما نحوه كان مردوده سلبي على الاجيال القادمه,
اني واحد من الناس اللي مخديتش دورات ولا قريت خارج البلاد والحمد لله توا نهدرز مع هنود معانا في الكليه يعني مش 100% لكن يفهموا فيا ونفهم فيهم , مع العلم لني حبيت الانجليزيه من الاعدادي
ولكن لاحظت مؤخرا ان اغلب الطلبه اللي يجونا جدد للكليه الانجليزيه بالماينس (-)وما عندهمش اي نيه في القرايه
واخيرا
انشاء الله يكون في عون الجميع
بالتوفيق يا خواتي

لوزا كتب:

ملاحظة..
وارجوا من الاخوة من يريد الرد ان يرد بأسلوب حضاري
و الا انني سأظطر الى حذف تعليقه .

حاسه بيك اخت نورا,,,,,واللبيب من الاشاره يفهم...

أنا نأيدك بقوة بس شكله المرة هذي ما فهم

السلام عليكم انا اود الدراسة في بريطانيا وعلي حسابي الخاص ولدي اقربائي في لندن وعن طريق طلب زائير واريد الأوراق المطلوبة بشان القبول المدرسي هل مدة الأيقامة تحدد في في القبول المدرسي والتاشيرة لو اعطتني السفرة التاشيرة مدة 3اشهر هل بي امكاني التجديد هناك في لندن

نعم مدة القبول تلقاها في ورقة القبول.. لو مشيت لبريطانيا بتأشيرة طالب زائر,, ضروري التجديد يكون من خارج بريطانيا.

مرحبا بــكــم جمــيــعا
انا اخدت موعد فى السفارة البريطانية الاسبوع القادم .. وعندى قبول من مدرسة لغة
سؤالى : ـــــ ورقة القبول الاصلية هل مطلوبة من السفارة
او انها غير ضرورية .. تكفــــــــــــــى ورقة قبول مسحوبة من الانترنت عبر الايميل
افيــدو نــى افـــادكـــم الله

مش ضروري الاوراق يكونوا اصليات لكن لازم تعرف ان فيه فرق بين رسالة القبول و رسالة التأشيرة الي مفروض تستلمهم من المدرسة قبل ما تقدم على التأشيره.. يعني لازم تتأكد من الاوراق قبل التقديم

مالفرق بين رسالة القبول ورسالة التأشيرة ..
وهل الورقتين مطلوبات كلهم
...................
وياريت خوى محمد . اذا ممكن توضح لى الاوراق المطلوبة كلها
علما بأنى سأقدم على تأشيرة ( زائر طفل )
لانا عمرى 17 (تحت 18 سنة )

اهااا.... الرسائل هذي خوي محمد تختلف من مكان الى اخر,, فيه بعض المعاهد و المدارس تعطي نفس الرساله للقبول و للتأشيره و فيه الي يعطي في رساله خاصة بالقبول و ثانيه للتأشيرة.. فلهذا انت لازم تخاطب المدرسه الي حصلت منها قبول و تستفسر منهم لو ان الرساله الي عندك تنفع للتأشيرة و الا تحتاج رسالة اخرى...

مشكور اخ محمد لاصيبعى
وانشاءالله حنسئل المدرسة على ورقة القبول

لاكن مكتليش عالاوراق المطلوبة كلها

و الله حسب ما نعرف (لكن مش متأكد) ان الاوراق المطلوبه هي نفس الاوراق الي يطلبوا فيهم في تأشيرة الطالب الزائر باضافة تعهد من ولي الامر و شهادة ميلاد .


الموقع هذا فيه معلومات على الاوراق المطلوبه لتأشيرة الطالب الزائر

http://www.ukba.homeoffice.gov.uk/sitecontent/documents/out-of-country/visitors.pdf