السلام عليكم
قرأت بشكل مفصل موضوع اسباب رفض التأشيرة البريطانية وموضوع مبروك حصولك عالتأشيرة البريطانية ومن فترة وانا نجهز في الأوراق وحاولت نسد أي تغرة وجيت لتونس والاسبوع الجاي موعدي وهادو الاوراق اللي بنحطهم ياريت لو فيه حاجة ناقصة تقولولي عليها. و نبي نعرف شني افضل ترتيب نحط بيه الاوراق. وهل ملف الموفد بروحه والمرافق بروحه والا نحط الاوراق كلهم فوق بعض بترتيب معين. مع العلم ان زوجتي الموفدة وانا المرافق وكنا في بريطانيا هي بتأشيرة طالب زائر وانا خشيت المرة الاولي بالجواز الامريكي ، لكن المرة اهيا بنخش بالليبي لأن المشرف قالي الافضل لما تدير التاير 4 تديرها في الليبي.
الاوراق هي:
- الابليكيشن للموفد والمرافق وورقة الموعد.
- ورقة بيانات ال الكاس لبريسشنل كورس لمدة 7 أشهر والكورس يبدأ في 10 نوفمبر القادم .
- ورقة القبول غير المشروط للبريسشنل كورس.
- شهادة الايلتس للموفد.
- ورقة الدعم المالي لغرض التأشيرة صادرة من الملحقية.
- كشف حساب للموفد في بريطانيا به 6000 باوند.
- اجازة للموفد من الجامعة مكتوب فيها انه في اجازة لغاية مايكمل اللغة والماجستير وانه بيرجع لبلاده وعمله بعدما يكمل قرايته وان تحسين لغته وحصوله عالماجستير حيحسن من وضعه الوضيفي في الجامعة.
- تعريف من العمل واجازة سنة بدون مرتب للمرافق بادية من شهر 12 السنة الماضية وتنتهي بعد 4 أشهر(( مقدرتش نجددها من توة وكتبت في الابليكيشن في السؤال الاخير متع المعلومات الاضافية ان المرافق لديه اجازة سنة بدون مرتب قابلة للتمديد)).
- كشف حساب للمرافق به مبلغ 50 الف دينار ليبي مع العلم ان الكشف مكنش فيه ايداع من بداية السنة لأني واخد اجازة بدون مرتب لذلك كشف الحساب خديته لمدة سنة باش يضهرو فيهم مرتبات ال 6 شهور الاخيرة.
- شهادات مرتب للمرافق لأخر 6 شهور خدمة.
- ورقة موقعة من المرافق الزوج مكتوب فيها انه يتكفل بكافة مصاريف الموفد في حالة توقفت المنحة لأي سبب كان.
- شهادة التخرج وكشف الدرجات للموفد.
- شهادة الميلاد للموفد وللمرافق والوضع العائلي وعقد الزواج.
- شهادة البوليس للموفد .
- شهادة كورسات اللغة للموفد والمرافق فيها نسبة الحضور ب 99 % .
- شهادة PET للمرافق الزوج من سنة 2005 ، وحطيتها لأن خفت ينبشو عالمشية اللي فاتت يقولولي علاش مشيت قريت لغة وانت تقدر تقرا لغة في بلادك وملقيناش اي شهادات لغة قديمة ليك باش نقولو انك بتطور لغتك.
- شهادة خاصة ب كورس قصير خديتها من بريطانيا في سنة 2011 ، لأن بعد تحرير طرابلس الشركة متاعنا وقفت خدمة في ليبيا فقعدو يبعثو فينا نخدمو في فروع الشركة برة ، وانا مشيت ل أسكتلندا خدمت معاهم شوية غادي.
